19
მაისიდღის ზოგადი ასტროლოგიური პროგნოზი
ისრაელში პოლიტიკური სკანდალისულ უფრო მასშტაბური ხდება - ისრაელის პოლიციამ პრემიერ-მინისტრ ბენიამინ ნეთანიაჰუს ორი უახლოესი თანაშემწე, მრჩევლები ჯონათან ურიხი და ელი ფელდშტეინი დააკავა. როგორც სამართალდამცველები აცხადებენ, ისინი კატარის მთავრობასთან უკანონო გარიგებებში არიან ეჭვმიტანილები.
ადგილობრივი მედია ამ პროცესს "კატარგეითის" სკანდალს უწოდებს. გამოძიება იკვლევს პოტენციურ საგარეო გავლენას ისრაელზე, ეროვნული უსაფრთხოების დარღვევას და პოლიტიკურ გადაცდომებს.
საგანგებო სამსახურმა გამოძიების ფარგლებში დაკითხა პრემიერ-მინისტრი ბენიამინ ნეთანიაჰუც, თუმცა როგორც ადგილობრივი მედია წერს, ის არ არის ამ საქმეში ეჭვმიტანილთა სიაში. გამოძიებამ ის დაკითხა, როგორც ამ საქმის მცოდნე პირი.
რას გულისხმობს "კატარგეითის" სკანდალი?
საქმე შეეხება ისრაელში კატარის გავლენის სავარაუდო ზრდას და ამ საკითხთან დაკავშირებულ ბრალდებებს.
მაგალითად, ერთ-ერთი ბრალდება შეეხება ნეთანიაჰუს მრჩევლის, ფელდშტეინის კავშირს ერთ-ერთ საერთაშორისო ფირმასთან, რომელთანაც კონტრაქტი აქვს კატარს. არსებობს ეჭვი, რომ ფელდშტეინი ავრცელებდა პროკატარულ ნარატივებს სახელმწიფო უწყებებში და ასევე ისრაელის მედიაში.
- აღსანიშნავია, რომ ფელდშტეინს ადრე წაუყენეს ბრალდება, რომელიც "ჰამასთან" მძევლების დასაბრუნებლად მოლაპარაკებების საიდუმლო დოკუმენტების გაჟონვას უკავშირდებოდა.
მიმდინარე გამოძიება იკვლევს ამ საქმესაც და პოტენციურად აკავშირებს ნეთანიაჰუს ახლო წრეში მყოფ ადამიანებს უფრო ფართო სქემაში, რომელიც მოიცავს საგარეო ჩარევას და სამთავრობო რესურსების ბოროტად გამოყენებას. გავრცელებული ინფორმაციით, ბრალდებები მოიცავს მოსყიდვას, ნდობის ბოროტად გამოყენებას, ფულის გათეთრებას, უცხოელ აგენტებთან კონტაქტს და ეროვნული უსაფრთხოების დარღვევას.
ნეთანიაჰუს მმართველმა პარტიამ სასტიკად დაგმო დაკავებები და მას პოლიტიკურად მოტივირებული უწოდა. მათი განცხადებით, ეს არის "პრემიერ-მინისტრის ჩამოგდების ორკესტრირებული ძალისხმევის ნაწილი". პარტია გენერალურ პროკურატურას "ყალბი გამოძიების წარმოებაში" და "დაკავების ორდერების მეშვეობით, სახელმწიფო გადატრიალების მცდელობაში" ადანაშაულებს.
"ეს არის დემოკრატიის მკვლელობის მცდელობა", - აცხადებენ ნეთანიაჰუს პარტიაში.
რატომ კატარი?
მიუხედავად იმისა, რომ ისრაელსა და კატარს არ აქვთ ოფიციალური დიპლომატიური კავშირები, დოჰამ იყო მთავარი შუამავალი "ჰამასთან" არაპირდაპირ მოლაპარაკებებში ღაზაში ომის დროს.
კატარის სავარაუდო ფინანსურმა კავშირებმა ნეთანიაჰუს თანაშემწეებთან, გააჩინა შეშფოთება ეროვნული უსაფრთხოების და საგარეო გავლენის შესახებ.
ექსპერტები ვარაუდობენ, რომ თუ კატარის თანხები მართლაც მიეწოდება ისრაელის ოფიციალურ პირებს აქტიური მოლაპარაკებების დროს, ეს შეიძლება იყოს ეროვნული უსაფრთხოების კანონების სერიოზული დარღვევა.
