შსს ფილმში „და ჩვენ ვიცეკვეთ“ დანაშაულის ნიშნებს ვერ ხედავს და გამოძიების დაწყებას არ აპირებს

შინაგან საქმეთა სამინისტრო ფილმში „და ჩვენ ვიცეკვეთ“ დანაშაულის ნიშნებს ვერ ხედავს. შესაბამისად, როგორც „ინტერპრესნიუსს“ შსს-ში განუცხადეს, ფილმის აკრძალვის თაობაზე პარლამენტის ყოფილი დეპუტატის, დიმიტრი ლორთქიფანიძის განცხადების საფუძველზე უწყებას გამოძიება არ დაუწყია.

„მიმდინარე წლის 8 ნოემბერს, მოქალაქე დიმიტრი ლორთქიფანიძის მიერ სამინისტროში შემოტანილ იქნა განცხადება თანდართული მასალებით, რომლის თანახმად, აღნიშნული პირი მოითხოვდა ფილმის შინაარსის შესწავლამდე, მისი ჩვენების შეზღუდვას. შინაგან საქმეთა სამინისტროს დანაშაულის ნიშნების არარსებობის გამო, განცხადებაზე გამოძიება არ დაუწყია“, - აცხადებენ შსს-ში.

საქართველოს პარლამენტის ყოფილმა წევრმა დიმიტრი ლორთქიფანიძემ ფილმის „და ჩვენ ვიცეკვეთ“ ჩვენების აკრძალვის მოთხოვნით შინაგან საქმეთა სამინისტროს გასულ კვირას მიმართა.

როგორც „ინტერპრესნიუსს“ ლორთქიფანიძემ განუცხადა, განცხადების საფუძველი, რომელიც შსს-ში შეიტანა, ქართულ სამართლებრივ სივრცეში უკვე მომხდარი პრეცედენტია. კერძოდ, საქმე ეხება ფრანგი რეჟისორის, გასპარ ნოეს 2016 წლის ფილმს - love, რომელიც ფილმის სიუჟეტში პორნოგრაფიული ელემენტების არსებობის გამო ცენზურის ქვეშ მოექცა.

ლორთქიფანიძის თქმით, მეორე მიზეზი, რატომაც შინაგან საქმეთა სამინისტროს მიმართა, არის ფილმის - „და ჩვენ ვიცეკვეთ“ ჩვენების დროს ასაკობრივი ზღვარის არარსებობა, რადგან 17 წლამდე ბავშვები დაიშვებიან კინოჩვენებაზე მშობლების თანხლებით, რაც ლორთქიფანიძის აზრით, ბავშვებს ვერ დაიცავს ფილმის მავნე ზეგავლენისგან.