ოთარ აბესაძე პოლიტიკაში ბრუნდება - "მინდა ჩემი რესურსი მოვახმარო საქართველოს, ვაპირებ გავხდე აქტიური მოქალაქე"

"ქართული ოცნების" ახალგაზრდული ფრთის ყოფილი თავმჯდომარე, მერიის ყოფილი ჩინოვნიკი ოთარ აბესაძე, რომელმაც ქრთამის აღების ბრალდებით ციხეში თითქმის 4 წელი გაატარა, პოლიტიკაში დაბრუნებას აპირებს. აბესაძემ საპატიმრო 2018 წელს დატოვა და როგორც თავად ამბობს, გაიარა სრული ჯოჯოხეთი, უმძიმესი ჯანმრთელობის მდგომარეობით.

ციხიდან გამოსვლის შემდეგ, აბესაძემ სამეცნიერო საქმიანობას მიჰყო ხელი და დღეს ევროპის ორი უნივერსიტეტის მიწვეული ლექტორი და მკვლევარია, ასევე თბილისის რამდენიმე უმაღლესი სასწავლებლის ლექტორი.

პოლიტიკურ გეგმებთან დაკავშირებით 32 წლის აბესაძემ "პალიტრანიუსის" გადაცემა "პოლიტnews"-ის ეთერში ისაუბრა.

"მინდა ჩემი რესურსი მოვახმარო ბევრ რამეს საქართველოში. ვაპირებ გავხდე აქტიური მოქალაქე და ამას გავაკეთებ იმიტომ, რომ მინდა ჩავერთო რეფორმების პროცესში, განათლებისა თუ ეკონომიკის მიმართულებით" - განმარტა აბესაძემ.

რაც შეეხება მის ყოფილ პარტიასთან "ქართულ ოცნებასთან" ურთიერთობას, აბესაძე არ გამორიცხავს, რომ მათთანაც ითანამშრომლოს:

"ასე ვიტყვი ჩემი და "ქართული ოცნების" ურთიერთობაზე - ბევრი არ არსებობს ამ ქვეყანაში მათზე ჩემსავით, ასე ვთქვათ ნაწყენი და მათთან ჩემი პირადი ისტორია მაქვს, მაგრამ მე ვიყურები წინ. სწორედ ამ მოტივაციამ მომცა ის, რომ შევქმენი ძალიან ბევრი რაღაც. მიუხედავად იმისა, რომ მათ სხვა წესრიგი აქვთ და მე სხვა, "ქართული ოცნება" არის მძლავრი პოლიტიკური ორგანიზაცია, ისევე როგორც "ნაციონალური მოძრაობა", "ევროპული საქართველო", "გირჩი", რომელსაც მე ხმა მივეცი სხვათაშორის ამ არჩევნებზე - ესენიც ილაპარაკებენ ერთმანეთში და ლაპარაკობენ და მეც, როგორც აქტიური მოქალაქე, ქვეყნის ინტერესების გათვალისწინებით საინტერესო პროექტებზე, რა თქმა უნდა დაველაპარაკები ყველას.

რადიკალურად სხვა გუნდია დღეს "ქართული ოცნება" - სხვა მიზნებით, მოცემულობით და სხვა რესურსით იყო გუნდი 2012 წელს და დღეს არის აბსოლუტურად სხვა ადამიანებით დაკომპლექტებული, ჩემთვის აბსოლუტურად უცხო პოლიტიკური პარტია. მაგრამ, დღეს მთავრობაში არიან ძალიან კომფორტულად. რა შემთხვევაში არის თუნდაც ცუდად მმართველი ხელისუფლება კომფორტულად? იმ შემთხვევაში როცა მას არ ყავს რეალური ალტერნატივა. ალტერნატივა ის კი არ არის ერთმანეთს მწარე სიტყვები ეძახო... ხელისუფლებაში არიან კომფორტულად, მას უბრალოდ აკრიტიკებენ, მაგრამ ხალხს არავინ სთავაზობს ალტერნატივას - მაგალითად საკოორდინაციო საბჭო, რომელიც იღებს გადაწყვეტილებებს, ოპოზიციური ისტებლიშმენტი მას აკრიტიკებს, თუმცა არ სთავაზობს ალტერნატივას.

დღეს რომ მე პოლიტიკურ პროცესში ჩართული ვყოფილიყავი, პირველ რიგში რასაც გავაკეთებდი, ამ ლოქდაუნისა და შეზღუდვების ალტერნატივას დავდებდი, თუ რა უნდა გახსნილიყო, რომელი ბიზნესი და ა.შ. რაც შეეხება პოლიტიკურ პროცესს - როცა ერთი მხარე საუბრობს გაყალბებაზე, ხოლო მეორე არ აღიარებს გაყალბებას, სამწუხაროდ მე არც ერთი დოკუმენტი არ მინახავს, თუმცა თუ მეცოდინებოდა რომ არის გაყალბება, მექნებოდა ძალიან დიდი პროტესტი, თუ იქნებოდა რეალობა, ვიქნებოდი პოლიტიკური პროცესის მონაწილე, ბოიკოტიც პოლიტიკური პროცესია, მაგრამ უნდა გაგრძელდეს მოლაპარაკებები საერთაშორისო ელჩების მონაწილეობით" - განაცხადა აბესაძემ "პოლიტnews"-ის ეთერში.