“ხელისუფლება არის თვითმარქვია, ეს არჩევნები არის ტოტალურად გაყალბებული - პარლამენტი ვერ შედგება“ - “ერთიანობა ნაციონალურმა მოძრაობამ“ ცესკოს სიების გაუქმების მოთხოვნით მიმართა

ოპოზიციურმა გაერთიანებებმა საპარლამენტო სიის ჩახსნის გადაწყვეტილება მიიღეს.

“ჩვენ უარს ვამბობთ მანდატები მივიღოთ იმ საპარლამენტო არჩევნების შედეგად, სადაც ადგილი ჰქონდა ტოტალურ გაყალბებას“, - ამის შესახებ “ერთიანობა-ნაციონალური მოძრაობის“ ლიდერმა, თინა ბოკუჩავამ დღეს გამართულ ბრიფინგზე განაცხადა.

როგორც მან აღნიშნა, ცესკო-ს არ აქვს უფლება უფლებამოსილების ცნობის მიზნით “ერთიანობა-ნაციონალური მოძრაობის“ წევრების საბუთები პარლამენტში გადააგზავნოს.

“არჩევნების დღესვე ცხადი იყო, რომ აღნიშნული არჩევნები არ ასახავდა საქართველოს მოქალაქეების თავისუფალ ნებას. “ერთიანობა - ნაციონალური მოძრაობის" სახელით, ჩვენ განვაცხადეთ, რომ არ ვცნობთ ამ არჩევნების ლეგიტიმურობასა და უარს ვაცხადებთ საპარლამენტო მანდატებზე.

დღეს გვინდა ოფიციალურად, თითოეულმა ჩვენგანმა, ვინც იყო “ერთიანობა- ნაციონალური მოძრაობის“ საპარლამენტო სიაში, ინდივიდუალური წერილით მივმართოთ ცენტრალურ საარჩევნო კომისიას, რათა არცერთი კანდიდატი “ერთიანობა - ნაციონალური მოძრაობის“ სახელით არ გატარდეს რეგისტრაციაში და ჩვენი უფლებამოსილების საკითხი ცენტრალურმა საარჩევნო კომისიამ არ გადასცეს საქართველოს პარლამენტს, განსახილველადაც კი.

ჩვენი თავისუფალი ნების გამოხატვაა ის წერილები, რომელსაც ჩვენ ცენტრალურ საარჩევნო კომისიაში ვაგზავნით. ვითხოვთ, რომ არცერთ ჩვენგანზე, არცერთ პირზე, რომელიც ფიგურირებდა “ერთიანობა-ნაციონალური მოძრაობის“ საპარლამენტო საარჩევნო სიაში, არ მოხდეს დროებითი მანდატის გაცემა, ჩვენ არ გაგვატარონ რეგისტრაციაში და შესაბამისად, პარლამენტს არ გადაეგზავნოს ჩვენი სახელები და გვარები ჩვენი უფლებამოსილების ცნობის მიზნით. ეს არის ჩვენი თავისუფალი ნება და ჩვენ ამ თავისუფალ ნებას ჩვენი ხელმოწერით ვადასტურებთ.

უარს ვამბობთ მანდატები მივიღოთ იმ საპარლამენტო არჩევნების შედეგად, სადაც ადგილი ჰქონდა ტოტალურ გაყალბებას, სადაც დარღვეული იყო კონსტიტუციის უმნიშვნელოვანესი პრინციპი ფარულობის სახით და შესაბამისად, არ იყო გამოხატული ქართველი ხალხის თავისუფალი ნება; სადაც ადგილი ჰქონდა უამრავ სხვა მაქინაციას და მასობრივ დარღვევას, რომლის შედეგებსაც არ აღიარებს ცივილიზებული სამყარო. ჩვენ ეს ვიხილეთ მათ შორის გუშინ, როცა საქართველოს ევროპელი მეგობრები იმყოფებოდნენ აქ და მიმართავდნენ ქართველ ხალხს, რომელსაც არც კი შეხვდა ხელისუფლების წარმომადგენელი. მათი ვიზიტი კიდევ ერთხელ ადასტურებს, რომ არალეგიტიმურ არჩევნებს არ ექნება აღიარება ცივილიზებული სამყაროს მხრიდან; არ ექნება აღიარება ოპოზიციის მხრიდან და ჩვენ ჩვენი ხელმოწერით, კიდევ ერთხელ, ვადასტურებთ, რომ ცესკო-ს არ აქვს უფლება უფლებამოსილების ცნობის მიზნით ჩვენი საბუთები პარლამენტში გადააგზავნოს,“ - განაცხადა ბოკუჩავამ.

