"ნუ ვიტყვით ვინ არის დამნაშავე და ვინ, სად, რა შეცდომა დაუშვა" - რატომ დგას სწრაფი ტესტის მოლოდინში გრძელი რიგები და რას ამბობენ ექიმები კორონავირუსით რეინფიცირებაზე

დაავადებათა კონტროლის ეროვნული ცენტრის ხელმძღვანელის ამირან გამყრელიძის განცხადებით, მსოფლიოში კორონავირუსით რეინფიცირების შემთხვევა თითზე ჩამოსათვლელია.

ამირან გამყრელიძის თქმით, რეინფიცირების შემთხვევის დადასტურებას „სერიოზული კვლევა სჭირდება“.

„მსოფლიოში რეინფიცირების შემთხვევა თითზე ჩამოსათვლელია. დადასტურებას, რომ ნამდვილად რეინფიცირებასთან გვაქვს საქმე, საკმაოდ სერიოზული კვლევა სჭირდება, მათ შორის, გენეტიკური კვლევებიც, რომელიც ჩვენთან ჯერ არ ჩატარებულა“, - განაცხადა გამყრელიძემ.

დაავადებათა კონტროლის ეროვნული ცენტრის ხელმძღვანელის მოადგილის, პაატა იმნაძის განცხადებით, საქართველოში კორონავირუსით რეინფიცირების შემთხვევა ჯერ აღწერილი არ არის.

„ჩვენთან ასეთი შემთხვევა აღწერილი ნამდვილად არ არის. თუ იქნება, სამეცნიერო თვალსაზრისით ძალიან საინტერესოა და რა თქმა უნდა აღვწერთ“, - განაცხადა პაატა იმნაძემ.

ამირან გამყრელიძემ ასევე ისაუბრა სწრაფი ტესტის ჩატარებისთვის მოქალაქეთა გრძელი რიგების მიზეზებზე.

მისი განცხადებით, ის რომ მოქალაქეებს რამდენიმე საათი უწევთ სწრაფი ტესტის ჩატარებისთვის რიგში დგომა არა ტესტების დეფიციტს, არამედ სერვისის მიწოდების არაორგანიზებულობას უკავშირდება. როგორც ამირან გამყრელიძემ „ინტერპრესნიუსის“ შესაბამისი კითხვის კომენტირებისას აღნიშნა, სწრაფი ტესტების მარაგი დღესაც ნახევარი მილიონი ტესტით შეივსო.

„თუ ასეთი რამ ხდება ალბათ უფრო სერვისის მიწოდების არაორგანიზებულობას უკავშირდება, იმიტომ რომ, როგორც ანტიგენზე ისე ანტისხეულზე დამყარებული სწრაფი ტესტების შესაბამისი რაოდენობა ქვეყანაში არის. დღეს დამატებით ნახევარი მილიონი ანტიგენზე დამყარებული სწრაფი ტესტით შეივსო ჩვენი მარაგები, კიდევ 1 მილიონი ანტიგენზე დამყარებული ტესტი შეკვეთილია, ასე რომ, დეფიციტი ნამდვილად არაა“, - აღნიშნა გამყრელიძემ.

თავის მხრივ, როგორც დაავადებათა კონტროლის ეროვნული ცენტრის გადამდებ დაავადებათა ცენტრის ხელმძღვანელმა ხათუნა ზახაშვილმა აღნიშნა, შესაძლოა რიგ შემთხვევაში ტესტირების პერიოდის შეზღუდვა უკავშირდებოდეს იმ პერსონალის რესურსს, ვინც ტესტისთვის ნაცხს იღებს.

„საუბარია, რომ ტესტების რაოდენობა თავდება და ყველა, ვისაც უნდა სწრაფი ტესტის გაკეთება ვერ ახერხებს. გასათვალისწინებელია იმ ადამიანების დატვირთვა, ვინც მუშაობენ ტესტებისთვის ნაცხის აღების რეჟიმში. მათ მუშაობასაც აქვს ზღვარი და ხშირ შემთხვევაში, ტესტირების პროცესი გარკვეული პერიოდით ადამიანური რესურსითაცაა შეზღუდული, შეძლება ტესტირების დასრულების ვადები ამგვარი ფაქტორებითაც იყოს პირობადებული“, - აღნიშნა ზახაშვილმა.

