"ბანკების ნაბიჯი დასაფასებელია არა გამოყოფილი თანხის, არამედ პროტესტისადმი სოლიდარობის და ევროპული არჩევანის მხარდაჭერის გამო, რაც ხელისუფლებასთან ურთიერთობის გაფუჭების სერიოზულ რისკებს შეიცავს" - ხუხაშვილი

როგორც ცნობილი გახდა, "თიბისი“ და "საქართველოს ბანკი“ ერთობლივად 5 000 000 ლარს გამოყოფენ, რომელიც დაზარალებული მოქალაქეების, მცირე და საშუალო ბიზნესების მხარდასაჭერად იქნება მიმართული. ამ საკითხს სოციალურ ქსელში ეხმაურება ექსპერტი გია ხუხაშვილი, რომელიც წერს:

"ბანკების მიერ გადადგმული ნაბიჯი, ჩემის აზრი, დასაფასებელია უპირველეს ყოვლისა არა გამოყოფილი თანხის, არამედ პროტესტისადმი სოლიდარობის და ევროპული არჩევანის ცალსახა მხარდაჭერის გამო, რაც უდავოდ ხელისუფლებასთან ურთიერთობის გაფუჭების სერიოზულ რისკებს შეიცავს.

ამიტომ მიმაჩნია, რომ ამ სიტუაციაში მათი კრიტიკა თანხის ოდენობის, ან “ალტერნატიული ფორმების” არ გამოყენების გამო არასწორია.

ასეთი დამოკიდებულება სხვა ბიზნესებსაც გაუქრობს სოლიდარობის სურვილს და ძლივს გახსნილ ნომენკლატურული კაპიტალიზმის სისტემას ისევ ჩაკეტავს.

ჩვენ უნდა გვესმოდეს, რომ ახლა ვიმყოფებით, ყველა სოციალ-ეკონომიკური და საზოგადოებრივ-პოლიტიკური ჯგუფის გაჯანსაღების პროცესის დასაწყისში და სიჩქარე, რომ ერთ დღეში გვინდა ყველაფერი მივიღოთ, მხოლოდ დამაზიანებელია და პრობლემას უქმნის ყველაფერს.

მადლობა მინდა გადავუხადო საქართველოს და თიბისი ბანკებს სახალხო ფინანსური ინსტიტუტის ფორმირებისკენ გადადგმული პირველი ნაბიჯებისთვის".