"დაინახეს, რომ აქ შემოვიდა, მოაბრუნა მანქანა და წავიდა ქვემოთ" - 23 წლის თამარ ბაჩალიაშვილს ამ დრომდე უშედეგოდ ეძებენ

უკვე მეოთხე დღეა დაკარგულ 23 წლის თამარ ბაჩალიაშვილს ეძებენ. არსებული ინფორმაციით, გოგონა ბოლოს თეთრიწყაროს მუნიცეპალიტეტის სოფელ გოლთეთში ნახეს, რა დროსაც ის საკუთარი ავტომობილით გადაადგილდებოდა. დღეს ვერც მის ავტომობილს პოულობენ.

გოგონას დედა ამბობს, რომ გოლთეთში არც ნათესავები არ ჰყავთ და იქ არც გოგონას მეგობრები ცხოვრობენ. შესაბამისად, მისთვის უცნობია, რატომ შეიძლებოდა იქ 23 წლის თამარ ბაჩალიაშვილი წასულიყო.

"ჩემთვის შოკისმომგვრელი იყო ეგ რომ იქ აღმოჩნდა. იქ არავინ ჰყავს, გავლილიც არ იყო იქით, არც ფეხით, არც მანქანით. ახლო მეგობარი ან ნათესავი იქ არ გვყავს" - ამბობს თეონა თამაზაშვილი "ტვ პირველთან" საუბრისას.

დღეს პოლიციამ სოფელ გოლთეთის მაცხოვრებლები გამოკითხა. ისინი ადასტურებენ, რომ გოგონას მანქანა დაინახეს.

"დაინახეს, რომ ამ "კრუგში" შემოვიდა, მოაბრუნა მანქანა და წავიდა ქვემოთ. მეორე კრუგია იქით, ჩიხია, იქაც შევიდა, მოაბრუნა მანქანა და სანამ მეზობელი გავიდა, რომ ეკითხა ვინ იყო, უკვე წასული იყო..." - ამბობენ ადგილობრივები.

როგორც AMBEBI.GE-ს შინაგან საქმეთა სამინისტროს პრესსამსახურში განუცხადეს, მომხდარზე ძიება სსკ-ის 143-ე მუხლით მიმდინარეობს, რაც თავისუფლების უკანონო აღკვეთას გულისხმობს.