19
მაისიდღის ზოგადი ასტროლოგიური პროგნოზი
ქორწილი და თეთრი კაბა ყველა ქალბატონის ცხოვრებაში განსაკუთრებულ ემოციებს უკავშირდება, ამიტომ ბუნებრივია, რომ ამ ყველაფერს თავისებური მღელვარებაც ახლავს თან. წინასაქორწილო სამზადისი ხომ მთელი რიტუალია, რომლის წარმატებით დასრულება პატარძლის გარეგნობასა და იმიჯზე პირდაპირ აისახება. ამ თემაზე სასაუბროდ კომპანია "მარიგოლდის" ხელმძღვანელს - ქალბატონ თამარ ნადირაძეს ვესტუმრე.
წინასაქორწილო სამზადისი
- საქორწილო კაბამ, ვარცხნილობამ და მაკიაჟმა, პატარძალს შეიძლება ასაკი მოაკლოს ან მოუმატოს, ამიტომ მის სწორად შერჩევას დიდი მნიშვნელობა აქვს. გოგონები თავიანთ პირველ ემოციებს ჩვენთან აფრქვევენ. ვინც კარგადაა აღზრდილი, ამას ძალიან კულტურულად აკეთებს, მაგრამ ზოგს ვერ ვაჩუმებთ და ვეუბნები - ამდენი "ვაიმეს" ძახილი არ ვარგა, ჯობია, ამ დროს უფრო მშვიდი და თავშეკავებულები იყოთ და ყველაფერი გაცილებით კარგად ჩაივლის-მეთქი. დედოფლებისთვის ე.წ. "კონო-თერაპია" მოვიგონეთ. როცა ძალიან ნერვიულობენ, გამოვიღებთ რაიმე კარგ კონიაკს და "ჩავარტყმევინებთ", მერე აღარაფერზე ღელავენ, დაძაბულობა ეხსნებათ და უფრო უშუალოები ხდებიან. ერთხელ, ერთმა გოგონამ რამდენიმე ბოთლიც კი დალია (იცინის). ზოგჯერ ისეთი კარგი წყვილი შემოდის, ჩვენ თვითონ გვიკვირს, ზოგი კი ისეთი პრეტენზიულია, აქედან გასვლის შემდეგ ერთდროულად აღმოგვხდება ხოლმე, - ეს მტრის ოჯახში შევიდაო (იცინის).
დღე, რომელიც მხოლოდ პატარძლის უნდა იყოს
- როცა გოგონები სადედამთილოსთან ერთად მოდიან, ვცდილობთ, ისეთი კაბა ავარჩევინოთ, რომ არც ერთს არ ვაწყენინოთ, რადგან ფულს სადედამთილო იხდის, მაგრამ ამავდროულად, მორიდებულ გოგონებს რაღაცნაირად ვეხმარებით ხოლმე. ეს მოთხოვნა ბევრს აქვს - მე რაც მომწონს, პატარძალმა ის უნდა ჩაიცვასო, განსაკუთრებით მულებსა და დედამთილებს. კაბის გამო დედა-შვილსაც კი უჩხუბია. ზოგჯერ კაბებს მამამთილები ურჩევენ და გოგონები ხმას ვერ იღებენ. დასაფასებელია, როცა სარძლოები მათ აზრსაც ითვალისწინებენ, ისიც მესმის, რომ თანხას ისინი იხდიან, მაგრამ დაჟინებულად მოსთხოვო, ის კაბა ჩაიცვას, რომელიც მას თავად არ მოსწონს, ცოდვაა უბრალოდ. ყველა თაობას თავისი გემოვნება აქვს და სამსახურშიც სულ ვამატებ ახალგაზრდებს, რომ მათი ასაკის ადამიანების გემოვნება ვიცოდე. ერთ რამეზე გავამახვილებდი ყურადღებას: საქართველოში მაინც მიღებულია, რომ ცოლებს ქმრები ასე თუ ისე, თავიანთ ჭკუაზე ატარებენ, მამაკაცია ლიდერი და ყველას მინდა ვუთხრა, - დაქალებსაც, დედებსაც, დედამთილებსაც და საქმროებსაც, რომ ის ერთადერთი დღე, რომელიც მთელი ცხოვრება ლამაზად უნდა დაამახსოვრდეთ, მათი სურვილისამებრ გაატარებინონ, მათ მისცენ არჩევანის უფლება და თავისუფლება, რაც უნდათ, ის გააკეთონ.
