"აქაური სომხები არსად წავლენ, სხვა გაჭირვებულებს დააფინანსებენ და გაუშვებენ" - ოკუპირებული აფხაზეთიდან ყარაბაღში მოხალისეები მიდიან

ოკუპირებულ აფხაზეთში ყარაბაღში მოხალისედ წასასვლელად ემზადებიან, მიუხედავად იმისა, რომ ადგილობრივმა ე.წ. პარლამენტმა განაცხადა, რომ "სოხუმმა ამ კონფლიქტში ნეიტრალური პოზიცია უნდა დაიჭიროს და მხარეებს ვითარების დარეგულირებისკენ მოუწოდა..."

მათ მიმართვას აფხაზურ საზოგადოებაში განსხვავებული მოსაზრებები მოჰყვა.

რამდენიმე რადიკალური პოზიციით ცნობილმა აფხაზურმა პარტიამ, მათ შორის "არუამ", განცხადებით მიმართა ბჟანია-ანქვაბის გუნდს, უფრო მკაფიო პოზიცია ჰქონდეს მოძმე არწახის რესპუბლიკის (მთიანი ყარაბაღის რეგიონი) და აზერბაიჯანის აგრესიული ქმედებები დაგმოს. ასევე, აფხაზეთის საზოგადოებრივ-პოლიტიკურ ორგანიზაციებს მოვუწოდებთ გაერთიანდნენ არწახის დასახმარებლად და ადგილობრივი თავისუფლებისა და დამოუკიდებლობისთვის მებრძოლი ხალხის დასახმარებლად გარკვეული ზომები დავგეგმოთ. ასევე აფხაზეთში არსებულ სომხურ დიასპორას მოვუწოდებთ, გაემგზავროს მათ დასახმარებლად..." - წერს "არუას" წარმომადგენლობა.

დაახლოებით მსგავს მიმართვას ავრცელებს "ამცახარაც".

"გვახსოვს და ვაფასებთ სომეხი ძმების დახმარებას აფხაზეთის ომში... ბევრმა მათგანმა საბრძოლო ჯილდოც დაიმსახურა და აფხაზეთის ეროვნული გმირია, ბევრმა ჭრილობაც მიიღო..." - წერს "ამცახარა", თუმცა, მოხალისეობისკენ მოწოდება მათ განცხადებაში არ არის.

აფხაზეთის სომხურ დიასპორაში 42 000-მდე ადამიანი ირიცხება. მათ სოციალურ გვერდზე გააკეთეს მიმართვა, რომ იგეგმება სააკორდინაციო საბჭოს შექმნა, "რათა პირველ ეტაპზე არცახში ჰუმანიტარული დახმარება მაინც გაიგზავნოს..."

სომხური დიასპორის ხელმძღვანელი გალუს ტრაპიზონიანი მოსახლეობას მოუწოდებს სოხუმის მოედანზე მოიტანოს ყველანაირი დახმარება: მედიკამენტები, პირველადი მოხმარების ნივთები, არამალფუჭებადი საკვები, შაქარი... ვისაც რა შეუძლია და იქვე მდგარ მანქანის საბარგულში ჩააწყონ. სხვების თქმით, გახსნილი ანგარიში, სადაც მსურველებს თანხის ჩარიხვა შეუძლიათ.

რუსული გამოცემა EADaily-ის საიტის თანამშრომლის ცნობით, მაშინ, როდესაც ის აეროპორტში ერევანი-სოჭის მარშრუტს ელოდებოდა, ახალგაზრდა მოხალისეები შენიშნა, საძილე ტომრებით ზურგზე... "მათთან საუბრის საშუალება მომეცა და მითხრეს, რომ აფხაზეთში დაბადებულ-გაზრდილები არიან, ზოგს მათგანს 90-იან წლების ომში მოუწია მონაწილეობა, ზოგს - არა, თუმცა, სამართალდამცვალ ორგანოებში მუშაობენ და იარაღთან ურთერთობის გამოცდილება აქვთ. ერთ-ერთმა მითხრა, რომ თავისი ხალხის მხარდასაჭერად მიდის..." - წერს ekhokavkaza.com.

ამ ინიციატივას აფხაზ ინტერნეტმომხმარებელში აზრთა სხვადასხვაობა მოჰყვა, ნაწილის თქმით, ძალიან სწორია, რომ სომხები თავიანთი ხალხის დასახმარებლად მიდიან, თუმცა, მიუღებელია, რომ ისინი ამისკენ აფხაზებსაც მოუწოდებენ, იმ მოტივით, რომ თავად იბრძოდნენ აფხაზეთში...

"აქ ბიზნესების მართვას, წავიდნენ და მიეხმარონ თავიანთ ხალხს, მაგრამ ესენი არ წავლენ, სხვა, გაჭირვებულებს დაანამუსებენ, დააფინანსებენ და გაუშვებენ, რომ დიასპორის თვალში ცუდი ტიპები არ გამოვიდნენ, - აი, ჩვენც ძალიან დიდ საქმეს ვაკეთებთო... არ გამიგია, რომელიმე ბიზნესმენს გაეშვა თავისი შვილი, თუმცა, სხვებს მისცეს ფული. ეს არ არის ჩვენი ომი, არ დაგავიწყდეთ, რომ აზერბიაჯანს ეხმარება თურქეთი, იქ კი ჩვენი ათასობით აფხაზი ცხოვრობს" - წერს ინტერნეტმომხარებელი მაია ბეია.

"საქმე ძალიან მარტივად მოგვარდებოდა, აზერბაიჯანს სომხეთმა ის შვიდი რაიონი დაუბრუნოს და დანარჩენის დამოუკიდებლობა აღიაროს, მაგრამ არ სურთ და ომს აგრძელებენ, მიუხედავად იმისა, რომ უზარმაზარი დანაკარგი აქვთ, არადა, აზერბაიჯანს მხოლოდ ის შვიდი რაიონი სურს, თავისი 150 000 ათასი მოსახლით, მერე რაც გინდა ის ქენიო, ეუბნებიან, მაგრამ ამათ, არა, ყველაფერი მიწასთან უნდა გავასწოროთო და ორივე მხარე ყველანაირი კალიბრის იარაღიდან ისვრის", - წერს ალიკა ვოუბა.

"ომმა კარგი არაფერი მოგვიტანა. იმედია, ჩვენი ახალგაზრდები, რომელთაც ომი მხოლოდ მოყოლით იციან, არ წავლენ, თორემ მივიღებთ ახალ გაუბედურებულ ადამიანებს, ოჯახებს, ომის სინდრომის განახლებას... შემდეგ, იქ ნამყოფი სომხები დაბრუნდებიან ფსიქიკა და ჯანმრთელობა მომსპარი, ნაწილი, ალბათ ნარკოდამოკიდებულებიც და აქ დარჩენილებს დაერევიან, რომლებიც მათ მორალურ მხარდაჭერას უცხადებდნენ. მათი მკურნალობის სახსრები ჩვენ აღარ გვექნება, პატარა აფხაზეთისთვის, ეს ყველაფერი მძიმე დარტყმაა, მით უფრო, რომ მათ აუცილებლად გაჰყვებიან ჩვენი ბიჭებიც... უკვე არის ამის სიგნალები..." - მიაჩნია ლია კოკოსკერიას.