ესპანეთში გარდაცვლილი ცირა ალიხანაშვილის მეუღლე სამშობლოში დაბრუნდა - "ქართული ფონდი" მასთან ერთად კიდევ 40 მოქალაქეს დაეხმარა

ესპანეთში კორონავირუსით გარდაცვლილი 5 შვილის დედის, ცირა ალიხანაშვილის მეუღლე, მამუკა ნაჭყებია საქართველოში გუშინ დაბრუნდა. იგი 14-დღიან კარანტინს კახეთში, ერთ-ერთ სასტუმროში გაივლის. მისი და ხათო ნაჭყებია AMBEBI.GE-სთან საუბარში ამბობს, რომ ძმის და სხვა ქართველების სამშობლოში დაბრუნება იოანე ბაგრატიონ-მუხრანელის მიერ დაარსებულმა "ქართულმა ფონდმა" უზრუნველყო.

"დაგვიკავშირდა საქართველოს საელჩო და აგვიხსნა, რომ ჩემს ძმას დააფინანსებდა "ქართული ფონდი". საელჩოში ასევე მითხრეს, რომ ბატონ იოანეს სურდა, ჩვენს ოჯახს დახმარებოდა - სასტუმროს თანხა, სადაც ჩემი ძმა უნდა გაჩერებულიყო, ბილეთების საფასური, ყველაფერი ბატონმა იოანე ბაგრატიონმა დააფინანსა, რისთვისაც ჩემი და ჩემი ოჯახის სახელით უდიდეს მადლობას ვუხდი!

ჩემი ძმა ოჯახს 14-დღიანი კარანტინის შემდეგ დაუბრუნდება. სამწუხაროდ, მარტო მივა შვილებთან, დედის გარეშე და ეს იქნება უდიდესი ტკივილი... საქართველოს საელჩოს უდიდესი მადლობა მინდა გადავუხადო. პირველივე წუთიდან დღემდე, ჩვენს გვერდით არიან და გვირეკავენ, გვამხნევებენ და იმედს გვაძლევენ. მირეკავს პირადად ელჩი, მე ამ სიკეთეს ვერასდროს ვერ დავივიწყებ", - ამბობს გარდაცვლილი ცირა ალიხანაშვილის მული.

იოანე ბაგრატიონ-მუხრანელის მიერ დაარსებული საქველმოქმედო ორგანიზაცია "ქართული ფონდი" ორ კვირაზე მეტია, პანდემიის გამო საზღვარგარეთ ფინანსური შესაძლებლობების გარეშე დარჩენილი ქართველების დასახმარებლად კამპანიას აწარმოებს თანხების შეგროვების მიზნით. „ქართულმა ფონდმა“ საქართველოს 40 მოქალაქეს გაუწია სხვადასხვა დახმარება.

ფონდის საქმიანობის შესახებ დეტალებზე სასაუბროდ AMBEBI.GE იოანე ბაგრატიონ-მუხრანელის მეუღლეს, ქრისტინე ბაგრატიონ-მუხრანელს დაუკავშირდა:

"ახლა სწორედ ის დროა, როდესაც ჩვენ უნდა ვაგრძნობინოთ მხარდაჭერა საზღვარგარეთ მყოფ ჩვენს თანამემამულეებს. ჩვენი კამპანია დავიწყეთ ჰეშთეგით #დავეხმაროთდაბრუნებაში - სახელმწიფოს მიერ ოფიციალურად დაანონსებულ ჩარტერულ რეისებზე „ქართული ფონდი“ თვითმფრინავის ბილეთებს უფინანსებს საქართველოს იმ მოქალაქეებს, რომლებსაც არანაირი ფინანსური სახსრები არ აქვთ სამშობლოში დასაბრუნებლად.

ამავდროულად, მოგეხსენებათ, რომ პანდემიის შედეგად თითქმის ყველა ქვეყანაში საგანგებო მდგომარეობაა გამოცხადებული და ადამიანებს ქვეყნების შიდა ტერიტორიაზეც უჭირთ გადაადგილება. შესაბამისად, ამ პერიოდში ჩვენი მოქალაქეებისთვის ადგილზე დახმარების გაწევაც გახდა საჭირო, რაც გულისხმობს მათი საკვებით და საცხოვრებლით უზრუნველყოფას.

საგარეო საქმეთა სამინისტროსთან კოორდინირების შემდეგ, ჩვენ მივიღეთ რეკომენდაცია, რომ საკვებით და საცხოვრებლით დახმარება გაგვეწია ესპანეთში მყოფი ჩვენი მოქალაქეებისთვის. მოგეხსენებათ, ესპანეთში დიდი რაოდენობით ჩვენი მოქალაქე ცხოვრობს. გარდა ამისა, გადაწყვეტილება მივიღეთ კიდევ 3 მნიშვნელოვანი ფაქტორის გათვალისწინებით:

• ესპანეთში კორონავირუსით დაინფიცირების უმაღლესი მაჩვენებელია;
• პანდემიის გამო ესპანეთი წითელ ზონაშია მოქცეული;
• სამწუხაროდ, საქართველოს 4 ლეტალური შედეგი საზღვარგარეთ აქვს სწორედ ესპანეთში.

ჩვენმა ფონდმა შეაგროვა 60 000 ლარზე მეტი და ამ თანხის უდიდესი ნაწილი შეადგენს იოანე ბაგრატიონის მეგობრებისა და ახლობლებისგან შემოწირულ სახსრებს. თუმცა, დონორები არიან ისეთი ადამიანებიც, რომლებსაც ჩვენ საერთოდ არ ვიცნობთ. ჩვენ მადლიერი ვართ თითოეული გადმორიცხული ლარისთვის. ამ თანხებს ვანაწილებთ მხოლოდ საქართველოს საგარეო საქმეთა სამინისტროსთან კოორდინირებით.

- რა შემთხვევაში უწევთ დახმარებას ემიგრანტებს? არსებობს ამისთვის რაიმე კრიტერიუმები?

- "ქართული ფონდი" ახდენს თანხების შეგროვებას, რასაც ხარჯავს მხოლოდ საგარეო საქმეთა სამინისტროსთან ინფორმაციის გადამოწმებით და მათი რეკომენდაციის გათვალისწინებით. თვითმფრინავის ბილეთების შემთხვევაში, იმის შემდეგ, რაც ადამიანი დაგვიკავშირდება, შეგროვებულ სრულ ინფორმაციას ვუგზავნით საგარეო საქმეთა სამინისტროს, რათა შევამოწმოთ ამ კონკრეტული ადამიანების სამართლებრივი და სოციალური მდგომარეობა. იმისათვის, რომ არ მოხდეს ისე, ადამიანებს ჩვენ შევუძინოთ ბილეთები და რაიმე მიზეზის გამო ისინი ვერ ჩამოფრინდნენ.

გარდა ამისა, მოწმდება მათი სოციალური მდგომარეობა, რომ არ მოხდეს ფონდის რესურსების არამიზნობრივი გამოყენება და ჩვენი დახმარება მიიღონ სწორედ იმ ადამიანებმა, ვისაც ეს ყველაზე მეტად სჭირდება.

რაც შეეხება, საკვებით და საცხოვრებლით უზრუნველყოფას, როგორც ვახსენეთ მხოლოდ ესპანეთზე გვაქვს აქცენტი ჩამოთვლილი მიზეზების გამო და ფონდის ლიმიტირებული სახსრების შესაბამისად. ჩვენი სახელმწიფო ძალიან ბევრს აკეთებს ჩვენი მოქალაქეებისთვის, როგორც ქვეყნის შიგნით, ასევე გარეთ.

აღსანიშნავია ჩვენი დიპლომატების მიერ გაწეული შრომა და უდიდესი ყურადღება თითოეული ჩვენი მოქალაქის მიმართ. ჩვენი კამპანიიდან გამომდინარე, განსაკუთრებით მჭიდრო კავშირი გვაქვს ელჩთან ბატონ ილია გიორგაძესთან. გვინდა მადლობა გადავუხადოთ ეფექტური თანამშრომლობისთვის. ამ რთულ დროს ასევე არანაკლებ მნიშვნელოვანია, თითოეული ჩვენთაგანის ჩართულობა და მცირედი წვლილის შეტანა.

- რამდენ ადამიანს დაეხმარა „ქართული ფონდი“ ამ დრომდე?

- მარტის შუა რიცხვებიდან დავიწყეთ ეს კამპანია და დღემდე ჩვენმა ფონდმა შემომწირველების წყალობით დახმარება გაუწია საქართველოს 40 მოქალაქეს. სხვადასხვა ადამიანებმა მიიღეს დახმარება შესაბამისი საჭიროებების გათვალისწინებით, რაც გულისხმობს თვითმფრინავის ბილეთების შეძენას, საკვებით და საცხოვრებლით უზრუნველყოფას.

