18
მაისიდღის ზოგადი ასტროლოგიური პროგნოზი
მოდელი და ტელეწამყვანი მანიკა ასათიანი ცხოვრების აქტიურ სტილს დაუბრუნდა: "რუსთავი 2"-ის ეთერიდან ამინდის პროგნოზის გაცნობის ნაცვლად, ახლა "მაესტროს"ეთერში გადაცემის - "მაღვიძარა"წამყვანი გახლავთ... შვილის გაჩენის შემდეგ, მშვენიერ მანიკას არც სამოდელო საქმეზე უთქვამს უარი: ახლახან "ფეშენ ვიკზე"გამოჩნდა...
თმის ფერი და ვარცხნილობა
- თმის ფერით სხვებისგან ყოველთვის გამოვირჩეოდი, თუნდაც - სამოდელო სფეროში. ბუნებრივად
ხვეული თმა მაქვს. ზედმეტი "ჩარევები" არ მიყვარს, მაგრამ ჩემი პროფესიის გამო, ბევრნაირი ვარცხნილობა მქონია. როცა მოდის კვირეულებზე გამოვდივარ, დიზაინერები ორიგინალურ ვარცხნილობას მირჩევენ.
ბავშვობაში, ვიდრე გავაცნობიერებდი, რომ თმის განსხვავებული ფერი კარგი იყო, ხალხის ყურადღება მაღიზიანებდა და ვტიროდი, - ჩემი დის მსგავსად, მეც შავი თმა რატომ არ მაქვს-მეთქი? ერთგვარი ბავშვური კომპლექსი მქონდა. მას შემდეგ, რაც გავიზარდე, ჩემს თმას ვაფასებ და შეძლებისდაგვარად კარგად ვუვლი. მოდის კვირეულზე, ზოგჯერ დღეში 3-4 ვარცხნილობის შეცვლა მიწევს ისე, რომ თავის დაბანას ვერც ვასწრებ ხოლმე. შემდეგ დაახლოებით 1 კვირა იმას ვუნდები, რომ ძველი იერი დავუბრუნო.
თმას განსაკუთრებულად არ ვუვლი. უბრალოდ, ხვეული თმისთვის განკუთვნილი შამპუნით ვიბან, ბალზამს ვიყენებ და მეტი ბზინვარებისთვის - ვიტამინებით ვკვებავ.
სახის კანის მოვლა
- ჩემი საქმიანობის მიუხედავად, სახის კანთან დაკავშირებული პრობლემა არასოდეს მქონია. 14 წლიდან მაკიაჟს ვხმარობ (მაგრამ ყოველდღიურად - არა) და ალბათ, ეს კანზე უარყოფითად მოქმედებს, თუმცა ძალიან არ აისახება. სახის კანს განსაკუთრებულად არ ვუვლი, უფრო მეტიც - ზოგჯერ მკვებავ კრემსაც კი არ ვისვამ. მოკლედ, უპრობლემო კანი მაქვს: არც გამონაყარი მაწუხებს და არც - სიმშრალე.
ვარჯიში და დიეტა
- ყველაზე ზარმაცი მოდელი ვარ. ადრე ჩემს სხეულს განსაკუთრებული მოვლა არ სჭირდებოდა, მაგრამ ბავშვის გაჩენის მერე მივხვდი, რომ საკუთარ გარეგნობას უფრო მეტი ყურადღება უნდა დავუთმო. მართალია, ისევ ისეთ ფორმაში ვარ, როგორშიც შვილის გაჩენამდე ვიყავი, მაგრამ არ მინდა, მომავალში ჩემი სხეულის ფორმებზე ასაკმა იმოქმედოს. ჰოდა, ამიტომაც, ვარჯიშის დაწყებას ვაპირებ.
ჩემთვის დიეტა "ზღაპარია": ჭამაზე ვგიჟდები! ყველა დამცინის, - როგორი მოდელი ხარო? მართლა ძალიან ბევრს ვჭამ.
სამოსი
- გამორიცხულია, რომ ყოველდღიურად მაღალქუსლიან ფეხსაცმელში გამოწყობილი მნახოთ. ძალიან მიყვარს ჯინსი. რადგან ტელევიზიაში ვმუშაობ, ვცდილობ, ყოველდღიურად ისეთი სამოსი მოვირგო, რაც ეთერში ყოფნის დროს გამომადგება და რომელშიც თავს კომფორტულად ვიგრძნობ. გადაცემის ფორმატი ჩემგან კონსერვატულ სამოსს არ მოითხოვს, პირიქით - იმას ვიცვამ, რაც მომწონს.