ამასთან ამირან გამყრელიძის ინფორმაციით, განიხილება ე.წ. საველე ჰოსპიტლების იდეა, მაგრამ ამ ეტაპზე არასაველე საწოლების მობილიზება ხდება.

“დღეს საკოორდინაციო საბჭოს სხდომაზე ჯანდაცვის მინისტრმა განაცხადა, რომ მობილიზირებულია დაახლობით 5 500-მდე საწოლი. დღევანდელი რიცხვით საავადმყოფოებში 4 751 პაციენტი წევრს და ყოველდღიულად ხდება საწოლფონდის მობილიზება, რომელიც ამ თვის ბოლომდე 8 500-მდე უნდა ავიდეს. თუ 8 500 საკმარისი არ იქნა, მაშინ არის გეგმა “ბ“, რომელიც დიდი სხვა სივრცეების მობილიზებას გულისხმობს, მათ შორის დავარქმევთ ამას საველე ჰოსპიტალს თუ დიდ სივრცეებს, სადაც შეიძლება დამატებითი ადგილები იყოს გამონახული, რათა პაციენტებს ჰოსპიტალური დახმარება მიეწოდოთ“, - განაცხადა ამირან გამყრელიძემ.

დაავადებათა კონტროლის ცენტრის ხელმძღვანელის განცხადებით, ერთ მილიონ მოსახლეზე, აშშ-ში, კორონავირუსით ინფიცირების მაჩვენებელი, 33 ათასს შეადგენს, საქართველოში კი 19 681-ს, თუმცა, მდგომარეობა ძალიან საყურადღებოა.

„მდგომარეობა ძალიან საყურადღებოა და რთულია, ეპიდემია ქვეყანაში ფართო მასშტაბით ვრცელდება. ყოველდღიურად მზარდია მონაცემები, ის უკვე დიდი ხანია 4-ნიშნა ციფრით განისაზღვრება. რა თქმა უნდა, ეს ძალიან საყურადღებოა. რატომ მივედით აქამდე? აქ არის რა თქმა უნდა, გარკვეული ხარვეზები, რაც ჩვენს სამსახურსაც გვქონდა და ასევე ჩვენი მოსახლეობის თვითდაჯერება. ჩვენ, განსაკუთრებით ივნისს-ივლისში, შევიქმენით ილუზია, რომ დავამარცხეთ კორონავირუსული ინფექცია და რეგულაციები აღარ გვჭირდებოდა, მიუხედავად იმისა, რომ სულ ვსაუბრობდით იმაზე, რომ შემოდგომა იქნებოდა რთული და რომ არ შეიძლებოდა ამ ილუზიის შექმნა.

კორონავირუსული ინფექცია არ დაუმარცხებია საქართველოს და ის მარტო აღებული ვერც დაამარცხებს, მას დაამარცხებს მთლიანად მსოფლიო და ეს იქნება კიდევ სულ მცირე ერთი წელიწადი. ერთ-ერთი მიზეზი იყო ამ ყველაფრის ეს მოშვება, რეგულაციების არ დაცვა. ეს ზაფხულის ბოლოს აჭარაში დაიწყო და გავრცელდა მთელს ქვეყანაში. ნუ ვიტყვით ვინ არის დამნაშავე და ვინ, სად, რა შეცდომა დაუშვა ან დაუშვა თუ არა. ფაქტია, ეპიდემია ქვეყანაში სერიოზულ მასშტაბებს იღებს და ყველამ ერთად უნდა ვიმოქმედოთ. ერთი ცალკე აღებული ღონისძიება ეპიდემიას ვერ შეაჩერებს, ეს უნდა იყოს კომპლექსური“, - განაცხადა ამირან გამყრელიძემ.