სალომე ზურაბიშვილისა და მაიკ პომპეოს შეხვედრის ამსახველი კადრები - შეხვედრა ორბელიანების სასახლეში შედგა

აშშ-ის სახელმწიფო მდივანი, მაიკ პომპეო საქართველოს პრეზიდენტ სალომე ზურაბიშვილს შეხვდა. შეხვედრა ორბელიანების სასახლეში გაიმართა.

"ამერიკის შეერთებული შტატების სახელმწიფო მდივანმა საქართველოს პრეზიდენტთან შეხვედრაზე აშშ-ის სახელით საქართველოს სუვერენიტეტისა და ტერიტორიული მთლიანობისადმი ერთგულება დაადასტურა", - ამის შესახებ ინფორმაციას საქართველოში ამერიკის შეერთებული შტატების საელჩო ავრცელებს.

მათივე ინფორმაციით, ამავე შეხვედრაზე მაიკ პომპეომ გლობალური ტერორიზმის წინააღმდეგ ბრძოლაში შეტანილი მნიშვნელოვანი წვლილისთვის ქვეყნის მიმართ პატივისცემა გამოხატა.

„სახელმწიფო მდივან პომპეოსთვის სასიამოვნო იყო პრეზიდენტ ზურაბიშვილთან შეხვედრა ორბელიანის ისტორიულ სასახლეში, სადაც ადრე აშშ-ის საელჩო იყო განთავსებული. შეხვედრაზე სახელმწიფო მდივანმა შეერთებული შტატების სახელით საქართველოს სუვერენიტეტისა და ტერიტორიული მთლიანობისადმი ერთგულება დაადასტურა და გლობალური ტერორიზმის წინააღმდეგ ბრძოლაში შეტანილი მნიშვნელოვანი წვლილისთვის ქვეყნის მიმართ პატივისცემა გამოხატა“, - აღნიშნულია აშშ-ის საელჩოს განცხადებაში.

მაიკ პომპეო თბილისს გუშინ ეწვია და ვიზიტის ფარგლებში ოფიციალურ შეხვედრებს დღეს, 18 ნოემბერს მართავს.

საქართველოს პრეზიდენტთან შეხვედრის შემდეგ სახელმწიფო მდივანი საქართველოს პრემიერ-მინისტრ გიორგი გახარიასთან და საქართველოს საგარეო საქმეთა მინისტრ დავით ზალკალიანთან შესახვედრად გაემართა. შეხვედრა მთავრობის ადმინისტრაციაში ამ წუთებში მიმდინარეობს.

შემდეგ მაიკ პომპეო შეხვდება სრულიად საქართველოს კათოლიკოს-პატრიარქ ილია მეორეს. ამასთან, აშშ-ის სახელმწიფო მდივანი საქართველოში ვიზიტის ფარგლებში ბოლო შეხვედრას სამოქალაქო სექტორის წარმომადგენლებთან გამართავს.

აშშ-ის სახელმწიფო მდივანი, მაიკ პომპეო საქართველოს დღეს დატოვებს, რის შემდეგაც ისრაელს ეწვევა. მაიკ პომპეო საქართველოში ჩამოსვლამდე თურქეთში იმყოფებოდა.

ნახეთ სალომე ზურაბიშვილისა და მაიკ პომპეოს შეხვედრის ამსახველი კადრები, რომელსაც პრეზიდენტის ადმინისტრაცია ავრცელებს: