"პრეზიდენტს თავად პატრიარქმა სთხოვა, გიორგი მამალაძე არ შეეწყალებინა" - როგორ აფასებენ სალომე ზურაბიშვილის გადაწყვეტილებას დეკანოზის ოჯახის წევრები
თავად კათოლიკოს პატრიარქმა, უწმინდესმა და უნეტარესმა ილია II-მ სალომე ზურაბიშვილს პირად საუბრებში უარი უთხრა შეწყალებაზე, - ამის შესახებ მსჯავრდებული დეკანოზის გიორგი მამალაძის ძმამ, თორნიკე მამალაძემ მედიასთან მას შემდეგ განაცხადა, რაც პრეზიდენტმა დეკანოზის შეწყალებაზე უარი თქვა.
მისივე თქმით, პატრიარქმა წმინდა სინოდი და მთელი საზოგადოება მოატყუა და პასუხისმგებლობისგან თავის არიდება სცადა.
„რა თქმა უნდა, სალომე ზურაბიშვილმა რაც თქვა, ეს დამოუკიდებელი გადაწყვეტილება არ არის. წინა დღეებში ის პატრიარქს შეხვდა და მე მაქვს ინფორმაცია, თუმცა ამ წუთამდე თავს ვიკავებდი ამ კომენტარისგან, რომ თავად კათოლიკოს-პატრიარქმა, უწმინდესმა და უნეტარესმა ილია მეორემ სალომე ზურაბიშვილს პირად საუბრებში უარი უთხრა. გამომდინარე აქედან, წმინდა სინოდის მიერ მიღებული გადაწყვეტილება, რომ პრეზიდენტისადმი შუამდგომლობა გაეგზავნათ, იყო ფარსი, კათოლიკოს პატრიარქმა წმინდა სინოდის წევრებიც კი მოატყუა და თითოეულ მათგანს ლაფი დაასხა თავზე, მან მოატყუა მთელი საზოგადოება და ეცადა პასუხისმგებლობიდან გათავისუფლებას და დადგეს სპექტაკლი, რა სპექტაკლშიც მიიღეს მონაწილეობა კათოლიკოს პატრიარქმა და პრეზიდენტმა“, - განაცხადა თორნიკე მამალაძემ.
"ჩვენმა პრეზიდენტმა ვერ გაუძლო ზეწოლას, რომ ამბობს პატრიარქზე თავდასხმა იგეგმებოდაო, სად უწერიათ პატრიარქზე თავდასხმა?! - განაცხადა დეკანოზ გიორგი მამალაძის მამამ ავთანდილ მამალაძემ. პრეზიდენტის მიერ მიღებულ გადაწყვეტილება დეკანოზ გიორგი მამალაძის მამამ შეაფასა. იგი პრეზიდენტის მიერ მიღებულ გადაწყვეტილებას არ ელოდა.
„ხან ერთს თამაშობენ, ხან - მეორეს. პრეზიდენტზე ზეწოლა მოხდა. საპატრიარქოსა და მთავრობაში დაბუდებული არიან ბობოლა ადამიანები. ეს არის და ეს“, - განაცხადა დეკანოზ გიორგი მამალაძის მამამ.
მისივე შეფასებით, წმინდა სინოდი არაფერს წარმოადგენს.
„ეს დადგმული სპექტაკლია. თითქოს პრეზიდენტს სთხოვეს შეწყალების გადაწყვეტილება თავად მიეღო, რეალურად ეს იყო სპექტაკლი. პრეზიდენტზე ზეწოლა მოხდა“, - განაცხადა ავთანდილ მამალაძემ.
შეგახსენებთ, რომ პრეზიდენტმა მსჯავრდებული დეკანოზის, გიორგი მამალაძის შეწყალებაზე უარი თქვა.
"არ არის ბიძინა ივანიშვილის ნათესავი, რიგითი მოკვდავია" - რას ამბობს ადვოკატი მურად წურწუმიას საქმეზე დაკავებულ ვახტანგ ბურძენიძეზე
"დედაჩემმა ხელი ჰკრა და შეაგინა... არ მახსოვს რამდენჯერ დავარტყი" - მარტვილში 39 წლის მამაკაცის მკვლელობის ფაქტზე დაკავებულს პატიმრობა შეეფარდა
