27
მარტიდღის ზოგადი ასტროლოგიური პროგნოზი
ვფიქრობ, უკვე შეთანხმების პუნქტები ყალიბდება იმ ფორმით, რომ პოზიციების დაახლოება შესაძლებელია , - ამის შესახებ საქართველოს პარლამენტის თავმჯდომარემ არჩილ თალაკვაძემ კრისტიან დანიელსონთან შეხვედრის შემდეგ განაცხადა.
მისივე თქმით, "ტექსტი თანდათან იღებს ისეთ სახეს, რომ იქ უფრო მეტი თანხმობის მოძებნა შეიძლება, ვიდრე დაპირისპირების".
"გვქონდა კიდევ ერთი მნიშვნელოვანი, საქმიანი, ძალიან კარგი შეხვედრა. პროცესი წინ მიდის, მოლაპარაკებები გრძელდება. განსაკუთრებით მინდა მადლობა გადავუხადო ჩვენს ევროპელ კოლეგებს და ბატონ დანიელსონს ასეთი პროფესიონალური მიდგომისთვის, როგორიც მას აქვს მედიაციის და დიალოგის ფარგლებში.
ვფიქრობ, უკვე შეთანხმების პუნქტები ყალიბდება იმ ფორმით, რომ პოზიციების დაახლოება შესაძლებელია და იმედს ვიტოვებ, რომ ორივე მხრიდან კონსტრუქციული მიდგომებით ჩვენ შევძლებთ ამოვწუროთ ეს უთანხმოება და შევძლოთ ნორმალურ პოლიტიკურ პროცესს დაუბრუნდეს ყველა პოლიტიკური პარტია და პარლამენტი.
პუნქტებში, რომელზეც განხილვა მიმდინარეობს, არის მნიშვნელოვანი წინსვლა პოზიციების დაახლოების კუთხით და გარკვეული სამუშაო რჩება. თუ ოპოზიციის მხრიდან იქნება პრაგმატული ნაბიჯები გადადგმული, ჩვენი მხრიდან სამართლიანი და პრაგმატული ნაბიჯები იყო გადადგმული ამ დღეებში, ვფიქრობ, რომ ჩვენ შეთანხმებას შევძლებთ. აქ ამოსავალი წერტილი და შეთანხმების მთავარი ფაქტორი უნდა იყოს ჩვენი ქვეყნის და ჩვენი საზოგადოების ინტერესები. ჩვენ უნდა გვესმოდეს, რომ ეს შეთანხმება არ არის რომელიმე პოლიტიკური პარტიისთვის, ეს შეთანხმება არის იმისთვის, რომ საქართველომ მოახდინოს დემოკრატიის კონსოლიდაცია და კონცერნტრირდეს იმ მნიშვნელოვან ამოცანებზე, რაც დღეს არის როგორც საზოგადოების დაკვეთა, ასევე ჩვენი ქვეყნის ეროვნული ინტერესები, ეს არის ევროინტეგრაცია, ეს არის პოსტკოვიდური ეკონომიკის სწრაფი აღდგენა, სიღარიბის შემცირება, ახალი სამუშაო ადგილები და ის დღის წესრიგი, რაც საქართველოს აქვს დასავლეთთან ინტეგრაციის თვალსაზრისით. ამისთვის მნიშვნელოვანია, ჩვენ როგორც სახელმწიფომ ვაჩვენოთ, რომ გვაქვს სტაბილური, პოლიტიკური სისტემა და არა ისეთი სისტემა, რომელიც არჩევნებიდან არჩევნებამდე ასეთ კრიზისებს აჩვენებს“, - განაცხადა თალაკვაძემ.
"ქართული ოცნების" თავმჯდომარის ირაკლი კობახიძის თქმით, არსებობს პოლიტიკური აზრთა სხვადასხვაობები და ეს მოლაპარაკების პუნქტებზე აისახება, თუმცა დიალოგის წარმატებით დასრულების იმედს მაინც იტოვებს.
"შეგვიძლია დარწმუნებით გითხრათ, რომ მედიატორი არც ერთ ისეთ წინადადებას არ დააყენებს, რომელიც ეწინააღმდეგება სამართლიანობის პრინციპს", - განაცხადა კობახიძემ.
კობახიძის თქმით, ხვალ კონსულტაციები სავარაუდოდ, გაგრძელდება.
