რუსთაველის გამზირზე დამოუკიდებლობის რეფერენდუმის დღისადმი მიძღვნილი აქცია იმართება, რომელსაც სხვადასხვა ადგილიდან მსვლელობით შეუერთდნენ პროტესტანტები.
თბილისის სახელმწიფო უნივერსიტეტის პირველი კორპუსიდან გაიმართა სტუდენტების მსვლელობა სახელწოდებით - "ჩვენი მომავალი დამოუკიდებელი საქართველოა“.
როგორც აქციის მონაწილეები აცხადებენ, "წინაპრების მიერ მოპოვებულ დამოუკიდებლობას არ დათმობენ“.
მსვლელობა რუსთაველის გამზირზე დასრულდა, სადაც სტუდენტები პარლამენტის წინ მიმდინარე საპროტესტო აქციას შეუერთდნენ.
პარალელურად, დაიწყო მსვლელობა რესპუბლიკის მოედნიდანაც.
მარშის მონაწილეებს მოტანილი აქვთ საქართველოსა და ევროკავშირის დროშები.
ისინი სკანდირებდნენ: “დიდება გმირებს!”.
გარდა ამისა, თბილისში დაგეგმილია, სხვა რამდენიმე საპროტესტო მარშიც.
ამასთანავე რუსთაველის თეატრთან შეიკრიბნენ კულტურის სფეროს წარმომადგენლები, სლოგანით: "კულტურა დამოუკიდებლობისთვის“.
ცნობილია, რომ რუსთაველის გამზირზე შეკრებულ ადამიანებს მე-5 პრეზიდენტი სალომე ზურაბიშვილი მიმართავს.