"პარლამენტში არშესვლის შემთხვევაში, პარტიებისთვის დაფინანსების შეწყვეტაზე საუბარი რიტორიკაა.. იქნებ შეაშინონ და პარლამენტში შეათრიონ" - ხუხაშვილი

პარლამენტში არშესვლის შემთხვევაში, პარტიებისთვის სახელმწიფო დაფინანსების შეწყვეტაზე საუბარი არის პოლიტიკური რიტორიკა, რომელსაც ერთადერთი ამოცანა აქვს - იქნებ ვიღაც შეაშინონ და როგორმე პარლამენტში შეათრიონ, - ამის შესახებ "ინტერპრესნიუსს" პოლიტოლოგმა გია ხუხაშვილმა განუცხადა.

ხუხაშვილის შეფასებით, ხელისუფლება ახლა პარტიებზე ზეწოლისთვის სუსტი წერტილების მოძებნას ცდილობს, რომელთა შორისაა ფინანსური შეზღუდვა. მისივე თქმით, შეიძლება ასევე ადგილი გქონდეს პირიქით მოქმედებებსაც - მაგალითად, პარტიის წარმომადგენლების ჩრდილოვანი ფულით დაინტერესებას, ასევე ოჯახის წევრით შანტაჟს და სხვა მეთოდების გამოყენებას.

ხუხაშვილის განცხადებით, ხელისუფლებას კარგად ესმის, რომ ის ქვეყანას სტერილურად ვერ მართავს, ლეგიტიმაცია არ ექნება და ადრე თუ გვიან, იმ ტიპის მძიმე კრიზისი მოხდება, რაც მათ წალეკავს.

"განცხადებები სახელმწიფო დაფინანსების შეწყვეტაზე ერთადერთი მიზნით კეთდება - მოძებნონ ბერკეტები იმისა, რომ პარლამენტში ვიღაც შეათრიონ. მიზანი არის, რომ ზოგი აცდუნონ, ზოგი -შეაშინონ, ზოგს რაღაცაზე მოელეპარაკონ. ერთია ის, რაც საჯაროდ კეთდება და მეორე, რა მოქმედებებს ატარებენ კულისებში, სპეცსამსახურების მეშვეობით. ჯერჯერობით სუსტი და არაფრის მომცემი მუქარების ამოცანა არის ერთადერთი - პარლამენტში როგორმე ვიღაც შეათრიონ! კი ამბობენ, რომ ყველაფერი წესრიგშია და 90-წევრიანი პარლამენტი მშვენივრად იმუშავებს, მაგრამ ჩვენ ხომ გვესმის, რომ ეს იმის ტოლფასია უმაღლეს ლიგაში ფეხმოტეხილი ფეხბურთელები ათამაშო. პარლამენტი ამ სახით ლეგიტიმური ვერ იქნება. ხელისუფლებამ ეს მშვენივრად იცის, ამის ეშინია და ცდილობს, ასეთი მეთოდებით ვიღაც შეიტყუოს“, - განუცხადა “ინტერპრესნიუსს“ გია ხუხაშვილმა.

მისივე თქმით, "ქართული ოცნების" ხელისფლებამ “ყველა მანკიერება, ყველა მამაძაღლობა შეითვისა, რაც უახლესი ისტორიის განმავლობაში დაგროვდა“.

მისივე აზრით, თუკი ოპოზიცია მონოლითურობას შეინარჩუნებს და ერთ გზაზე სიარულს განაგრძობს, პარლამენტში როგორც შესვლის, ასევე არშესვლის შემთხვევაში, პოლიტიკური კრიზისი და რიგგარეშე არჩევნები გარდაუვალი იქნება.

ამასთან, “ქართული ოცნების“ აღმასრულებელი მდივნის ირაკლი კობახიძის განცხადებით, თუ პარტია მანდატებზე უარს ამბობს, მან სახელმწიფოსგან პარტიის დაფინანსებაც არ უნდა მიიღოს. როგორც კობახიძემ ჟურნალისტებს განუცხადა, კარგი იქნება ამასთან დაკავშირებით კანონმდებლობაში ცვლილების შეტანა.