რომელ უნივერსიტეტებში ჩააბარეს და რა პროფესიები აირჩიეს ცნობილი ქართველების შვილებმა

წელს, ერთიანი ეროვნული გამოცდების ციებ-ცხელებამ პანდემიის ფონზე ჩაიარა. აბიტურიენტებს განსხვავებულ პირობებში მოუწიათ გამოცდების ჩაბარება და იყო იმის საშიშროებაც, რომ სტუდენტები ახალ სასწავლო წელს დისტანციური სწავლებით დაიწყებდნენ.

საბედნიეროდ, ჯერჯერობით ბოლო რეგულაციებით, სწავლა სკოლებსა და უნივერსიტეტებში ოფიციალურად 15 სექტემბერს იწყება...

გუშინ შეფასებისა და გამოცდების ეროვნულმა ცენტრმა ჩარიცხვებისა და გრანტის განაწილების შესახებ ინფორმაცია გამოაქვეყნა. 2020 წელს უმაღლესში 29 614 აბიტურიენტი გააგრძელებს სწავლას.

ცნობილი ქართველები, რომელთა შვილებიც წელს სტუდენტები გახდნენ, სოციალური ქსელის საშუალებით გამოხატავენ ემოციებს.

პიარ-მენეჯერ ხატია შამუგიასა და მომღერალ გურამ ლომიძის საერთო შვილი, ნიკა ლომიძე თბილისის სახელმწიფო უნივერსიტეტის სტუდენტი გახდა და ფსიქოლოგიის ფაკულტეტზე ჩაირიცხა. ბედნიერი დედა ემოციებს ვერ მალავდა სოციალურ ქსელში მილოცვებს იღებდა.

სტუდენტი გახდა წელს ჟურნალისტ დიანა ტრაპაიძისა და პროდიუსერ ჯონი კალანდაძის უფროსი შვილი. ელენე კალანდაძე თბილისის სახელმწიფო უნივერსიტეტში ეკოლოგიას შეისწავლის.

სტუდენტი გახდა ასევე მომღერალ მაკა ზამბახიძის ერთადერთი ქალიშვილი სალომე ჩიტაძე, რომელმაც ტექნიკურ უნივერსიტეტში აგრარული ტექნოლოგიების ფაკულტეტზე ჩააბარა.

სალომე ჩიტაძე დედის მსგავსად მომღერალია და მას უკვე საკუთარი ბენდი ჰყავს, რომლის პროდიუსერიც მამულიჩა, იგივე კახა მამულაშვილია. სალომე ზაფხულის განმავლობაში აჭარაში კონცერტებზე ლელა წურწუმიასთან ერთადაც გამოდიოდა.

ირაკლი ოქრუაშვილის ქალიშვილი მია-მარიამ ოქრუაშვილი სასწავლებლად საფრანგეთში გაემგზავრება. ამის შესახებ პოლიტიკოსმა სოციალურ ქსელში დაწერა:

"29 000 სტუდენტის მშობელი იყო გუშინ განსაკუთრებით გახარებული.

ჩემი სიხარული შიშნარევი იყო. პარიზის ორმა უნივერსიტეტმა Diderot და ESSEC-მა სრული დაფინანსებით ჩარიცხეს ჩემი უფროსი შვილი.

17 წლისას ვუშვებ მარტოს კონკურენციის და გლობალიზაციის მორევში და გაცურავს თუ არა მარტო, ამის გამო იყო ჩემი სიხარული შიშნარევი. გაცურავს ეჭვი არ მეპარება.

ყველა სტუდენტს წარმატებები მინდა ვუსურვო. განათლებაა ის ერთადერთი, რაც ჩვენს ქვეყანას ჭაობიდან ამოიყვანს...“ - წერს ოქრუაშვილი.

სტუდენტის მამაა უკვე დეპუტატი ბექა ოდიშარია. პოლიტიკოსის ცოლი, ცნობილი PR და მარკეტინგული კომუნიკაციების სპეციალისტი, მაკუნა გამცემლიძე უფროს შვილს, ლაშა ოდიშარიას სტუდენტობას ულოცავს და სოციალურ ქსელში წერს:

"მეც გავხდი სტუდენტის დედა...1.თბილისის ივანე ჯავახიშვილის სახელობის უნივერსიტეტი - ბიზნეს ადმინისტრირება.2. Saint Louis University - სამოქალაქო ინჟინერია.

მისი გადაწყვეტილებით და მოპოვებული დაფინანსებით, დამსახურებულად, სამოქალაქო ინჟინერიის მიმართულებით მიდის ამერიკულ უნივერსიტეტში - მადრიდის კამპუსში.

პირველი სემესტრი ონლაინ აიღო, ბექას ვერ დავტოვებო...

რთული მაგრამ ძალიან საინტერესო წლები დაეწყოთ ჩვენს სტუდენტ შვილებს. შემართებას, სირთულეების მარტივად გადალახვას და დიდ წარმატებას ვუსურვებ ყველა ჩვენს შვილს!კარგი თაობა მოდის, ძალიან კარგი...“ - წერს მაკუნა.

ცნობილია, რომ ბექა ოდიშარია "ქართული ოცნების" სიით მაჟორიტარად აგრძელებს ბრძოლას, ასევე ცოტა ხნის წინ პოლიტიკოსს მამა გარდაეცვალა.