სამორი ბალდემ სადებიუტო ჰიპ-ჰოპის ალბომი გამოუშვა

პროექტის - "ცეკვავენ ვარსკვლავები" პირველი სეზონის გამარჯვებულმა - სამორი ბალდემ სადებიუტო ალბომზე მუშაობა დაასრულა. მოგეხსენებათ, ალბომის დაფინანსება ერთ-ერთმა ბანკმა ითავა და სამორს დიდი საჩუქარი გაუკეთა, სიმღერები კი "ბრავო რეკორდსის" სტუდიაში ჩაიწერა. ალბომზე, რომელიც ქართული შოუბიზნესისთვის განსხვავებული - ჰიპ-ჰოპის ჟანრის არის, სამორმა თავის ბავშვობის მეგობარ - გოჩა ხუხუნთან, იგივე - გროტასკთან ერთად იმუშავა და მასში ათი მუსიკალური ნაწარმოებია შესული.

აღსანიშნავია, რომ სამორი და გროტასკი ქართულ ტექსტებს თავად წერენ, არანჟირებასაც თვითონ აკეთებენ და კომპოზიციებსაც ქმნიან. ჰიპ-ჰოპი მათი ცხოვრების სტილია და ამ სუბკულტურას ბავშვობის ასაკიდან მისდევენ. დუეტს "ძველი რესურსი" ჰქვია, ალბომს კი - "გონივრული მოძრაობა" (ჰიპ - გონივრული, ჰოპ - მოძრაობა).

"ჰიპ-ჰოპი ჩვენთვის ადრეული ასაკიდან გახდა თვითგამოხატვის ერთ-ერთი საუკეთესო, ხოლო დღეისთვის - მთავარი საშუალება. ჩვენ გვჯერა, რომ ჰიპ-ჰოპის დანიშნულება ჩვენში არსებული რასობრივი და კლასობრივი საზღვრების წაშლაა", - ამბობენ "ძველი რესურსის" წევრები.

ზაზა შენგელია, "ბრავო რეკორდსის" ხელმძღვანელი:

- მოხარული ვარ, რომ კიდევ ერთი კარგი პროექტი განვახორციელეთ. "ბრავო რეკორდსისთვის" სამორთან თანამშრომლობა ძალიან საინტერესო გახლდათ, ვინაიდან ამ მუსიკალური მიმდინარეობის განხრით პირველად ვიმუშავეთ. სამორიც და გოჩაც საინტერესო მუსიკოსები არიან. მნიშვნელოვანია, რომ მათი მუსიკის ტექსტები ქართულ ენაზეა დაწერილი და ახალგაზრდულ პრობლემებს, მათ შინაგან სამყაროს ეხმიანება. გარკვეულწილად, პროტესტია არსებული პრობლემების მიმართ და ბევრ სხვა საკითხსაც შეეხება. ეს დუეტი საკუთარ სატკივარს მუსიკითა და ტექსტით გადმოსცემს. 21 დეკემბერს ალბომის პრეზენტაცია ერთ-ერთ კლუბში გაიმართება. ბაზარზე იმისგან განსხვავებული პროექტი გამოვა, რასაც დღემდე ვაკეთებდით და ვფიქრობ, ნებისმიერი სეგმენტის ახალგაზრდებისთვის მისაღები იქნება.

თეიკო კანდელაკი, ბანკის - "რესპუბლიკა" კორპორაციული კომუნიკაციების დეპარტამენტის უფროსი:

- ვცდილობთ, საზოგადოებრივ-კულტურულ ცხოვრებაში აქტიურად ვიყოთ ჩართულები და ახალგაზრდა ტალანტების აღმოჩენას, მათ განვითარებას მხარი დავუჭიროთ. მოგეხსენებათ, სამორმა ხალხის დიდი სიყვარული დაიმსახურა და ამიტომაც გადავწყვიტეთ, მისი პირველი დისკი დაგვეფინანსებინა. დარწმუნებული ვარ, სამორის სიმღერები ყველას ძალიან მოეწონება. ეს ადამიანი მაგალითია იმისა, რომ მიზნის მისაღწევად მხოლოდ ნიჭი არ კმარა, ამისთვის მონდომება და თავდაუზოგავი შრომაა აუცილებელი.

