შეზღუდვები რიკოთზე და დიდთოვლობის გამო შექმნილი პრობლემები გზებზე - უამინდობა საქართველოში: სად რა ვითარებაა და როგორია უახლოესი დღეების პროგნოზი

17 დეკემბრიდან საქართველოში ამინდი კვლავ გაუარესდა. 19 დეკემბრამდე მოსალოდნელია დროგამოშვებით ნალექი, მთაში და მაღალ მთაში ზოგან ძლიერი თოვა და ქარბუქი, დასავლეთის მიმართულების ძლიერი ქარი, ზღვაზე 4-6 ბალიანი შტორმი.

გარემოს ეროვნული სააგენტოს ცნობით, მოსალოდნელმა ნალექებმა დასავლეთ საქართველოს მდინარეებზე შესაძლებელია წყლის დონეების მნიშვნელოვანი მატება, პატარა მდინარეებზე წყალმოვარდნები, გორაკ-ბორცვიან ზონებში მეწყრულ-ღვარცოფული პროცესების ჩასახვა-გააქტიურება, ხოლო ქვეყნის მაღალმთიან რაიონებში ზვავების ფორმირება გამოიწვიოს.

აკრძალვები გზებზე:

საავტომობილო გზების ცალკეულ მონაკვეთებზე დიდთოვლობის, ზვავსაშიშროების, ლიპყინულის და ხილვადობის გაუარესების გამო შესაძლებელია შეიზღუდოს ტრანსპორტის მოძრაობა. (საფრთხის დონე საშუალო).

ინტენსიური თოვის და დაბალი ტემპერატურის გამო, საერთაშორისო მნიშვნელობის თბილისი-სენაკი-ლესელიძის საავტომობილო გზის კმ133-კმ162 (სურამის სატრანსპორტო კვანძი-ბორითი) მონაკვეთზე, დროებით იზღუდება მისაბმელიანი და ნახევრადმისაბმელიანი ავტოტრანსპორტის მოძრაობა, ხოლო დანარჩენი სახის ავტოტრანსპორტის მოძრაობა თავისუფალია.

ასევე , რთული მეტეოროლოგიური პირობების (თოვა, ქარბუქი, შეზღუდული ხილვადობა და ზვავსაშიშროება) გამო, შიდასახელმწიფოებრივი მნიშვნელობის ქუთაისი(მოწამეთა)-ტყიბული-ამბროლაურის საავტომობილო გზის კმ39-კმ57 (ნაქერალას უღელტეხილი) მონაკვეთზე, იზღუდება ყველა სახის ავტოტრანსპორტის მოძრაობა.

რა ვითარებაა რეგიონებში:

დიდთოვლობაა რაჭაში. ამბროლაურის მუნიციპალიტეტში თოვლწმენდის და ელექტროენერგიის აღდგენის სამუშაოები დილიდან ინტენსიურ რეჟიმში დაიწყო.

დილიდან დაიწყო ქალაქ ამბროლაურის ცენტრალური ქუჩების გაწმენდითი სამუშაოები, რომელიც დღის მანძილზე საჭიროების მიხედვით აქტიურად გაგრძელდება და ყველა პრობლემურ მონაკვეთს ეტაპობრივად მოიცავს.

ცაგერის მუნიციპალიტეტში თოვლწმენდის და ელექტროენერგიის აღდგენის სამუშაოები დილიდან ინტენსიურ რეჟიმში დაიწყო. აქტიურად მიმდინარეობს ქალაქ ცაგერის ცენტრალური ქუჩების გაწმენდითი სამუშაოები. ასევე,ტექნიკა მუშაობს ზუბის, ლასურიაშის, ლაილაშის, ქვედა ცაგერის მიმართულებით. დღის მანძილზე აქტიურად გაგრძელდება თოვლწმენდის სამუშაოები და ეტაპობრივად, ქალაქის ყველა პრობლემურ მონაკვეთს და სოფელს მოიცავს.

ონის მუნიციპალიტეტში თოვლწმენდის სამუშაოები დილიდან ინტენსიურ რეჟიმში დაიწყო. გადაადგილებასთან დაკავშირებული პრობლემების თავიდან აცილების მიზნით, ქალაქ ონში დილიდან მიმდინარეობს ცენტრალური და შიდა საუბნო გზების გაწმენდითი სამუშაოები. დიდთოვლობის შედეგად შექმნილი პრობლემების აღმოსაფხვრელად ონის მუნიციპალიტეტში ყველა საჭირო ღონისძიებების გატარება აქტიურ რეჟიმში გაგრძელდება და ეტაპობრივად გაიწმინდება მუნიციპალიტეტის ყველა ადმინისტრაციული ერთეულის ცენტრალური გზა და პრობლემური ადგილები.