ვაჟა გაფრინდაშვილი გათავისუფლების შემდეგ, ოჯახთან ერთად (ფოტოები)

ცნობილი ექიმი-ტრავმატოლოგი ვაჟა გაფრინდაშვილი დღეს გათავისუფლდა. რამდენიმე საათის განმავლობაში ის შიდა ქართლის პოლიციის დეპარტამენტში იმყოფებოდა. გაფრინდაშვილმა ჟურნალისტებთან მცირე კომენტარი გააკეთა და მისი გათავისუფლების პროცესში ჩართულ ყველა უწყებას მადლობა კიდევ ერთხელ გადაუხადა.

„ძალიან დიდ მადლობას გიხდით ყველას, მთავრობას, პარლამენტს, შინაგან საქმეთა სამინისტროს, უშიშროებას. ნება მომეცით ცოტა დავწყნარდე და მერე ყველას მოგაწვდით ინფორმაციას.

უდიდეს მადლობას ვუხდი ყველა მეგობარს, ვინც გვერდში მედგა განსაკუთრებით, ჩემს ლამაზ მეუღლესა და ბრწყინვალე შვილებს. რა ინფორმაციასაც მაწვდიდნენ ასე გაერთიანებულად საქართველოს საქმე ვაკეთოთ“,- განაცხადა ვაჟა გაფრინდაშვილმა.

ამის შემდეგ ექიმი პრემიერ-მინისტრ გიორგი გახარიას მრჩეველს ირაკლი ჩიქოვანს შეხვდა. როგორც ჩიქოვანმა აღნიშნა ხელისუფლებას ძალიან ინტენსიური კომუნიკაცია ჰქონდა ვაჟა გაფრინდაშვილის ოჯახთან და მუდმივად აწვდიდა ინფორმაციას იმ მოქმედებების შესახებ, რასაც სახელმწიფო ექიმ ვაჟა გაფრინდაშვილის გასათავისუფლებლად აკეთებდა.

შეხვედრაზე გაფრინდაშვილი მეუღლესთან და შვილებთან ერთად იმყოფებოდა. ფოტოები მთავრობის ადმინისტრაციამ გაავრცელა.