18
მაისიდღის ზოგადი ასტროლოგიური პროგნოზი
"კიდევ ერთი უნიკალური ფირი ჩემი არქივიდან. ნაწყვეტი ფილმიდან: "სამეგრელოს ჩანახატები"... 1985 წელი. ბავშვობიდან ბუნდოვნად მახსოვს, რომ სამეგრელოში კერძო პირს ჰქონდა საკუთარი ზოოპარკი, (ვის და სად აღარ მახსოვს).. ჰყავდა ლომი, ირმები, ხოხბები და ფარშევანგები... ეს ფირი სწორედ ამ უნიკალურ გარემოს უნდა ასახავდეს.. არ ვიცი რით დასრულდა ეს ამბავი, საინტერესოა მეტი დეტალი შევიტყო თქვენგან, დაწერეთ რა იცით ამ ამბის შესახებ" - ეს წარწერა ხელოვნების სასახლის დირექტორმა გიორგი კალანდიამ სოციალურ ქსელში უნიკალურ კადრებთან ერთად გამოაქვეყნა, სადაც ჩანდა, რომ ლომის ბოკვერს კვებავდა...
მის პოსტს ათასობით მოწონება და კომენტარები მოჰყვა. წერდნენ, რომ სოფელ გრიგოლიში, მურმან როგავას ჰქონდა კერძო ზოოპარკი...
მეტის გასაგებად მურმან როგავას შვილს ანნა როგავას დავუკავშირდით, რომელმაც უნიკალური ფოტოები და ინფორმაცია მოგვაწოდა...
- მამაჩემი მურმან როგავა პროფესიით აგრონომი იყო, ძალიან უყვარდა ფლორა და ფაუნა, ცხოველების სიყვარული მშობლებისგან მოსდგამდა... ერთ დღეს მეგობრებმა შვლის ნუკრი მოუყვანეს, რომელიც ისე მოაშინაურა, შემდეგ თიკნებთან ერთად თამაშობდა. სახელიც კი დაარქვა "ბორია". მამაჩემს თურმე სულ კუდში დაჰყვებოდა. დაუჯერებელია, მაგრამ ცეკვაც კი ასწავლა ბორიას. ირმის სანახავად ბევრი მოდიოდა. სწორედ ამის შემდეგ გაჩნდა იდეა აღკვეთილის გაშენებისა.
80-იან წლებში სახელმწიფოს დახმარებით შემოღობილი იქნა 37 ჰექტარი ტერიტორია. საბჭოთა კავშირის სხვადასხვა ქალაქების ზოოპარკებიდან ჩამოიყვანა სხვადასხვა სახეობის ცხოველები: ლამა, აქლემი, მარალი, კენგურუ, ციმბირული ჯიშის ირემი, კუდთეთრა წინწკლებიანი ირემი. შველი, გარეული ტახი, ჯიხვი, სირაქლემა, სხვადასხვა ფერის ფარშევანგები, სხვადასხვა ჯიშის ხოხბები: კოლხური, ვერცხლისფერი, ულვაშებიანი, სამეფო ჯიშის ოქროსფერი ხოხობი, დეკორატიული ქათმები და ა.შ...
ეს ფრინველები და ცხოველები ვოლიერებში კი არ იყვნენ დამწყვდეულები, არამედ ყველას თავისუფალი სივრცე ჰქონდა გამოყოფილი.80-იან წლებში ზუგდიდს როსტოვის ცირკი სტუმრობდა, ამ დროს დაიბადა ლომის ბოკვერი, რომელიც საჩუქრად მამაჩემს გადასცეს.სითბოთი და სიყვარულით გაიზარდა "პახა". ეზოში ლეკვებთან, ფარშევანგებთან და ხოხბებთან ერთად დასეირნობდა. სამ წლამდე იზრდებოდა ოჯახში "პახა", ძუ ლომი იყო და რადგანაც ჩვენ ხვადი არ გვყავდა, მამამ გადაწყვიტა სოხუმის ზოოპარკისთვის გადაეცა საჩუქრად...
- ალბათ ზოოპარკს ძალიან ბევრი ვიზიტორი ჰყავდა...
- დიახ, ამ აღკვეთილს სტუმრობდნენ გამოჩენილი საზოგადო მოღვაწეები, სკოლის მოსწავლეები თუ ტურისტები... ნაკრძალს სტუმრობდა ამერიკელი ჰოლივუდის მსახიობი ჯეინ ფონდა და მისი მეუღლე ტედ ტერნერი. პირველი სტუმრობა აშილ მიურატის ოჯახის და ა.შ... სია ძალიან გრძელია. ამ ყველაფერზე ფილმი აქვს გადაღებული რეჟისორ მერაბ კოკოჩაშვილს
- როდემდე იარსება და თქვენ რამდენად გახსოვთ?
- სსრკ-ს დაშლამდე სახელმწიფო ეხმარებოდა, ხოლო 90-იანი წლებიდან 2005 წლამდე საკუთარი სახსრებით ინახავდა...ჩემს დროს იყო 70 ირემი, რამდენიმე ფარშევანგი, სირაქლემა, რომელიც სიბერით გარდაიცვალა... 2005 წლამდე იარსება მეტ-ნაკლებად ამ ყველაფერმა, 2005 წელს 72 წლის მამაჩემს 6 წელი მიუსაჯეს, რომელიც სრულად მოიხადა. „ქართული ოცნება“ ხელისუფლებაში რომ მოვიდა, 3 თვე ჰქონდა დარჩენილი, 3 თვით ადრე დატოვა პენიტენციარული დაწესებულება, სადაც დიდი ტანჯვა-წამება გამოიარა.
ციხეს შეეწირა მისი ჯანმრთელობა და სიცოცხლე. მხოლოდ 5 წელი იცოცხლა ციხიდან გამოსვლის შემდეგ. ეტლს იყო მიჯაჭვული რომ გამოვიდა... მამას დაჭერის შემდეგ სამწუხაროდ ყოველდღე არღვევდნენ ღობეს და ასე ნელ-ნელა გაიქცნენ ირმები,ზოგიც ჩახოცეს. ჩემი ძმა კი ცდილობდა შენარჩუნებას, მაგრამ არც სახელმწიფომ შეუწყო ხელი, არც რეგიონმა, არც სოფელმა...
- თუ გიფიქრიათ აღდგენაზე?
- აღდგენაზე კი გვიფიქრია, მაგრამ საკმაოდ სოლიდურ თანხებთან არის დაკავშირებული. ვეძებთ გზებს იქნებ ვინმე დაინტერესებული პირი გამოჩნდეს, ეს ყველაფერი აღვადგინოთ. თავის დროზე არავინ არ დაგვეხმარა, რომ შენარჩუნებულიყო და იმედია ოდესმე მაინც გამოჩნდება ვინმე, ვინც დაინტერესდება. ჩვენ ნელ-ნელა რასაც შევძლებთ, კი აღვადგენთ. ინფრასტრუქტურა 60-70 პროცენტი შენარჩუნებულია.
- ძალიან დიდი ყურადღება მიიპყრო გამოქვეყნებულმა კადრებამა, ამაზე რას იტყოდით?
- მამაჩემი სამეგრელოში და არა მარტო აქ ნამდვილად იყო ცნობადი სახე. ვერ გეტყვით, ამდენი ყურადღება რატომ მიიქცია ამ კადრებმა, მაგრამ უნიკალური კადრები ნამდვილად არის.