„კონსულტაციები გრძელდება, ამ შემთხვევაშიც სამწუხაროდ, გვიწევს დეტალების გასაჯაროვებისგან თავის შეკავება. ხვალ გაგრძელდება სავარაუდოდ კონსულტაციები, ეს არის მიმდინარე პროცესი. კვლავაც ძალაშია პირობა, რომლის მიხედვითაც ჩვენ არ ვასაჯაროვებთ დეტალებს, შესაბამისად გაგვიჭირდება კონკრეტიკაზე საუბარი, თუმცა ყოველი შემდეგი შეხვედრა ნიშნავს წინ წაწევას კონკრეტული მიმართულებებით“, - განაცხადა კობახიძემ.
ირაკლი კობახიძის თქმით, არსებობს მხარეებს შორის განსხვავებული პოზიციები. როგორც მან აღნიშნა, ოპოზიცია ამბობს, რომ საქართველოში არიან პოლიტპატიმრები, თუმცა კობახიძის შეფასებით, საქართველოში არიან კრიმინალები პოლიტიკაში, მაგრამ პოლიტპატიმრები - არა.
„მე შეგახსენებთ, რომ ჯამში უკვე ხუთი თვეა გრძელდება ეს კონსულტაციები. მათ შორის არის ეს ახალი პროცესი, მაგრამ მანამდე იყო მოლაპარაკებების რაუნდი. საკითხი რთულია, ბუნებრივია, განსხვავებული პოზიციეიბი არსებობს შეფასებებთან დაკავშირებით. ჩვენ ვამტკიცებდით იმას, რომ არჩევნები კი არ გაყალბდა, არამედ ოპოზიციამ გააყალბა PVT და ეს დავამტკიცეთ. ოპოზიცია ამტკიცებდა იმას, რომ გაყალბდა არჩევნები და ეს ვერ დაამტკიცა. აქ უკვე არის რადიკალური აზრთა სხვადსხვაობა. შესაბამისად, ეს აისახება შეთანხმების კონკრეტულ პუნქტებზეც. რთულია დისკუსია. ოპოზიცია ამბობს, რომ საქართველოში არიან პოლიტპატიმრები, თუმცა ჩვენ და საზოგადოებამ ვიცით, რომ საქართველოში პოლიტპატიმრები არ არიან. საქართველოში არიან კრიმინალები პოლიტიკაში, მაგრამ პოლიტპატიმრები არ არიან. არჩვენები რომ არ გაყალბებულა და პოლიპატიმრები რომ არ არსებობენ, ეს ვიცით და ოპოზიცია განსხვახვებულ რამეს ამტკიცებს. შესაბამისად, აქ არის პრინციპული აზრთა სხვადასხვაობა. რთული ამოცანა აქვს ბატონ დანიელსონს, თუმცა მე იმედს ვიტოვებ, რომ შეთანხმებამდე მივა ეს პროცესი. აქ ჩვენს საერთაშორისო პარტნიორებს აქვთ გადამწყვეტი როლ და დარწმუნებული ვარ, რომ ისინი იმოქმედებენ ისე, როგორც საჭიროა შეთანხმების მიღწევისათვის და დიალოგის წარმატებით მიღწევისათვის“, - განაცხადა კობახიძემ.
ევროპული საბჭოს პრეზიდენტის შარლ მიშელის პირადი წარმომადგენელი კრისტიან დანიელსონი “ქართული ოცნების” ლიდერებს დღეს კიდევ ერთხელ შეხვდა.
შეგახსენებთ, რომ კრისტიან დანიელსონი, რომელიც დღეს ბრიუსელში უნდა დაბრუნებულიყო, საქართველოში დარჩა და ქვეყნის კრიზისიდან გამოყვანის მიზნით, პოლიტიკურ აქტორებთან შეხვედრებს აგრძელებს.
მოეგეთ გონს ბოლობოლო ოცნებავ და დანიშნეთ არჩევნები რომ ქვეყანა განვითარდეს... დაღუპეთ ქვეყანა
კრისტიან,წადი სახლში ჭორვილელის ფლიდ ბიჭებთან ურთიერთობა და ჭკუის დარიგება გაგაგიჟებს შენ.მაგათ ნიუტონის ძალისმიერი კანონით თუ არ ელაპარაკა დასავლეთი სანქციებით,ისე არაფერი გამოვა.