• იგივე პოზიციას იზიარებს “ერთიანობა-ნაციონალური მოძრაობის“ ლიდერი, გიორგი ვაშაძე. მისი თქმით, “არჩევნები არის ტოტალურად გაყალბებული, გადაწერილი შედეგებით“.

მისი შეფასებით, “ხელისუფლება არის თვითმარქვია“ და ოპოზიცია მანდატებზე უარს ამბობს.

“მივმართეთ კონკრეტულ პროცედურას და მოვითხოვთ, რომ შემაჯამებელ ოქმამდე იყოს ეს განცხადებები წარდგენილი, რომ ჩვენი სახელებითა და გვარებით, არავითარი პროცედურა არ განახორციელოს ცესკო-მ. ძალიან მნიშვნელოვანია ამ პროცედურას მივმართოთ. ამით კიდევ ერთხელ ვამბობთ, რომ რა მექანიზმიც არ უნდა დაგვჭირდეს, ყველა მექანიზმს გამოვიყენებთ იმისთვის, რომ ამ პარლამენტის არალეგიტიმურობა იყოს ცნობილი. ეს არის აბსოლუტურად თვითმარქვია პროცესი, ხელისუფლება არის თვითმარქვია. რეალურად, ძალაუფლება ხალხს ეკუთვნის. ეს არჩევნები არის ტოტალურად გაყალბებული, გადაწერილი შედეგებით და ამის წინააღმდეგ ბრძოლას ბოლომდე გავაგრძელებთ. ჩავხსენით სიები, ინდივიდუალური განცხადებით დასაბუთებულად მივმართავთ ცესკოს, რომ არ შეიყვანოს ჩვენი სახელები და გვარები შემაჯამებელ ოქმში შესაბამისი პარტიების სიიდან. ფაქტობრივად, სამართლებრივად დასაბუთებულია, რომ პარლამენტი ვერ შედგება“,- განაცხადა ვაშაძემ.

• “ამ პარლამენტში მუშაობას არ ვაპირებთ“, - განუცხადა “ერთიანობა ნაციონალური მოძრაობის” ერთ-ერთმა ლიდერმა, გიგი წერეთელმა ჟურნალისტებს.

მისი შეფასებით, 26 ოქტომბრის არჩევნებზე სხვადასხვა სახის დარღვევა იყო, რის გამოც ისინი არჩევნების შედეგებს არ აღიარებენ და საკუთარ მანდატებზე უარს ამბობენ.

“მას შემდეგ, რაც ე.წ არჩევნების შედეგები გამოცხადდა, ყველამ
ძალიან კარგად დაინახა ქვეყნის შიგნით და გარეთაც რამდენი მანიპულაცია იყო. ჩვენ არაერთხელ მკაფიოდ განვაცხადეთ, რომ არ ვაპირებთ ამ პარლამენტის და მთლიანად, ამ პროცესის ლეგიტიმაციას, არჩევნები აღიარებული არ არის. დღეს ეს განცხადებები გამყარდა კონკრეტული წერილობითი განცხადებით, რომელიც ცესკო-გადაეცემა იმისთვის, რომ არ გატარდეს ამ არჩეული დეპუტატების გვარები საბოლოო ოქმებში. ამით კიდევ ერთხელ ვადასტურებთ იმას, რომ ამ პარლამენტში მუშაობას არ ვაპირებთ. თუ ვინმეს კითხვის ნიშანი ჰქონდა, დღეს უკვე არის კონკრეტული წერილობითი განცხადებით გამყარებული“, - განაცხადა წერეთელმა.

ცნობისთვის, “ერთიანობა-ნაციონალური მოძრაობა“ საპარლამენტო მანდატებზე უარს ამბობს. საპარლამენტო სიის ჩახსნის გადაწყვეტილება კიდევ ერთმა ოპოზიციურმა კოალიციამ კოალიცია “ცვლილებებისთვის“ მიიღო.

იხილეთ ასევე:

“ყველა, ვინც საარჩევნო სიაში ვართ, უარს ვაცხადებთ ნებისმიერი ფორმით თანამშრომლობაზე რეჟიმთან - პარლამენტი არალეგიტიმურია“ - ნიკა გვარამია