"თავდასხმა შობას - რა შეიძლება იყოს ამაზე არაჰუმანური?" - რუსეთის მორიგი შეტევა: რა ხდება უკრაინაში, სადაც მასიური თავდასხმა მიმდინარეობს (ფოტოები)

რუსეთი უკრაინის ენერგეტიკულ ინფრასტრუქტურაზე მასიურ თავდასხმას ახორციელებს, - ამის შესახებ ინფორმაციას უკრაინული მედია ქვეყნის ენერგეტიკის მინისტრზე, გერმან გალუშენკოზე დაყრდნობით ავრცელებს.

• "მტერი ენერგოსისტემას კვლავ მასიურად უტევს. როგორც კი უსაფრთხოების მდგომარეობა მათ ამის საშუალებას მისცემთ, ენერგეტიკოსები მიყენებულ ზარალს დააზუსტებენ“, - აცხადებს გერმან გალუშენკო.

საჰაერო განგაშის ხმა კვლავ მთელი უკრაინის მასშტაბით ისმის.

• პუტინმა თავდასხმისთვის შობა განზრახ აირჩია, რა შეიძლება იყოს ამაზე უფრო არაჰუმანური? - ამის შესახებ უკრაინის პრეზიდენტი, ვოლოდიმირ ზელენსკი სოციალურ ქსელში წერს.

"70-ზე მეტი რაკეტა, მათ შორის ბალისტიკური რაკეტები და ასზე მეტი დრონი. სამიზნე ჩვენი ენერგეტიკული ინფრასტრუქტურა იყო. ისინი უკრაინაში ელექტროენერგიის გათიშვის მცდელობებს აგრძელებენ“, - წერს უკრაინის პრეზიდენტი.

ვოლოდიმირ ზელენსკის ცნობით, უკრაინის თავდაცვის ძალებმა რუსების მიერ გაშვებული 50-ზე მეტი რაკეტა და დრონების უმეტესობა ჩამოაგდეს.

"რუსული ბოროტება უკრაინას ვერ გატეხს და შობას ვერ ჩაშლის“, - აღნიშნავს ვოლოდიმირ ზელენსკი.