დრამატული ფოტოები იაპონიიდან, სადაც წყალდიდობამ 20 ადამიანი იმსხვერპლა

იაპონიაში ძლიერი წვიმების შედეგად გამოწვეული წყალდიდობისა და მეწყერის მსხვერპლთა რიცხვი 20-მდე გაიზარდა. როგორც "როიტერსი“ ადგილობრივ ტელევიზიაზე დაყრდნობით წერს, კიდევ 14 ადამიანი დაკარგულად ითვლება.

ძლიერი წვიმა იაპონიის სამხრეთ-დასავლეთ ნაწილში, კაგოშიმას და კუმამოტოს დაატყდა თავს. სტიქიის გამო, 200 000-მდე ადამიანი ევაკუირებულია, ათასობით ოჯახი კი ელექტროენერგიის გარეშეა დარჩენილი.

როგორც BBC წერს, მოხუცთა თავშესაფარში 14 გარდაცვლილის ცხედარი იპოვეს, მას შემდეგ, რაც ახლოს მდებარე მდინარე ადიდდა და შენობები დატბორა.

ქვეყნის პრემიერ-მინისტრმა შინზო აბემ მოსახლეობას მაქსიმალური სიფრთხილის გამოჩენისკენ მოუწოდა. მან დაზარალებულ მხარეში სამაშველო და აღდგენით სამუშაოებში მონაწილეობისთვის 10 000 ჯარისკაცის გაგზავნის განკარგულება გასცა. იაპონიის მეტეოროლოგიური სამსახური ძლიერ წვიმებს კიდევ პროგნოზირებს და მოსახლეობას სიფრთხილისკენ მოუწოდებს.