ჩამოცვენილი ფოთლების დაწვით წარმოქმნილი კვამლი, შესაძლოა, ზიანის მომტანი იყოს ადამიანის ჯამრთელობისთვის
მაშინ როცა ბევრი მისტირის ზაფხულის დასრულებას, შემოდგომასაც თავისი ხიბლი აქვს - თბილი სვიტრები, ცხელი ჩაის საოცარი სურნელი და რა თქმა უნდა, ნაირ-ნაირი შემოდგომის ფოთლები ჩვენს პეიზაჟში. ხეები ემზადებიან ზამთრისთვის, წითელ-ყვითელი ფოთლები კი ჩვენს ეზოებსა და ბაღებში აფარებენ თავს. ეს მშვენიერია, მაგრამ ხშირად იძულებულნი ვართ გავწმინდოთ ჩვენი ბაღები და ეზოები ამ აბეზარა ფოთლებისგან, ამისთვითვის კი, ყველაზე ხშირად ვაგროვებთ მათ და ვწვავთ. თუმცა ძალიან ცოტამ თუ იცის რა საფრთხე შეიძლება ახლდეს ფოთლების დაწვას ჩვენი ჯამრთელობისთვის და გარემოსთვის ზოგადად. ფოთლების დაწვის შედეგად წარმოქმნილი კვამლი იწვევს ჰაერის დაბინძურებას, ადამიანებში ჯანმრთელობის პრობლემებს და შესაძლოა გახდეს ხანძრის მიზეზიც კი.
რა დამაბინძურებლები წარმოიქმნება ჩამოცვენილი ფოთლების წვის შედეგად?
ფოთლების ღიად წვის დროს წარმოიქმნება კვამლი, რომელიც შეიცავს მცირე ზომის მყარ ნაწილაკებს და ნახშირწყალბადებს, მათ შორის ტოქსიკურ გამაღიზიანებლებს და ასევე პოტენციურ კანცეროგენებს, როგორიცაა ბენზო(ა)პირენი, ფოთლების კვამლში გავრცელებული ნივთიერებაა ასევე ნახშირჟანგი.
რა არის მყარი ნაწილაკები და რატომ არიან ისინი საშიში ადამიანის ჯანმრთელობისთვის?
ფოთლების კვამლი შეიცავს მცირე ზომის მყარ ნაწილაკებს, რომელიც შედგება სხვადასხვა დამაბინძურებლებისგან. თუკი ჩავისუნთქავთ კვამლს, ეს მიკროსკოპული მაწილაკები აღწევენ ღრმად სასუნთქ ორგანოებში და შესაძლოა თვეების მანძილზე შენარჩუნდეს ფილტვებში. ასეთი ნაწილაკების შესუნთქვამ შესაძლოა გამოიწვიოს სასუნთქი გზების ინფექციები, გამოიწვიოს შესუნთქული ჰაერის რაოდენობის შემცირება და ზემოქმედება იქონიოს ფილტვების უნარზე გამოიყენოს ეს ჰაერი. მყარი ნაწილაკების შესუნთქვამ ასევე შესაძლოა გამოიწვიოს ასთმური შეტევები ზოგიერთ ადამიანში.
რა არის ნახშირწყალბადები და რატომ არიან ისინი ზიანის მომტანი ადამიანის ჯამრთელობისთვის?
ნოტიო ფოთლები ხშირად ცუდად იწვიან და წარმოქმნიან დიდი რაოდენობით ქიმიურ ნივთიერებებს (ნახშირწყალბადებს). ზოგიერთი მათგანი, როგორიცაა ალდეჰიდები და კეტონები იწვევენ თვალების, ცხვირის და ყელის გაღიზიანებას. ფოთლების კვამლში გავრცელებულია ასევე არომატული ნახშირწყალბადები, რომელთა ნაწილიც ცნობილი კანცეროგენებია.
რა არის ნახშირჟანგი და რა ზემოქმედებას ახდენს ის ადამიანის ჯამრთელობაზე?
ნახშირჟანგი არის უფერო გაზი, რომელიც წარმოიქმნება არასრული წვის შედეგად. ფოთლების წვას ხშირად თან ახლავს ნახშირჟანგის წარმოქმნა. კვამლის შესუნთქვის გზით იგი ხვდება სისხლძარღვებში ფილტვების გავლით და უერთდება სისხლის წითელ უჯრედებს. ეს ამცირებს ჟანგბადის რაოდენობას სისხლში და შესაბამისად სხეულში ჟანგბადის მიწოდებას. მუცლადმყოფი ნაყოფი, ჩვილები, მწეველები, მოხუცები, ასევე ადამიანები გულისა და ფილტვის ქრონიკული დაავადებებით არიან უფრო მოწყვლადი ნახშირჟანგის მავნე ზემოქმედებისადმი.
არის თუ არა უკეთესი ალტერნატივა ჩამოცვენილი ფოთლების განთავსებისთვის?
რა თქმა უნდა არის!
ჩამოცვენილი ფოთლები შეიძლება გარდავქმნათ კარგ კომპოსტად!
კომპოსტირება არის უსაფრთხო და გარემოსთვის უვნებელი მეთოდი ჩამოცვენილი ფოთლების გამოყენებისთვის. ის არ იწვევს ჯამრთელობის პრობლემებს და არც ხანძრის საშიშროებას წარმოქმნის. პირიქით, სასარგებლოც კია.
კომპოსტირება არის მარტივი პროცესი, რაც გულისხმობს ფოთლების და სხვა ორგანული ნარჩენების მოთავსებას ყუთში ან გროვად. კომპოსტის მისაღებად აუცილებელია ორგანული ნარჩენების ყუთში ან გროვაში შენარჩუნებული იყოს ტენიანობა და ხშირად ავურიოთ მასა რათა უზრუნველყოფილი იყოს მისი ჰაერთან შერევა. მიკროოგანიზმები თანდათანობით შლიან ორგანულ მასას და გარდაქმნიან ჰუმუსის მსგავს მასად, რომელსაც ქვია კომპოსტი.
კომპოსტი არის ორგანული მასა, რომელიც შესაძლებელია, განთავსდეს ნიადაგში მცენარეთა ზრდის დასახმარებლად.
მულჩირება ჩამოცვენილი ფოთლების დაწვის ნაცვლად!
მულჩირება არის კიდევ ერთი საშუალება ფოთლების დაწვის ნაცვლად ვაქციოთ სასარგებლო პროდუქტად ბაღის მცენარეების დასაცავად. ამისათვის საჭიროა ფოთლები განვათავსოდ 3-5 სანტიმეტრის სისქის ფენად აქტიურად მზარდი მცენარეების გარშემო. სასურველია ფოთლების წინასწარ დაქუცმაცება, რათა მათ ხელი არ შეუშალონ ჰაერის მოძრაობას მცენარის ფესვებისკენ. მულჩირებას აქვს ბევრი სარგებელი თქვენი ბაღის მცენარეებისთვის მათ შორის ის აკავებს სარეველას, ხელს უწყობს ნიადაგში ტენიანობის შეკავებას და ტემპერატურის ზომიერების შენარჩუნებას.
R
Mastercard და Wolt უფასო მიტანის კამპანიას იწყებს !
უფასო ვიდეო რჩევა REDMED -ის ექიმებისგან
