დამანგრეველი მიწისძვრა ტიბეტში: წინასწარი მონაცემებით, დაღუპულია 50-ზე მეტი ადამიანი - ფოტოები სტიქიის ადგილიდან

წინასწარი მონაცემებით, 53 ადამიანი დაიღუპა და 62 დაშავდა ჩინეთის ავტონომიურ რეგიონ ტიბეტში დღეს, 7 იანვარს მომხდარი დამანგრეველი მიწისძვრის შედეგად, რის თაობაზეც ინფორმაციას ადგილობრივ ხელისუფლებაზე დაყრდნობით ჩინეთის მედია ავრცელებს. მიწისძვრის შედეგად, მათი თქმით, ბევრი შენობა ჩამოინგრა. შემთხვევის ადგილიდან კადრებში ჩანს დანგრეული სახლები და ყველგან მიმოფანტული ნანგრევები.

ჩინეთის სეისმოლოგიური ცენტრის მონაცემებით, 6,8 მაგნიტუდის მიწისძვრა ადგილობრივი დროით დილის 9 საათზე მოხდა ტინგრის რაიონში, ნეპალთან საზღვრის მახლობლად.

აშშ-ის გეოლოგიური სამსახურის მონაცემებით, მიწისძვრა 7,1 მაგნიტუდის იყო.

მიწისძვრის ეპიცენტრი იყო დაახლოებით 80 კმ-ში მთა ევერესტის ჩრდილოეთით , მოგეხსენებათ, ეს მსოფლიოში ყველაზე მაღალი მთა და პოპულარული დანიშნულების ადგილია მთამსვლელებისთვის.

მიწისქვეშა ბიძგები იგრძნობოდა ნეპალის დედაქალაქ კატმანდუშიც, ასევე ტიბეტის შიგაცეს რეგიონში, სადაც 800 000 ადამიანი ცხოვრობს.

მიწისძვრამ ასევე შეარყია ბუტანის დედაქალაქი ტიმფუ და ჩრდილოეთ ინდოეთის შტატი ბიჰარი, რომელიც ესაზღვრება ნეპალს. ინდოეთის ოფიციალურმა პირებმა განაცხადეს, რომ ჯერჯერობით, მსხვერპლის ან ნგრევის შესახებ ინფორმაცია არ მიუღიათ.

ჩინეთის პრეზიდენტმა სი ძინპინმა თქვა, რომ ყოვლისმომცველი სამძებრო და სამაშველო სამუშაოები უნდა ჩატარდეს მსხვერპლის შესამცირებლად, დაზარალებულთა სათანადოდ მისახედად და მათი უსაფრთხოების უზრუნველსაყოფად.