გაქცეული სადედოფლო
- ჩვენ გარშემო ათასნაირი ამბავი ხდება. ერთხელ, ასეთი შემთხვევა გვქონდა: ქორწილის დღეს გოგონა მოვიდა, უკვე ყველაფერი მზად იყო, მაკიაჟი და ვარცნილობა უნდა გაგვეკეთებინა და გვთხოვა, ათი წუთით გავალ და მალე დავბრუნდებიო. წავიდა და წავიდა - სხვას გაჰყვა ცოლად და ქორწილი ჩაშალა.
უგულო შვილი და სარძლო
- თავიდან, როდესაც ეს ბიზნესი დავიწყე, მახსოვს, ერთი ქალბატონი შვილთან და სარძლოსთან ერთად მოვიდა. ეს ქალბატონი 40-42 წლისა იქნებოდა, ექიმი, ძალიან დახვეწილი, ინტელიგენტი, კულტურული. სარძლო - 19-20 წლის. მართალია, ასეთ ასაკში 40 წელს გადაცილებული ადამიანები ზოგს ბებერი ჰგონია, მაგრამ თვითონაც ხომ გახდებიან ჩვენი ტოლები და მერე მიხვდებიან, რომ ცდებოდნენ. ის სიტუაცია არასოდეს დამავიწყდება... მაშინ სამოსი სადედამთილოებისთვისაც გვქონდა და როცა მასაც შევთავაზე, მიპასუხა - მერე და ვინ მეპატიჟებაო?!. წარმოგიდგენიათ? ამ გოგომ კი ირონიულად და ცინიკურად გადმოხედა. გული მომიკვდა. მეც მყავს ბიჭი და ასეთი რძალი ჩემთვის ვერანაირად ვერ იქნებოდა სასურველი. ერთი რამ მინდა ვუთხრა ახალგაზრდებს: ისინიც ხომ მოვლენ ჩვენს ასაკამდე, უფალი კარგსაც და ცუდსაც უკან დაგვიბრუნებს და არ შეიძლება ასე მოქცევა.
ეგოისტი მამაკაცები
- ამას წინათ, ძალიან ლამაზი წყვილი მოვიდა და ეს ბიჭი ხუმრობდა, - მე ბრენდები მაცვია და ყურადღებას არავინ მაქცევს, ყველა ანანოს და მის კაბას უყურებსო (იცინის). სხვათა შორის, ამბობენ, ბევრ მამაკაცს ქორწილთან დაკავშირებით ეგოისტური მომენტები აქვს და ისედაც, მამაკაცზე დიდი ეგოისტი არ არსებობს, რადგან როდესაც ოჯახში ბავშვები იბადებიან, მეუღლის ყურადღება აკლდებათ და ეჭვიანობენ.
დაკარგული ფატა
- ერთხელ, კაბა და ფატა წაიღეს ქირით, მეორე დღეს მხოლოდ კაბა დაგვიბრუნეს და როცა ფატა მოვიკითხეთ, იმ ქალბატონმა ისეთი საქმის გარჩევა დაგვიწყო, გაოცებული დავრჩი. ფატა უცხოეთში ცალკე ბიზნესია, ზოგჯერ მისი ფასი კაბის ფასსაც კი აღემატება და რანაირად ვაჩუქებდით? ბოლოს მითხრა, მოდი, დავსხდეთ და ეს ამბავი სამში გავარჩიოთო... ქურდული მენტალიტეტი, წარმოგიდგენიათ? (იცინის). სადაც გინდა, იქ მიჩივლეო. ბედნიერების დღე იყო და ასეთი დაძაბულობა ისევ მათთვისაა ცუდი, თორემ ცხოვრებაში ადამიანები იმდენ რამეს ვკარგავთ და ფეხზე ვდგებით, ერთი ფატის დაკარგვას, როგორღაც გადავიტანდით...
