"მე არ შემშინებია ვირუსის" - რას ამბობს ევროპის უხუცესი ადამიანი, 117 წლის მონაზონი, რომელმაც Covid-19 დაამარცხა

ფრანგი მონაზონი, რომელიც ევროპის უხუცესი ადამიანია, Covid-19-ისგან გამოჯანმრთელდა. როგორც BBC წერს, ის 11 თებერვალს 117 წლის გახდება. ლუსილ რენდონს 1944 წლიდან და ანდრეს უწოდებენ. მას კორონავირუსი 16 იანვარს დაუდასტურდა, თუმცა არანაირი სიმპტომი არ გამოვლენია.

"ვერც კი მივხვდი, რომ ვირუსი მქონდა“, - თქვა მან მედიასთან საუბრისას. ვირუსის დადასტურების შემდეგ, მონაზონი იზოლაციაში გადაიყვანეს. ახლა კი ცნობილი გახდა, რომ ის სრულად გამოჯანმრთელდა.

და ანდრეს არ აქვს მხედველობა და შშმ პირებისთვის განკუთვნილი ეტლით სარგებლობს. ამბობს, რომ მოუთმენლად ელოდება თავის დაბადების დღეს. მიუხედავად ყველაფრისა, აპირებს რომ ადამიანების მცირე ჯგუფთან ერთად აღნიშნოს ეს დღე, თუმცა არა ისეთ ხალხმრავლობაში, როგორც წინა წლებში აღნიშნავდა ხოლმე.

"ძალიან გაუმართლა, იღბლიანია. მას არ უკითხავს ჩემთვის არაფერი თავისი ჯანმრთელობის მდგომარეობაზე. მხოლოდ ის აინტერესებდა, შეიცვლებოდა თუ არა ძილის რეჟიმი, ან სადილის, ვახშმის გრაფიკი. არ გამოუვლენია შიში ამ დაავადების მიმართ“, - ამბობს საფრანგეთის წმინდა კეტრინის პანსიონატის წარმომადგენელი დევიდ ტაველა.

როდესაც ფრანგული ტელევიზია BFM-ის ჟურნალისტმა და ანდრეს ჰკითხა, შეეშინდა თუ არა ვირუსის, მან ასე უპასუხა - "არა, არ შემშინებია, რადგანაც არ მეშინია სიკვდილის. მე ბედნიერი ვარ თქვენ გვერდით ყოფნით, მაგრამ ვისურვებდი ვიყო იქ, სადაც არიან ჩემი უფროსი ძმა, ბებია და ბაბუა“, - თქვა მონაზონმა.

და ანდრე 1904 წლის 11 თებერვალს დაიბადა. ის არის ევროპის ყველაზე უხუცესი და, ხოლო მსოფლიოში - მეორე უხუცესი ადამიანი.

წყარო: BBC.com