სერბეთის პრეზიდენტმა, ალექსანდრ ვუჩიჩმა მიანიშნა, რომ ქვეყანაში აპრილში, შესაძლოა, ვადამდელი არჩევნები ჩატარდეს, - ინფორმაციას Reuters-ი ავრცელებს.
სატელევიზიო მიმართვაში ვუჩიჩმა განაცხადა, რომ მის პარტიას 10 დღე დასჭირდება იმის გადასაწყვეტად, უმრავლესობის მთავრობა შექმნას, თუ ვადამდელი საპარლამენტო არჩევნები ჩაატაროს.
შეგახსენებთ, სერბეთში მიმდინარე საპროტესტო აქციების ფონზე პრემიერ-მინისტრმა, მილოშ ვუჩევიჩმა გადადგომის გადაწყვეტილება მიიღო. სამთავრობო კორუფციის წინააღმდეგ საპროტესტო აქციების ტალღა, რომელსაც სტუდენტები ხელმძღვანელობენ, მას შემდეგ დაიწყო, რაც გასული წლის ნოემბერში ქალაქ ნოვი სადში რკინიგზის სადგურის სახურავი ჩამოინგრა, რასაც 15 ადამიანი ემსხვერპლა. აქციის მონაწილეები აცხადებენ, რომ ნგრევა კორუფციამ და არასათანადოდ შესრულებულმა სამშენებლო სამუშაოებმა გამოიწვია. მომხდარის გამო ბრალი წაუყენეს ცამეტ ადამიანს, მათ შორის სერბეთის ტრანსპორტის ყოფილ მინისტრს გორან ვესიჩს, რომელიც რკინიგზის სადგურის სახურავის ჩამონგრევიდან რამდენიმე დღეში გადადგა.