"ოცნებამ" გამოაცხადა, რომ შვებულებაშია, ზოგი საზღვარგარეთაა, ზოგი სოლარიუმში" - რას ამბობს ოპოზიცია საპარლამენტო უქმეებზე და როგორ პასუხობს მათ უმრავლესობა

ქვეყანაში გამოცხადებული უქმე დღეების გამო, საპარლამენტო საქმიანობა შეჩერებული იქნება. არ გაიმართება პარლამენტის ბიუროსა და კომიტეტების სხდომები, რაც მიმდინარე კვირის საპარლამენტო აქტივობა უნდა ყოფილიყო და სავარაუდოდ, არც მომავლი კვირისთვის ჩასატარებელი პლენარული სხდომა.

ასევე, 20 ივნისის მოვლენებზე პარლამენტში წარდგენილი ამნისტიის პროექტების ბიუროზე ინიცირება და საკომიტეტო განხილვის პროცესის დაწყება რამდენიმე დღით - უქმე დღეების დასრულებამდე გადაიდო.

მთელი დღის განმავლობაში მმართველი გუნდის აღნიშნულ გადაწყვეტილებას ოპოზიციის კრიტიკა მოჰყვა.

"სტრატეგია აღმაშენებლის" ლიდერის გიორგი ვაშაძის თქმით, იმ პირობებში, როდესაც ქვეყანაში არის უმძიმესი გაჭირვება, შიმშილი, ფასები იზრდება, შემოსავლები იკლებს და ლარის კურსი გარბის, ხელისუფლებამ "შვებულება გამოაცხადა".

მისივე განმარტებით, ეკონომიკური გათვლებით, ყოველი არასამუშაოდ გამოცხადებული დღე 100 მილიონი ლარი უჯდება საქართველოს ეკონომიკას და ხელისუფლების გადაწყვეტილებით, არა მხოლოდ ეკონომიკა, უკვე პარლამენტისა და ყველა სამინისტროს მუშაობაც შეწყვეტილია.

"ქვეყანაში არის უმძიმესი გაჭირვება, შიმშილი, ფასები იზრდება, შემოსავლები იკლებს, ლარის კურსი გარბის, ინვესტიციები არ შემოდის, კორონავირუსით დღითიდღე მეტი ადამიანი, სამწუხაროდ, გვტოვებს და ამ პირობებში მთელმა "ქართულმა ოცნებამ“, მთელმა ხელისუფლებამ გამოაცხადა, რომ შვებულებაშია აბსოლუტურად ყველა, ანუ შემდეგი 10 დღის განმავლობაში, ამ ადამიანებს, რომც გინდოდეთ, ვერ იპოვით - ზოგი საზღვარგარეთ არის, ზოგი სოლარიუმშია, ზოგი ისვენებს, ზოგი განცხრომაშია თავისი მოპარული ფულით და ხალხი და სახელმწიფო, ისევ და ისევ, არის ყოველგვარი ყურადღების გარეშე მიტოვებული. მე კითხვას ვსვამ, უმარტივესს, ნუთუ რამდენ ხანს უნდა გაგრძელდეს ამ ხალხის ასეთი უპასუხისმგებლო დამოკიდებულება ქვეყანასთან მიმართებით?

ეკონომიკურად დათვლილია, რომ ყოველი არასამუშაოდ გამოცხადებული დღე ეს არის მინუს 100 მილიონი ლარი ჩვენს ეკონომიკაში და აქ მარტო ეკონომიკა კი არ გააჩერეს, პარლამენტი გაჩერებულია, სამინისტროები გაჩერებულია, ყველა უწყება გაჩერებულია, არაფერი არ მუშაობს. საბჭოთა ტერმინი რომ იყო - „მაისკიე პრაზდნიკი“, ეს მოიწყვეს თავიდან ბოლომდე. ეს არის საგანგაშო. ნუთუ ამ უბედურ გაჭირვებაში ხელისუფლებას ახლა უნდა ეცალოს, რომ 10 დღე, 2 კვირა გამოაცხადოს მთელი ქვეყნისა და თავისი თავისთვის შვებულებად? იქნებ მოიკითხოთ სად არის ეს ხალხი? ვინმემ იცით სად არიან ? ყველა არის თითქმის საზღვარგარეთ წასული დასასვენებლად. ამაზე უნდა ვაგებინოთ პასუხი და ამის გამოა, რომ ასეთი შიმშილი და გაჭირვებაა დღეს ქვეყანაში" - განაცხადა ვაშაძემ.

"გირჩის" ერთ - ერთი ლიდერის ვახტანგ მეგრელიშვილის თქმით, "ქართულმა ოცნებამ“ ოპოზიციას შესთავაზა, მივიდნენ და იმუშაონ უქმე დღეებშიც, ასე რომ ვისაც მუშაობა სურს, შეუძლია იმუშაოს.

"მთელი წელია ვცხოვრობთ უქმე დღეების რეჟიმში. უქმე დღეები ისეთი რაოდენობით გვაქვს, რომ ციხის პატიმრებს შეშურდებათ. მოვისმინე ასევე "ქართული ოცნების" წინადადება - მობრძანდნენ პრობლემა არ არისო, უქმე დღეებშიც ვიმუშავებთო. აქედან გამომდინარე მათ ვერ დააბრალებ. თუ მუშაობა გვინდა, შეგვიძლია ვიმუშაოთ დღესაც", - განაცხადა მეგრელიშვილმა.

საპარლამენტო უმრავლესობის წევრმა სოზარ სუბარმა ოპოზიციის საპასუხოდ განაცხადა, რომ პარლამენტში შესული ოპოზიცია არ მუშაობს და დერეფანში განცხადებების კეთებას ვერ გასცდა. ამასთან სუბარის თქმით, ეჭვები იმის თაობაზე, რომ მელიას საქმეზე გამამტყუნებელი განაჩენი შესაძლოა ამნისტირებამდე დადგეს, უსაფუძვლოა, რადგან სასამართლო პროცესი ამ ინტენსივობით არ იმართება და ბოლო "პროცესი როდის იყო, აღარც ახსოვს".

"ბიურო დღეს რომც ჩაინიშნოს, ამნისტიის კანონპროექტის სესიაზე განხილვა მაინც ვერ მოხდება, რადგან პარლამენტის სხდომები გადავდეთ. ჩვენ ვაკეთებთ იმას, რასაც მოვუწოდებთ მთელ ქვეყანას, ჩვენ უნდა ვიყოთ მაგალითის მიმცემი, ამიტომ სესიაზე განხილვა დაიწყება მაშინ, როცა პარლამენტი დაიწყებს მუშაობას. ეს არის მართლა არაფრის გამო ატეხილი ხმაური, ცდილობენ რაღაც თემა გამოძებნონ, რადგან სალაპარაკო არაფერი აქვთ დარჩენილი.

გასული 4 წელი ოპოზიციისთვის იყო სულ უქმე დღეები და გასული 6 თვეც უქმე იყო, დარწმუნებული იყავით, 2- ჯერ შემოვლენ პარლამენტში და ისევ სულ უქმე დღეები დაიწყება ამათთვის. არ დადიან, არ მუშაობენ, განცხადებების მეტი არაფერი უნდათ, დერეფანს ვერ გასცდნენ ძირითადად. მათ ჭკუაზე რომ გაგვევლო, მანდატებიც არ ექნობოდათ დღეს, საერთოდ ვერ შემოვიდოდნენ პარლამენტში, შემოვიდნენ და მადლობასაც არ იხდიან, რომ ასეთი ბედნიერები არიან", - განაცხადა სუბარმა.