უკიდურესად დაძაბულია ვითარება ჭიჭინაძის ქუჩაზე: პოლიციამ გამოიყენა "წიწაკის სპრეი" - ადგილი ჰქონდა დაპირისპირებას
ამ წუთებში დაძაბული ვითარებაა პარლამენტთან, ჭიჭინაძის ქუჩაზე. აქციის მონაწილეებს სამართალდამცავები გადადგილების საშუალებას არ აძლევენ, რის გამოც მათ შორის რამდენჯერმე დაიძაბა ვითარება.
- ადგილზე რამდენჯერმე გამოიყენეს "წიწაკის სპრეი". აქციაზე მყოფი პირები პოლიციამ სავარაუდოდ რამდენიმე მოქალაქეც დააკავა.
ადგილზე შეკრებილი მოქალაქეები მიმართავენ პოლიციელებს, რომ "მოიხსნან ნიღბები და გადავიდნენ ხალხის მხარეს". აქციის მონაწილეების ლაზერებს ანათებენ ადგილზე მყოფ სამართალდამცავებს.
მიმდინარე აქციის გამო რუსთაველის გამზირი გადაკეტილია ამ დროისთვის. ცოტა ხნის წინ შინაგან საქმეთა სამინისტრო აქციის ორგანიზატორებს, პოლიტიკურ ლიდერებს და მონაწილეებს, პროტესტი გამოხატონ კანონით დადგენილ ფარგლებში.
ამავე განცხადების თანახმად, აქციის წევრების მხრიდან პოლიციის მიმართ განხორციელებული სავარაუდო ძალადობრივი ქმედების შედეგად, დაშავდა შსს-ს თანამშრომელი.
"შინაგან საქმეთა სამინისტროს წარმომადგენლები, მობილიზებულები არიან საკანონმდებლო ორგანოს მიმდებარე ტერიტორიაზე და იცავენ მართლწესრიგს.
პოლიციის მხრიდან, ადგილზე მყოფი აქციის მონაწილეების მიმართ, გაკეთებული არაერთი მოწოდებისა, რომ პროტესტი გამოხატონ მშვიდობიან ფორმებში და არ გასცდნენ შეკრება-მანიფესტაციის კანონით დადგენილ ნორმებს, შეკრებილთა ნაწილი, სამართალდამცველებს უპირისპირდება და მათ სიტყვიერ შეურაცხყოფას აყენებს.
ასევე, საზოგადოებას ვაცნობებთ, რომ აქციის წევრების მხრიდან, პოლიციის მიმართ განხორციელებული სავარაუდო ძალადობრივი ქმედების შედეგად, დაშავდა შინაგან საქმეთა სამინისტროს ერთი თანამშრომელი, რომელიც სამედიცინო დაწესებულებაშია გადაყვანილი.
კიდევ ერთხელ მოვუწოდებთ აქციის წევრებს, თავი შეიკავონ ძალადობრივი ქმედებებისგან და პროტესტი გამოხატონ კანონით დადგენილი ნორმების შესაბამისად“, - ნათქვამია ინფორმაციაში.
ფოტოები: ინტერპრესნიუსი