რუსული კვალი ბაქო-გროზნოს ავიარეისის კატასტროფაში? - "მას რუსული თავდაცვის სისტემის ნამსხვრევი მოხვდა": რა ხდება ცნობილი თვითმფრინავის ჩამოვარდნის მიზეზებზე?
"აზერბაიჯანის ავიახაზების" სამგზავრო თვითმფრინავი, რომელიც ბაქო-გროზნოს რეისს ასრულებდა, 25 დეკემბერს ყაზახეთში ჩამოვარდა. ბორტზე 72 ადამიანი იმყოფებოდა, რომელთაგან 29 გადარჩა.
- ზოგიერთი საავიაციო ექსპერტი ვარაუდობს, რომ თვითმფრინავს რუსულმა საჰაერო თავდაცვის სისტემამ დაარტყა ჩეჩნეთის თავზე რაც ავიაკატასტროფის მიზეზი გახდა.
აზერბაიჯანის პროსამთავრობო მედია კი აქვეყნებს ექსპერტთა განცხადებებს, რომლებიც პირდაპირ აკისრებენ პასუხისმგებლობას რუსეთს და აცხადებენ, რომ ავიაკატასტროფის მიზეზი რუსული რაკკეტა იყო. აღსანიშნავია, რომ მსგავსი შინაარსის განცხადებები ამ ეტაპზე არ კეთდება აზერბაიჯანის ოფიციალური პირების, ხელისუფლების წარმომადგენლების მხრიდან, რასაც როგორც BBC წერს, თავისი მიზეზი აქვს და ალიევის ხელისუფლება ცდილობს არ გააღიზიანოს პუტინი და ელოდებიან კრემლის განცხადებას. თუმცა მანამდე შესაძლოა მივიჩნიოთ, რომ მათ პოზიციას მედია და ექსპერტები ახმოვანებენ,
-
ყაზახეთში ქალაქ აქთაუს მახლობლად ჩამოვარდნამდე თვითმფრინავი გადამისამართდა კასპიის ზღვის გასწვრივ.
კრემლის პრესსპიკერმა დიმიტრი პესკოვმა თქვა, რომ გამოძიების დასრულებამდე რაიმე ჰიპოთეზაზე საუბარი არასწორია. ‘სანამ გამოძიების დასკვნა არ იქნება, რაიმე ჰიპოთეზაზე საუბარი რა თქმა უნდა, არასწორი იქნება, ამას არ გავაკეთებთ და ეს არავინ არ უნდა გააკეთოს. ჩვენ უნდა დაველოდოთ გამოძიების დასრულებას“, - აღნიშნა პესკოვმა.
ყაზახეთის მთავარი პროკურორის განცხადებით, გამოძიებას ჯერ არ მიუღია არანაირი დასკვნა.
პარალელურად, აზერბაიჯანის პროსამთავრობო მედია აცხადებს, რომ აზერბაიჯანი ელის რუსეთისგან თვითმფრინავის ჩამოგდების აღიარებას.
-
რამდენიმე ტელევიზიამ, რომლებიც მკაცრად კონტროლდებიან აზერბაიჯანის მთავრობის მიერ, გამოაქვეყნა ინტერვიუები ექსპერტებთან, რომლებიც ღიად საუბრობენ, რომ მომხდარზე პასუხისმგებელი რუსეთია. ტელეარხ AnewZ-ის ცნობით, წინასწარი გამოძიების შედეგად დადგინდა, რომ თვითმფრინავს დაეჯახა რუსული თავდაცვის სისტემის Pantsir-S-ის ნამსხვრევები.
კიდევ ერთი პროსამთავრობო ვებგვერდი Caliber ციტირებს სამთავრობო წყაროებს და წერს - "არავინ ამტკიცებს რომ თვითმფრინავს განზრახ დაესხნენ თავს, მაგრამ ბაქო რუსეთისგან ბოდიშს ელოდება".
"ვინაიდან აზერბაიჯანი ცდილობს თავიდან აირიდონ რუსეთის პრეზიდენტის, ვლადიმერ პუტინის გაღიზიანება, აზერბაიჯანის მთავრობას გაუჭირდება რუსეთის პირდაპირ დადანაშაულება, თუ რუსეთი თვითონ არ აღიარებას ბრალეულობას.
როგორც ჩანს, აზერბაიჯანელი და ყაზახი ჩინოვნიკებისგან დაკომპლექტებულ საგამოძიებო კომიტეტს ამის მტკიცებულებები უკვე აქვთ, მაგრამ ჯერ რუსეთის მიერ გამოცხადებას ელოდებიან", - წერს BBC. აღსანიშნავია, რომ მომხდართან დაკავშირებით რუსული მედია აქტიურად წერს და აღნიშნავს, რომ ავიაკატასტროფის მიზეზი სავარაუდოდ, თვითმფრინავის ფრინველთან შეჯახება გახდა.