"ფეთხუმი" გოგონები
- ჩვენთან უცხოელებიც ხშირად მოდიან - აფროამერიკელები, ჩინელები, ინგლისელები და ა.შ. მეამაყება, რომ ჩვენი კაბები მსოფლიოს სხვადასხვა ქვეყანაშია გაყიდული. სხვათა შორის, ყოფილა შემთხვევა, როცა ქორწილისთვის შავი კაბა მოუთხოვიათ. მომწონს, რომ შემოვიდა კაბები "ორი ერთში", ანუ გრძელი კაბაა, რომელსაც შეუძლიათ სიგრძე მოხსნან და როგორც მოკლე სტილის, ისე დატოვონ. ამას წინათ, სხვა ეროვნების წყვილის ქორწილში ვიყავი და იქიდან აღფრთოვანებული მოვედი - ნეფე-დედოფალს ორი მეტრის რადიუსში არავინ ეკარებოდა. ეს კარგი კულტურაა, თორემ რამდენჯერ მოუბრუნებიათ სიგარეტით დამწვარი ან დასვრილი კაბა. მიხარია, რომ ბოლო დროს ეს კულტურა მკვიდრდება, ადამიანები უფრო დაიხვეწნენ, თორემ ადრე, შეიძლებოდა კაბაზე მთელი მენიუ წაგეკითხა - ტორტის ფერიდან დაწყებული, ყველაფერს ამოიცნობდი.
ხელზე ამბორის ტრადიცია
- ერთი რამ მინდა დავამატო: იმის მომხრე ვარ, რომ ხელზე ამბორის ტრადიცია აღდგეს. ეს ძალიან დადებითი ჟესტია, უფრო თავდაჯერებული, ამაყი ხდები ქალი და ქვეცნობიერად დადებითად მოქმედებს. თანაც დედოფლის ვარცხნილობას, მაკიაჟს უნდა გაუფრთხილდე და გადასაკოცნად გიჟივით არ დაეტაკო (იცინის). ამას წყვილებსაც ვთხოვ ხოლმე და ერთხელ, ერთი მეგრელი ბიჭი შემომიტრიალდა და მეგრული აქცენტით მითხრა - რა შენი საქმეა, სად ვაკოცებ ჩემს ცოლსო? (იცინის).
თეა გუნთაიშვილი, "მარიგოლდის" პიარ-მენეჯერი:
- სამი წელია, თამრიკოსთან ვმუშაობ და მიუხედავად იმისა, რომ ეს სამსახური თავისებურად დამღლელია, ამავე დროს სასიამოვნოცაა, რადგან ამდენი ბედნიერი ადამიანის ყურება გვიხარია და დადებითი ემოციით ვიმუხტებით. აქედან საპატარძლოს გაყვანა მთელი ცერემონიაა, ამაღელვებელი მომენტია.
თამრიკო:
- ბედნიერები ვართ, რომ ჩვენი საყვარელი საქმე ვიპოვეთ. როცა სამუშაოს სიყვარულით უდგები, შედეგსაც შესაბამისს იღებ. ყველაფერს თავისი ენა აქვს, თითოეულ დეტალში იგრძნობა, ამას მოვალეობის მოხდის მიზნით აკეთებ თუ მთელი გულით. თუ ადამიანს ცივი აურა აქვს, სამსახურში ვერ ავიყვან... ბუზღუნა გოგონები რომ მოდიან, სულ ვეუბნები, - მთავარია, ეს ყველაფერი თქვენი ღიმილით გაალამაზოთ-მეთქი. ზოგს ჰგონია, ცხვირაწეული თუ ივლის, ამით ვინმესგან დადებით განწყობას მოიპოვებს. უშუალობა და თავმდაბლობა ბევრად უფრო ალამაზებს ადამიანს. სხვათა შორის, ჩვენ ბევრი მოდელი თუ საინტერესო სახე აღმოვაჩინეთ, ყოველთვის ვცდილობთ, კადრს მიღმა მყოფი ჟურნალისტები წამოვწიოთ წინ და არა - ცნობილი სახეები, რომლებიც ისედაც ყველგან ტრიალებენ. სხვათა შორის, ჩვენთან თანამშრომლობის მერე, ზოგმა კარგი შემოთავაზებები მიიღო, ზოგიც დაოჯახდა. ეტყობა, ფეხბედნიერები ვართ (იღიმის).
თამთა დადეშელი
(გამოდის ხუთშაბათობით)