მინდა აღვნიშნო, რომ საზღვარგარეთ მყოფმა ჩვენმა მოქალაქეებმა საოცარი სოლიდარობა გამოხატეს ერთმანეთის მიმართ, მოგიყვებით რამდენიმე მაგალითს:

ესპანეთში ტურისტული მიზნით იყო წასული ახალგაზრდა ცოლ-ქმარი. პანდემიის შედეგად სწრაფად განვითარებული მოვლენების გამო, რეისები გაუქმდა, ვერ მოასწრეს უკან დაბრუნება და დარჩნენ ესპანეთში. მათ მიმართეს საქართველოს საელჩოს ესპანეთში, საელჩო დაუკავშირდა „ქართულ ფონდს“ და ჩვენ დაუყოვნებლივ გამოვუცხადეთ მხარდაჭერა საკვებით და საცხოვრებლით დაკმაყოფილების შესახებ.

შემდეგ ამ წყვილმა საოცარი სულგრძელობა გამოიჩინა და თვითონ განაცხადეს უარი საცხოვრებლით დაკმაყოფილებაზე, ფონდიდან მხოლოდ საკვებით დახმარება მიიღეს. იმ მიზნით, რომ მათვე გამოეჩინათ სოლიდარობა სხვა ადამიანების მიმართ, გვითხრეს, რომ მათთვის განკუთვნილი საცხოვრებლის თანხები მიგვემართა სხვა ადამიანების დასახმარებლად და თავისი სურვილით, ვინაიდან ესპანეთის სანაპიროზე კარგი ამინდებია კარავში იცხოვრებდნენ, ვიდრე ფრენა არ დაინიშნებოდა.

ასევე გვქონდა ისეთი შემთხვევები, როცა მშობლები მზად იყვნენ დარჩენილიყვნენ, ოღონდ შვილებისთვის მიეღოთ დაფინანსება, ბუნებრივია ჩვენ მათ ყველას თანაბრად გავუწიეთ დახმარება. ასევე აღსანიშნავია ის შემთხვევებიც, როცა ადამიანი გამოხატავს სურვილს, დაუთმოს სხვას, ვისაც, მისი შეხედულებით, მასზე სწრაფად ესაჭიროება ქვეყანაში დაბრუნება.

ამ პანდემიამ ყველა გაგვაერთიანა ერთმანეთის მხარდაჭერად. ამჯერად, ჩვენი ფონდის მიზანია, რომ ქართულმა საზოგადოებამ მხარდაჭერა აგრძნობინოს, საზღვარგარეთ დარჩენილ ჩვენს თანამემამულეებს. ფონდის საქმიანობა მიმდინარეობს სრულიად გამჭვირვალე პროცესით, ყველა ინფორმაცია განთავსებულია ფონდის ოფიციალურ მედია პლატფორმებზე.

- როგორ უნდა ჩაერთონ საქველმოქმედო კამპანიაში ის ადამიანები, რომლებსაც სურთ დახმარება გაუწიონ ქართველ ემიგრანტებს?

-„ქართული ფონდი“ შექმნილია, სწორედ იმ მიზნით, რომ ჩვენი მოქალაქეები გაერთიანდნენ ერთმანეთის დასახმარებლად. საქველმოქმედო საქმიანობაში ჩართვისთვის 2 გზა არსებობს: დონაციის განხორციელება და ამ კამპანიის შესახებ ინფორმაციის გავრცელება.

ჩვენ შემოგვიერთდა ბევრი ცნობილი სახე, როგორც საქართველოში, ასევე მის ფარგლებს გარეთ. დონაციის განხორციელების გარდა, ჩაგვიწერეს მხარდამჭერი ვიდეოები, რისთვისაც თითოეულ მათგანს მადლობას ვუხდით. ასევე, ჩვენს კამპანიას შემოუერთდა ხელოვანი ადამიანები მსოფლიოს სხვადასხვა კუთხიდან, მალე მათ მიერ ჩაწერილ ვიდეოებსაც შემოგთავაზებთ.

თქვენი საშუალებით, მინდა მოვუწოდო ყველას დონაციის განხორციელებისკენ, რათა ერთიანი ძალებით შევძლოთ ფინანსური შესაძლებლობების გარეშე საზღვარგარეთ დარჩენილი რაც შეიძლება მეტი ჩვენი მოქალაქის დახმარება.

იხილეთ მეტი "ქართული ფონდის" "ფეისბუქის" გვერდზე

თანხის ჩარისხვა შეგიძლიათ ანგარიშის ნომრებზე:

• საქართველოს ბანკი, SWIFT: BAGAGE22, ქართული და უცხოური ვალუტა

GE26BG0000000712903200

• თიბისი ბანკი, SWIFT: TBCBGE22, ქართული ლარი

GE16TB7919436080100008

უცხოური ვალუტა

GE55TB7919436180100001