სამკაული და აქსესუარები
- ადრე საყურე მიყვარდა. მერე, გარკვეული პერიოდი საერთოდ აღარ ვიკეთებდი, ახლა ისევ მიკეთია... რამდენიმე საყვარელი ბეჭედი მაქვს, რომლებსაც თითქმის არასდროს ვიხსნი. სამაჯურები, ქამრებიც მომწონს, მაგრამ სათვალეებზე ვგიჟდები!..
საქმე
- ამჟამად "მაესტროზე" დილის გადაცემის - "მაღვიძარა"წამყვანი ვარ. დილის 6-ის ნახევარზე გაღვიძება ცხოვრების წესად მექცა, რადგანაც 7-დან 11 საათამდე გადაცემა მიმყავს. ჩემი სამუშაო ყველას მარტივი ჰგონია. მეუბნებიან, - დილით ადრე კი იღვიძებ, მაგრამ მერე ხომ თავისუფალი ხარო? ასე არ არის: ტელევიზიაში ეთერის შემდეგაც ვრჩებით და 5-6 საათამდე ვმუშაობთ. ეს დამღლელი, მაგრამ სასიამოვნო საქმეა. აქ თავს კომფორტულად ვგრძნობ.
"მაღვიძარას"წამყვანი კასტინგის შედეგად გავხდი. ბავშვობიდან მიჩვეული ვარ, რომ საკუთარი შემოსავალი მქონდეს და მუშაობის დაწყება ძალიან მინდოდა. მიხარია, რომ არაჩვეულებრივ გარემოში მოვხვდი. აქ თავს შინაურულად ვგრძნობ.
სამოდელო სფეროშიც პაუზა მქონდა და პოდიუმი ძალიან მენატრებოდა. საბედნიეროდ, ახლა "ფეშენ ვიკში" ვმონაწილეობ...
ოჯახი
- უკვე ჩემი პატარა ოჯახი: მე, ჩემი მეუღლე და შვილი - გიო ცალკე, შეხმატკბილებულად ვცხოვრობთ. სახლში სულ ხალხმრავლობაა: შვილის მოვლაში დედაჩემი და ბექას დედა მეხმარებიან. ძიძაც მყავს... სამსახურის მერე, მთელ დღეს გიოსთან ვატარებ. დღის განმავლობაში ისე მენატრება, რომ სამსახურიდან სხვაგან წასვლის და გართობის ხალისი არ მაქვს. უჩემოდ გიო მოწყენილი არ არის, მაგრამ როცა მასთან მივდივარ, ჩემ გარდა აღარავინ უნდა - ამას ვგრძნობ და მაქსიმალურად ვცდილობ, თავისუფალი დრო მასთან გავატარო.
ჰობი
- სიმღერა მამშვიდებს და სიამოვნებას მანიჭებს. ბავშვობიდან ვმღერი. როცა მეკითხებოდნენ, თუ ვინ უნდა გამოვსულიყავი? ვპასუხობდი, - მომღერალი-მეთქი. მაშინ მომღერლობა ჩემი ცხოვრების მთავარი მიზანი იყო, ახლა - ჰობია. შინ სულ ვმღერი, რადგან სიმღერა ჩემს შვილსაც ძალიან მოსწონს. როცა ტირის და ვერ ვაჩუმებ, მუსიკას ვურთავ ან ავმღერდები ხოლმე და თავადაც ღიღინს იწყებს.
დასვენება და გართობა
- შაბათ-კვირის გარდა, დილიდან საღამოს 5-6 საათამდე სამსახურში ვარ, შემდეგ, თუ კარგი ამინდია, გიოს ვასეირნებ. ღამით ადრე ვერ ვიძინებ, რადგან გიო არ იძინებს. შაბათობით, დაქალებთან ერთად სადმე გასართობად მივდივარ - ეს უკვე ტრადიციად გვექცა. "კვირის შემაჯამებელი"დღის მოწყობის ინიციატორი მე გახლავართ...
ეთო ყორღანაშვილი
(გამოდის ხუთშაბათობით)
