შვედი ეკოაქტივისტი, გრეტა ტუნბერგი დღეს, 11 ნოემბერს, 19:00 საათზე თავისუფლების მოედანზე (პუშკინის პარკი) აქციას გამართავს.

X-ზე გავრცელებულ წერილში, რომელშიც აქტივისტი საზოგადოებას აქტიურობისკენ მოიწოდებს, ასევე ძირითად აქცენტს აზერბაიჯანზე და ბაქოში დაგეგმილ გაეროს კლიმატის კონფერენციაზე (COP29) აკეთებს.

“შემოგვიერთდით, როდესაც გავერთიანდებით ავტორიტარიზმისა და ექსპლუატაციის ტალღის წინააღმდეგ, რომელიც ვრცელდება კავკასიაში. ჩვენ მხარს ვუჭერთ რეალურ თავისუფლებას, თანასწორობას, სამართლიანობას და რეგიონს, სადაც ხალხი პირველ ადგილზეა და არა სარგებელი“, - წერს ტუნბერგი პლატფორმა X-ზე.

• შვედი აქტივისტი, რომელიც კლიმატის ცვლილებებისთვის იბრძვის, საქართველოში პირველად მიმდინარე წლის 4 ნოემბერს გამოჩნდა.

სიახლის შესახებ საზოგადოებას “თბილისი პრაიდის” თანადამფუძნებელმა და ლგბტ ქვიარ აქტივისტმა მარიამ კვარაცხელიამ ამცნო.

გრეტა იმავე საღამოს შეუერთდა თბილისში გამართულ საპროტესტო აქციას.

• "აქ ვიმყოფები, რათა გამოვხატო ჩემი მხარდაჭერა და სოლიდარობა ყველა აქტივისტისა და მოქალაქის მიმართ, რომლებიც თავიანთი ფუნდამენტური უფლებების, როგორიცაა თავისუფლება, სამართლიანობა და დემოკრატია, დასაცავად გამოდიან. ეს აღმაშფოთებელი განვითარებაა, ავტორიტარული განვითარებაა, რომელიც ახლა საქართველოში ხდება და მე დიდ პატივს ვცემ იმ ხალხს, ვინც ისევ და ისევ ქუჩებს ავსებს და დემონსტრაციის უფლებას იყენებს, რათა ჩაგვრის მიუხედავად, არსებული მდგომარეობის მიმართ, თავიანთი უკმაყოფილება გამოხატოს“, - განაცხადა მან.

აღსანიშნავია, რომ გრეტა ტუნბერგის ჩამოსვლა საქართველოში, მიმდინარე საპროტესტო აქციებს დაემთხვა. პროტესტის სერიებს 26 ოქტომბრის საპარლამენტო არჩევნების შემდეგ, სხვადასხვა ოპოზიციური პარტიის წარმომადგენლები და საზოგადოებრივი მოძრაობები აორგანიზებენ. ისინი მიიჩნევენ, რომ არჩევნები გაყალბდა, “ქართულმა ოცნებამ“ ამომრჩეველთა ხმის უმრავლესობა საარჩევნო პროცესის გაყალბებით მოითხოვა და არჩევნების ხელახლა ჩატარებას ითხოვენ.

• თუმცა, ვიდრე გრეტა ტუნბერგი საქართველოში გამოჩნდებოდა, საკმაოდ ვრცელი გზა განვლო.

ის 15 წლის იყო, როდესაც 2018 წელს, შვედეთის პარლამენტის წინ პარასკევობით ერთ ადამიანის საპროტესტო გაფიცვა დაიწყო - მაშინ მოზარდი შვედეთის მთავრობას კლიმატის ცვლილებების წინააღმდეგ აქტიურ ჩართულობას სთხოვდა.

დროთა განმავლობაში მის მოძრაობას “პარასკევები მომავლისთვის“ (FFF), რომლის ფარგლებშიც მოოსწავლეები სკოლის ნაცვლად, კლიმატის ცვლილების გასაპროტესტებლად ქუჩაში გადიოდნენ, 2018-დან 2021 წლამდე, 24 ქვეყნიდან 17 000 სტუდენტი შეუერთდა.

• ბავშვობა

გრეტა ტინტინ ელეონარა ერნმან ტუნბერგი შვედეთში, კერძოდ სტოკჰოლმში, 2003 წელს დაიბადა. მისი დედა მსახიობი მალენა ერნმანი, ხოლო მამა- სვანტე ტუნბერგია.

მოგვიანებით გოგონას ასპერგერის სინდრომი დაუდგინეს - ეს არის განვითარების დარღვევა, რომელიც პირველად 1944 წელს ავსტრიელმა ფსიქიატრმა H.Asperger-მა აღწერა. აღნიშნული სინდრომის მქონე ბავშვებს ნორმალური ინტელექტისა და განვითარებული მეტყველების ფონზე ახასიათებთ სოციალური ურთიერთობების დეფიციტი, კომუნიკაციის სირთულე და უცნაური, ექსცენტრული ქცევები.

TEDxStockholm-ზე გამოსვლისას თინეიჯერმა აქტივისტმა თავის დაავადებაზეც ისაუბრა და აღნიშნა: "მე მხოლოდ მაშინ ვლაპარაკობ, როცა საჭიროა და ახლა სწორედ ის დროა, ვილაპარაკო".

