“კოალიციაში არავინ აპირებს აქოთებული მანდატით ისარგებლოს - არ ვაპირებთ წუწუნს, ხელების და ყურების ჩამოყრას“ - ალეკო ელისაშვილი

“კოალიციაში არავინ აპირებს იმ აქოთებული მანდატით ისარგებლოს, პარლამენტში შესვლა კი არ გვჭირდება, ქვეყანა გვაქვს დასაბრუნებელი“, - ამის შესახებ “ძლიერი საქართველოს“ ერთ-ერთმა ლიდერმა, ალეკო ელისაშვილმა პრეზიდენტ სალომე ზურაბიშვილთან შეხვედრამდე მედიასთან განაცხადა.

ალეკო ელისაშვილის თქმით, ოპოზიცია ახლა აპირებს მოქმედებას და არა წუწუნს და ხელების ჩამოყრას.

“კოალიცია ძლიერი საქართველოს“ პოზიცია იცით ყველამ. ჩვენ არ ვაღიარებთ ამ სისაძაგლეს, რასაც არჩევნები დაარქვეს. პრეზიდენტთან მოვედით, რომ აზრები გავცვალოთ და სამოქმედო გეგმაზე შევთანხმდეთ იმიტომ, რომ ახლა გვჭირდება მოქმედება. არავინ არ ვაპირებთ წუწუნს, ხელების და ყურების ჩამოყრას, ვაპირებთ მოქმედებას. დღეს რა უნდა გავაკეთოთ, ხვალ რა უნდა გავაკეთოთ, ზეგ რა უნდა გავაკეთოთ. ამაზე უნდა შევთანხმდეთ, რომ ეს ქვეყანა დავიბრუნოთ და გამოვგლიჯოთ რუსეთს ხელიდან“, - განაცხადა ალეკო ელისაშვილმა.

ორბელიანების სასახლეში ოთხი ოპოზიციური ძალის - "ერთიანობა - ნაციონალური მოძრაობის", "კოალიცია ცვლილებისთვის", "ძლიერი საქართველოსა" და "გახარია საქართველოსთვის" წარმომადგენლები პრეზიდენტს ხვდებიან. როგორც ცნობილია, 21:00 საათზე პრეზიდენტი, სალომე ზურაბიშვილი განცხადების გაკეთებას გეგმავს.

იხილეთ ასევე:

• “არ ვაპირებთ ამ პარლამენტში შესვლას, ჩათვალეთ, სიები არ არსებობს!“ - პროტესტს გიორგი ვაშაძე და თინა ბოკუჩავა უერთდება: რა ხდება ამ დროისთვის ცნობილი
• “აუცილებლად ვიბრძოლებთ ქართველი ხალხის ხმების დასაცავად!“ - “კოალიცია ცვლილებისთვის“ საპარლამენტო სიის პირველი ოცეული მანდატებზე უარს ამბობს