"პალიტრა L" ბიბლიის ტირაჟს კიდევ ერთხელ დაბეჭდავს

გამომცემლობა "პალიტრა L"-ის მიერ გამოცემული ბიბლიის სრული ტირაჟი ორ საათში გაიყიდა.

პროექტის "50+ბიბლია+49 წიგნი, რომელიც უნდა წაიკითხო, სანამ ცოცხალი ხარ" ფარგლებში გამოცემული ბიბლია 25 თებერვალს, გაზეთ "კვირის პალიტრასთან" ერთად გამოვიდა. "პალიტრა მედიამ" მკითხველებს მთავარი წიგნის შეძენის საშუალება 14 ლარად მისცა.

როგორც "ინტერპრესნიუსთან" საუბრისას, გამომცემლობა"პალიტრა L"-ის დირექტორმა, თინათინ ასათიანმა აღნიშნა, მიუხედავად იმისა, რომ შეძენის მსურველთა დიდი რაოდენობა მოსალოდნელი იყო და "პალიტრა L"-მაც გაზრდილი ტირაჟი დაბეჭდა, გამოცემიდან ორ საათში ბიბლიის ტირაჟი სრულად გაიყიდა.

იქიდან გამომდინარე, რომ მკითხველების დიდმა ნაწილმა მთავარი წიგნის შეძენა ვერ მოახერხა, გამომცემლობა "პალიტრა L" ბიბლიას ხელმეორედ დაბეჭდავს.

ბიბლიის ახალი ტირაჟი აღდგომამდე, გაზეთ "კვირის პალიტრასთან" ერთად გამოიცემა და მისი შეძენა მკითხველებს ისევ 14 ლარად შეეძლებათ.

"ინტერპრესნიუსი"