ქართული ბიბლიოთეკები ნიდერლანდებსა და გერმანიაშიც გახსნა

"ბიბლუსისა" და წიგნიერების გამავრცელებელი საზოგადოების ინიციატივითა და მხარდაჭერით მსოფლიოს მასშტაბით ქართული ბიბლიოთეკების გახსნა გრძელდება.

ამჯერად ნიდერლანდებში გაიხსნა პირველი ქართული ბიბლიოთეკა.

"დიდი მადლობა ნიდერლანდების ქალაქებში მცხოვრებ ქართველებს, რომელთაც ATINATI - ის შესანიშნავ სივრცეში მოიყარეს თავი, სადაც კიდევ ერთხელ აღვნიშნეთ წიგნიერების მნიშვნელობა და მნიშვნელობა იმის, თუ რა ადგილი უჭირავს საქართველოს და მის კულტურას ევროპაში და რაოდენ მნიშვნელოვანია ჩვენი ქვეყნის ევროპული ცივილიზაციის ერთ მნიშვნელოვან ნაწილად ყოფნა.

გახსნას "ბიბლუსის" გენერალური დირექტორი ირაკლი გაგნიძე და ბელგიისა და ჰოლანდიის ეპისკოპოსი, მეუფე დოსითეოზი ესწრებოდნენ", - წერს წიგნიერების გამავრცელებელი საზოგადოების დამფუძნებელი გიორგი კეკელიძე.

როგორც ირკვევა, ნიდერლანდებში ქართული ბიბლიოთეკის მხარდამჭერი "ფონდი არველაძე" და მისი დამფუძნებელი შოთა არველაძე იქნებიან.

რამდენიმე დღეში კი, ქართული ბიბლიოთეკა უკვე გერმანიაში, კერძოდ, ქალაქ კარლსრუეში გაიხსნა, რაც ქართული სათვისტომოს დახმარებით მოხერხდა.

ქართული წიგნის კუთხე საზღვარგარეთ მანამდე შემდეგ ქალაქებში გაიხსნა: ემპოლი (იტალია) , ვროცლავი (პოლონეთი) ,სტამბოლი (თურქეთი) , ერევანი (სომხეთი), კარლსრუე (გერმანია).

"წელს, ჩვენი მოძრაობა ლიეტუვაში ქართული ბიბლიოთეკის გენერალური მხარდამჭერიც გახდა და 2025 წელს არაერთ ევროპულ ქალაქში ვგეგმავთ მსგავსი სივრცის მოწყობას", - აცხადებს გიორგი კეკელიძე.