სამორი ბალდე:

- ძალიან ძნელია, როცა ფინანსების არქონის გამო, საკუთარი იდეის განხორციელებას ვერ ახერხებ. დიდი მადლობა მინდა გადავუხადო სტუდიასაც და ბანკსაც, რადგან მხარში ამოგვიდგნენ და მე და გოჩას იდეების ხორცშესხმაში დაგვეხმარნენ. ჩვენ გავაკეთეთ ის, რაც მოგვწონს და იმედია, ადამიანების გარკვეული ნაწილის გემოვნებასაც დააკმაყოფილებს.

გოჩა ხუხუნი, გროტასკი:

- მე და სამორი ბავშვობის მეგობრები ვართ. ასეთი ალბომის ჩაწერაზე დიდი ხანი ვოცნებობდით. ერთხელ ისიც ვთქვით, - სიმღერები ჩავწეროთ და თუნდაც, მხოლოდ ინტერნეტით გავავრცელოთ-თქო. წლების მანძილზე ვშრომობდით, მაგრამ იმას ვერ ვიღებდით, რაც გვინდოდა. ჩვენს ადგილას ზოგი ხელსაც ჩაიქნევდა, მაგრამ ჯიუტები ვართ, არ ვნებდებოდით. ჰოდა, ბოლოს "ბრავო რეკორდსში" ყველაფერი აგვისრულდა. სამუშაო პროცესი სასიამოვნო იყო, რადგან პროფესიონალების გარემოცვაში ვიყავით.

სამორი:

- დიდი მადლობა მინდა გადავუხადო ალეკო ბერძენიშვილს. ის ნიჭიერი მუსიკოსია და ერთი დუეტი მასთან ერთადაც ჩავწერე, რომელიც ასევე, ალბომში შევიდა. ამ სიმღერის არანჟირება მას ეკუთვნის, ყველა დანარჩენისა კი - მე... სხვათა შორის, ტექსტებში უცენზურო სიტყვებს არ ვიყენებთ, რადგან ქართულს არ უხდება; ჩვენს მუსიკაში აგრესიაც არ იგრძნობა. ტექსტებში მეტაფორები ჭარბობს, გარკვეული ინფორმაციაა ფიქრისთვის; ზოგ ტრეკში სიტყვებით თამაშს ვიყენებთ. ჩვენი ნამუშევარი თავისუფლად შეგიძლიათ, ბავშვებს მოასმენინოთ.

გოჩა:

- ათივე სიმღერა ფაქტობრივად, ორ თვეში დაიწერა და ჩაიწერა კიდეც. იყო იდეა, რომ ალბომისთვის ტექსტებიც დაგვერთო, მაგრამ ჩვენი ერთი სიმღერის ტექსტი იმდენად დიდია, რომ ტომეულების გამოშვება დაგვჭირდებოდა (იცინის).

სამორი:

- ჩემს ტექსტს მე ვწერ, გოჩა - თავისას. მე პროდიუსერი ვარ, გოჩა - დიჯეი. მიზანი იყო, რომ ქართულ რეპთან დაკავშირებით, გარკვეული სტერეოტიპები დაგვემსხვრია! შევეცადეთ, ყველასგან განსხვავებული ალბომი გაგვეკეთებინა. და კიდევ, საკუთარ თავს მუსიკოსს არ ვუწოდებ, ეს უბრალოდ, ჩემი ჰობია. მუსიკის თუ რამე გამეგება, ყველაფერი დამოუკიდებლად ვისწავლე, მუსიკალური განათლება არ მაქვს.

ზაზა შენგელია:

- "ბრავო ივენთსი" ცოცხალი კონცერტების ჩატარების მიმართულებით იწყებს მოქმედებას და ამ საქმეში ბევრი ნიჭიერი მომღერალი ჩაერთვება - ნინი ბადურაშვილი, ოთო ნემსაძე, სოფო ბედია, დათუნა მგელაძე, ჯგუფი "ელდრაინი" და ა.შ. მათ შორის, ცხადია, "ძველი რესურსიც" იქნება. ეს დუეტი დიდ აუდიტორიას შეკრებს და ამაში 21 დეკემბერსაც დარწმუნდებით. მათ კონცერტებსა და საჯარო გამოსვლებს ოპერირებას ჩვენ გავუწევთ.

თამთა დადეშელი

ჟურნალი ”გზა”

(გამოდის ხუთშაბათობით)