დაკოტა ფენინგი: "მე და ჩემი და კონკურენტები არ ვართ!"

19 წლის ჰოლივუდელი მსახიობი დაკოტა ფენინგი, რომელმაც სახელი გაითქვა ვამპირი ჯეინის როლით ფილმში "ბინდი", ჟურნალისტებთან, როგორც წესი, გულახდილია. მან ამჯერადაც გულწრფელად ისაუბრა ასევე ცნობილ დასთან ურთიერთობასა და კრისტენ სტიუარტთან მეგობრობაზე.

დაკოტამ კინოში გადაღება 6 წლიდან დაიწყო. ამჟამად მის ანგარიშზე რამდენიმე გახმაურებული ფილმი და ისეთ პარტნიორებთან ნამუშევრებია, როგორებიც არიან შონ პენი, რიზ უიზერსპუნი, ტომ კრუზი და რასელ კროუ. დამოუკიდებელი ადამიანია და დიდი ხანია, ნიუ-იორკში საკუთარ ბინაში ცხოვრობს. უნივერსიტეტში სწავლობს და მოდის ინდუსტრიაშიც მიაღწია წარმატებებს.

"ისეთი განცდა მაქ­ვს, თითქოს ძალიან დიდი ხანია ვცხოვრობ. გადაღებები კი... ასე მგონია, ყოველთვის მიყვარდა ეს საქმე და ყოველთვის შემეძლო. მომწონს და ვგიჟდები ყველაფერზე, რაც ამასთან არის დაკავშირებული. გადასაღებ მოედანზე რომ ვდგავარ, ასე მგონია, ყველაზე ბედნიერი ვარ ამქვეყნად. გამიმართლა, რომ ბავშვობიდან ვაკეთებ იმას, რაც მინდა", - ამბობს მსახიობი.

დაკოტას ხშირად ად­არებენ უმცროს დას - ელ ფენინგს, რომელიც ნორჩი ასაკისაა, ასევე ცნობილი მსახიობია და უკვე მოასწრო თამაში ისეთ ფილმებში, როგორებიცაა: "მორიგე მამა", "მე - სემი" და "სუპერ 8". თუმცა დებს შორის მეტოქეობა არ ყოფილა. თითოეულმა თავისი გზა აირჩია და ერთმანეთს ხელს არ უშლიან.

"მომწონს დამოუკიდებლობა. მთავარია, რომ ახლა არ უნდა გავიყო აბაზანა უმცროს დასთან! თავისთავად, ამას სიყვარულით ვამბობ. რა თქმა უნდა, ჯერ ეს ყველაფერი უცნაურად მეჩვენება, რომ ჩემი პირადი სივრცე მაქვს, ჯერ კიდევ მაოცებს ის გარემოება, რომ მარტო ვარ და არავინ უყურებს, რას ვაკეთებ. გარკვეულ ხანს დედა იყო ჩემთან ნიუ-იორკში, დარწმუნდა, რომ კარგად დავბინავდი, მასწავლა მომზადება, ტანსაცმლის რეცხვა", - ამბობს ახალგაზრდა მსახიობი.

დაკოტას ძალიან სწყდება გული, რომ უკვე დასრულდა ცნობილ საგა "ბინდზე" მუშაობა. მან მოასწრო კრისტენ სტიუარტთან დამეგობრება, თუმცა­ღა ფილმში თავგადაკლულ მტრებს თამაშობენ. ფენინგს უხარია, რომ ამ ფილმების ნაწილი გახდა, მიუხედავად იმისა, რომ ისეთი პოპულარული ვერ არის, როგორებიც პატინსონი და სტიუარტი არიან.

"როცა იტალიაში ვი­ყავით გადაღებებ­ზე, მოედანზე ხუთი ათასამდე ადამიანი შე­იკრიბა. რობერტი მანქანისკენ რომ მიდიოდა, მეჩვენებოდა, რომ გოგონები უბრალოდ გაგიჟდებოდნენ! საკმარისი იყო მსახიობები გამოჩენილიყვნენ, ყველანი ყვირილს იწყებდნენ. ყველა მარტო იმიტომ იყო შეკრებილი, რომ რობერტი და კრისტენი ენახათ", - ამბობს დაკოტა ფენინგი.

მალე ეკრანებზე გა­მოვა ფილმი "ახლა სწორედ დროა", რო­მელშიც მსახიობი სა­სიკვდილო სენით დაავ­ადებულ გოგონას განასახიერებს. დაკოტას იმედი აქვს, რომ ეს როლიც კიდევ ერთი წარმატებული ნამუშევარი იქნება მის კარიერაში.

GQ

ჟურნალი "რეიტინგი"

(გამოდის ორშაბათობით)