დიაგნოზს მისთვის ხელი არ შეუშლია, რომ ადრეულ ასაკშივე ოჯახი და მეგობრები ეკოლოგიურად სუფთა არჩევანის გაკეთებაში დაერწმუნებინა.

• "როგორ ბედავ!" - გლობალური პოპულარობა

2019- 2020 წლებში, კლიმატის აქტივიზმზე ფოკუსირებისთვის გრეტამ სკოლა დატოვა. 2019 წლის აპრილში ტუნბერგმა ევროპარლამენტს ამაღელვებელი სიტყვით მიმართა. მოზარდის გაბრაზებულმა, თვალცრემლიანმა და პრინციპულმა მიმართვამ მსოფლიო ლიდერების ყურადღება მიიპყრო. გრეტამ განაცხადა, რომ “მსოფლიო მეექვსე მასობრივი გადაშენების ზღვარზე იყო“ და ლიდერებს სთხოვდა სწრაფად ემოქმედათ.

რამდენიმე დღის შემდეგ მან ბრიტანელ კანონმდებლებს ვესტმინსტერში ლექცია წაუკითხა და თქვა:

”თქვენ არ უსმენთ მეცნიერებას, რადგან გაინტერესებთ მხოლოდ გადაწყვეტილებები, რომლებიც საშუალებას მოგცემთ გააგრძელოთ ცხოვრება ისე, როგორც ადრე.”

2019 წლის სექტემბერში მან იახტით გადაკვეთა ატლანტის ოკეანე ნიუ- იორკში გაეროს კლიმატის სამოქმედო სამიტზე გამოსვლისთვის.

ტუნბერგმა გააკრიტიკა მსოფლიო ლიდერები კლიმატის ცვლილებაზე მოქმედებაზე უარის თქმის გამო. მისმა გამოსვლამ მილიონობით ნახვა და გაზიარება მოიპოვა სოციალურ მედიაში...

“ახლა აქ არ უნდა ვიდგე, სკოლაში უნდა ვიყო, ოკეანის გაღმა. როგორ ბედავთ? ჩემი ოცნებები და ჩემი ბავშვობა ცარიელი სიტყვებით მომპარეთ. ახალგაზრდები უკვე ხვდებიან, რომ გვიღალატეთ. მომავალი თაობები თქვენ შემოგცქერიან და თუ არ გაამართლებთ ჩვენს იმედებს, არასოდეს გაპატიებთ", - მიმართა აუდიტორიას 16 წლის მოსწავლემ.

მისი სკანდალური გამოსვლა ვირუსულად გავრცელდა. ათასობით ადამიანმა გააზიარა ვიდეო, ტუნბერგის გამოსვლაზე აშშ-ის იმჟამინდელი პრეზიდენტის, დონალდ ტრამპის რეაქციაც ჩანს - მაშინ ბევრი წერდა, რომ გოგონას აქტიურობამ ტრამპი გააღიზიანა.

2019 წლის ბოლოს, TIME Magazine-მა დუეინ ჯონსონთან და სხვა გავლენიან ადამიანებთან ერთად ტუნბერგი "წლის ადამიანად" დაასახელა.

2019 წელსვე გრეტა წლის ადამიანად დაასახელა ჟურნალმა Time - მაც . ასევე 2019 და 2020 წელს იყო ნომინირებული ნობელის პრემიაზე.

ჟურნალმა Nature-მა ის ერთ-ერთ ყველაზე გავლენიან მეცნიერ ადამიანებს შორის დაასახელა, ხოლო Apolitical.co-მ იგი "კლიმატის პოლიტიკაში ყველაზე გავლენიან 100 ადამიანს" შორის შეიყვანა.

2021 წლისთვის გრეტა ტუნბერგს უკვე მიღებული ჰქონდა ჯილდოს სახით 2,5 მილიონ დოლარზე მეტი. გარდა ამისა, აქტივისტმა ხელი მოაწერა წიგნების გამომცემლებთან და მონაწილეობა მიიღო სატელევიზიო შოუებში.

2020 წელს შედგა მისი დოკუმენტური ფილმის “მე ვარ გრეტა“ პრემიერა. 2021 წელს მან ითამაშა ფილმში "გრეტა ტუნბერგი: ერთი წელი მსოფლიოს შესაცვლელად".

Celebritynetworth- ის ინფორმაციით, ეკოაქტივისტის ქონება 100 000 დოლარია. თუმცა, ვრცელდება დაუდასტურებელი ინფორმაცია, რომ მისი ოჯახი დაახლოებით 10- დან 18 მილიონამდე დოლარს ფლობს.

იხილეთ ასევე:

• ვინ ჩამოიყვანა გრეტა ტუნბერგი საქართველოში და რა არის მისი ვიზიტის მიზანი? - რას წერს ეკოაქტივისტის ქართველი მასპინძელი
• "ოცნებები და ბავშვობა წამართვით, როგორ ბედავთ?!" - 16 წლის გოგოს გამოსვლა გაერო-ს სამიტზე ინტერნეტით ვირუსულად ვრცელდება