"ბათუმში კორონავირუსი ხელოვნურად გაავრცელეს... დაავადებული ქვეყნიდან შემოიყვანეს დიდი რაოდენობით ე.წ დამსვენებლები" - სააკაშვილი

ჩვენ დღეს არ გვაქვს ბრძოლის შეჩერების უფლება, ბრძოლის დამთავრება და გამარჯვება არის ძალიან ახლოს, ერთი ხელის გაწვდენაზე, ამაში ვარ აბსოლუტურად დარწმუნებული, - ასე მიმართა საქართველოს მესამე პრეზიდენტმა მიხეილ სააკაშვილმა ბათუმში გაერთიანებული ოპოზიციის პრეზენტაციაზე შეკრებილ მხარდამჭერებს.

სააკაშვილის თქმით, „საქართველოში აუცილებლად გათენდება, დაინგრევა ტყუილის კოშკები და საქართველო დაიწყებს ისევ აღმშენებლობას“.

„ჩემო განსაკუთრებულო ხალხო, ვერ წარმოიდგენთ როგორ მადგება ცრემლები, როდესაც ვუყურებ ჩვენს სიამაყეს, ჩვენს ბათუმს, ჩემი, ლევან ვარშალომიძის და თითოეული თქვენგანის ცხოვრების ერთ-ერთ მთავარ მიღწევას, როცა ვუყურებ იმ აღმშენებლობას, რომელიც ჰქონდა საქართველოს და განაცვიფრა მთელი მსოფლიო. მე მთელი მსოფლიო მაქვს მოვლილი, ძალიან ბევრი ქვეყანა მაქვს ნანახი, შემოვლილი მაქვს მთელი შავი ზღვისპირეთი, ვმართავდი შავი ზღვისპირეთს მეორე მხარეს, ოდესის ოლქს და ძალიან ბევრ სხვა ადგილას ვარ ნამყოფი და არაფერი არ არის ბათუმის ტოლი. არავის არ გაუკეთებია ასეთი დიდი აღმშენებლობა, არავის არ მიუღწევია ასეთი წარმატებისთვის, როგორც ჩვენ მივაღწიეთ იმ რამდენიმე ისტორიულ წელიწადში. მე მინდა გითხრათ, რომ ეს ყველაფერი არის მხოლოდ დასაწყისი.

მე ძალიან ვამაყობ თქვენით, რომ ერთ მუშტად ხართ შეკრული. ჩვენ არ გვაქვს ხელების ჩამოშვების დრო, ბევრი ჩვენი ადამიანის გამო, რომელიც დაგვაკლდა დღეს, რომელიც დაიჩაგრა, რომელმაც ყველაფერი გასწირა იმისათვის, რომ საქართველო დამდგარიყო ისევ ფეხზე. ჩვენ დღეს არ გვაქვს უფლება ბრძოლის შეჩერების, ბრძოლის დამთავრება არის სულ ახლოს, გამარჯვება არის ძალიან ახლოს, ერთი ხელის გაწვდენაზე, ამაში ვარ აბსოლუტურად დარწმუნებული. ცოტა კიდევ მოთმინება, ცოტა კიდევ მიწოლა, ცოტა კიდევ გაძლება, ცოტა მეტი ერთიანობა, ცოტა მეტი შეტევითობა და სულ რამდენიმე დღეში საქართველო განთავისუფლდება ამ კოშმარისგან. საქართველოში აუცილებლად გათენდება, დაინგრევა ტყუილის კოშკები და საქართველო დაიწყებს ისევ აღმშენებლობას, განვითარებას და ისევ წავა წინ, მე ამაში ვარ აბსოლუტურად დარწმუნებული“, - განაცხადა სააკაშვილმა.

მისივე თქმით, ბათუმში კორონავირუსი ხელოვნურად გაავრცელეს.

„დღეს ჩვენ გვექმურება ძალიან მძიმე დაავადება, რომელიც აბსოლუტურად ხელოვნურად გაავრცელეს ბათუმში, როდესაც ყველაზე დაავადებული ქვეყნიდან ხელოვნურად შემოიყვანეს დიდი რაოდენობით ე.წ დამსვენებლები. ჩვენ გვემუქრება ჩვენი ჯანმრთელობის განადგურება, ტურისტული ინდიუსტრიის, ჩვენი ეკონომიკის, თითოეული თქვენგანის კეთილდღეობის განადგურება, მაგრამ ყველაფერი ეს შემობრუნდება 31 ოქტომბერს იმიტომ, რომ ჩვენ გვაქვს ზუსტი გეგმა. თქვენი წარმომადგენელი საქართველოს პარლამენტში იქნება ლევან ვარშალომიძე, ადამიანი, რომელიც აქამდე იყო უკრაინის ერთ-ერთი ყველაზე მნიშვნელოვანი თანამდებობის პირი.

მან მიატოვა ეს ყველაფერი იმისათვის, რომ დაუბრუნდეს მშობლიურ ადგილს და დაასრულოს ის პროექტი, რომელიც ჩვენ ყველამ ერთად დავიწყეთ. გავა 500 წელი და ყველას ემახსოვრება, რომ ამ ხალხმა, ლევან ვარშალომიძემ და თითოეულმა თქვენგანმა შექმნა აჭარის ის სასწაული, რომელმაც გააოცა მთელი მსოფლიო“, - განაცხადა სააკაშვილმა.