ირანმა სიკვდილით დასაჯა გერმანელ-ირანელი დისიდენტი - მას ბრალი ედებოდა "დედამიწაზე კორუფციისთვის"

ირანმა სიკვდილით დასაჯა გერმანელ-ირანელი დისიდენტი ჯამშიდ შარმაჰდი, რომელიც ტერორისტული ოპერაციების ხელმძღვანელობისთვის იყო მსჯავრდადებული, - ამის შესახებ ინფორმაციას BBC-ი ადგილობრივ სახელმწიფო მედიაზე დაყრდნობით ავრცელებს.

გამოცემის ცნობით, შარმაჰდს, რომელსაც ბრალი აშშ-ში დაფუძნებული პრომონარქისტული ჯგუფის ხელმძღვანელობაში დასდეს, სიკვდილით დასჯა შარშან ე.წ. "დედამიწაზე კორუფციისთვის“ მიუსაჯეს.

• ჯამშიდ შარმაჰდი ბრალდებას უარყოფდა, მისი ოჯახი კი ამტკიცებდა, რომ ის მხოლოდ სპიკერი იყო.

გერმანიის საგარეო საქმეთა მინისტრის, ანალენა ბერბოკის განცხადებით, ბერლინმა არაერთხელ გააფრთხილა თეირანი, რომ გერმანიის მოქალაქის სიკვდილით დასჯას სერიოზული შედეგები მოჰყვებოდა.

"ჯამშიდ შარმაჰდის მკვლელობა გვიჩვენებს, თუ როგორი არაჰუმანური რეჟიმი მართავს ირანს", - დაწერა ბერბოკმა სოციალურ პლატფორმა X-ზე.