სპეცრაზმმა რუსთაველის გამზირი და პარლამენტის მიმდებარე ქუჩები მომიტინგეებისგან სრულად გაათავისუფლა - დემონსტრანტებმა ბარიკადები აღმართეს: ბოლო ცნობები

რუსთაველის გამზირი, კერძოდ კი, პარლამენტის, როგორც წინა ტერიტორია, ისე გვერდითა ქუჩები მომიტინგეებისგან სრულად გაათავისუფლეს. წყლის ჭავლი გამოიყენეს როგორც რუსთაველის გამზირზე, ასევე ჭიჭინაძის ქუჩაზე. სპეცრაზმელები პერიოდულად სხვადასხვა სპეციალურ საშუალებებს იყენებდნენ.

• აქციის მონაწილეებმა “ცისფერი გალერეის“ მიმდებარე ტერიტორიაზე ნაგვის ურნებისგან ბარიკადები აღმართეს. რამდენიმე წუთში კი დემონსტრანტებმა ურნების დაწვა დაიწყეს.

• პარლამენტთან, დაშავებულ აქციის მონაწილეებს სასწრაფო დახმარების მანქანებში პირველად დახმარებას უწევენ - არსებული ინფორმაციით, დაშავებულები არიან სამართალდამცავებიც

რუსთაველის გამზირზე მიმდინარე აქციის დაშლისას რამდენიმე მომიტინგე დაშავდა. მათ ამ წუთებში სასწრაფო დახმარების მანქანებში სამედიცინო დახმარებას უწევენ. ამასთან, არსებული ინფორმაციით, 10-მდე სამართალდამცავი დაშავდა, რომელთა ნაწილიც კლინიკებშია გადაყვანილი.

ვრცელდება ინფორმაცია, რომ აქციაზე დაშავდა და შეუძლოდ გახდა “კოალიცია ცვლილებისთვის” ერთ-ერთი ლიდერი ელენე ხოშტარია.

უცნობია, თუ რამდენი პირია საერთო ჯამში დაშავებული, ან სამართალდამცავთა მიერ დაკავებული.

• განახლება 03:21

სპეცრაზმმა “ცისფერი გალერეის“ მიმდებარედ ბარიკადები წყლის ჭავლის გამოყენებით დაშალა - სამართალდამცველები აკავებენ მომიტინგეებს

სამართალდამცველებმა რუსთაველის გამზირზე აქციის რამდენიმე მონაწილე დააკავეს.

დაკავებისას აქციის მონაწილეები წინააღმდეგობას უწევდნენ სამართალდამცველებს, რის გამოც პოლიციამ მათი მიმართულებით წიწაკის სპრეი გამოიყენა.

სპეცრაზმმა მომიტინგეების წინააღმდეგ წყლის ჭავლი კიდევ ერთხელ გამოიყენა და რუსთაველის გამზირზე, “ცისფერი გალერეის“ მიმდებარედ, უშუალოდ იმ ტერიტორიისკენ მიემართებიან, სადაც აქციის მონაწილეები კვლავაც რჩებიან.

• 03:26

სპეცრაზმის მიერ აქციის დაშლის მიუხედავად დემონსტრანტები კვლავ რჩებიან რუსთაველის გამზირის მიმდებარედ გარკვეულ მონაკვეთებზე - ალექსანდროვის ბაღთან, ჯორჯაძის ქუჩაზე და “ცისფერ გალერეასთან”

სამართალდამცავებმა დემონსტრანტებისგან რუსთაველის გამზირზე პარლამენტის შენობის მიმდებარე ტერიტორიიდან “თბილისი მერიოტამდე“ მონაკვეთი გაათავისუფლეს. ამ დროისთვის, დემონსტრანტები სამ ადგილას - ალექსანდროვის ბაღთან, ჯორჯაძის ქუჩაზე და “ცისფერი გალერეის“ მიმდებარე ტერიტორიაზე კვლავ რჩებიან.

სამართალდამცავები პერიოდულად იყენებენ ე.წ. გაზის კაფსულებსა და წყლის ჭავლს, თუმცა, მომიტინგეები დაშლას არ აპირებენ. მათ ნაგვის ურნებითა და სხვადასხვა ნივთებით ბარიკადები აქვთ აღმართული.

მიმდებარე ტერიტორიაზევე მობილიზებული არიან სასწრაფო სამედიცინო დახმარების მანქანები, რომლებიც დაშავებულ მოქალაქეებს დახმარებას უწევენ.

იხილეთ ასევე:

• სამართალდამცავებმა დემონსტრანტების დაშლა დაიწყეს - საპოლიციო ძალები შეკრებილების წინააღმდეგ წყლის ჭავლს იყენებენ (ვიდეო)
• პირველი გაფრთხილება გაჟღერებულია - სპეცრაზმი დარბევისთვის ემზადება: მომიტინგეები გააფრთხილეს, რომ ტერიტორია დატოვონ