“არ ვაპირებთ ამ პარლამენტში შესვლას, ჩათვალეთ, სიები არ არსებობს!“ - პროტესტს გიორგი ვაშაძე და თინა ბოკუჩავა უერთდება: რა ხდება ამ დროისთვის ცნობილი
ოპოზიციის ლიდერთა ნაწილი აცხადებს, რომ პარლამენტში შესვლაზე უარს ამბობენ.
თავდაპირველად აღნიშნულის შესახებ განცხადება “კოალიცია ცვლილებისთვის“ საპარლამენტო სიის პირველმა ნომერმა, ნანა მალაშხიამ განაცხადა. მისი თქმით, მანდატებზე უარს საპარლამენტო სიის პირველი ოცეული აცხადებს.
იგივე პოზიცია დაადასტურა თინა ბოკუჩავამ.
“ბუნებრივია, როდესაც ვთქვით, რომ ჩვენ არ ვაღიარებთ საარჩევნო შედეგს, ეს, რა თქმა უნდა, თავისთავად გულისხმობს იმას, რომ არ ვაპირებთ პარლამენტში შესვლას“, - განაცხადა “ერთიანობა - ნაციონალური მოძრაობის“ თავმჯდომარემ.
თინა ბოკუჩავას თქმით, ქართველი ხალხის გუშინდელი “ისტორიული არჩევანი ივანიშვილმა მოიპარა“.
“ჩვენ ვიყავით პირველი, ვინც გავაკეთეთ განცხადება იმასთან დაკავშირებით, რომ გუშინდელი ისტორიული არჩევნები მოიპარა ივანიშვილმა. ეს არის ქართველი ხალხის ნების ტოტალური უგულებელყოფა. რეალურად, ადგილი ჰქონდა, რუსული ტიპის სპეცოპერაციას ქართველი ხალხის წინააღმდეგ, რომელმაც აირჩია ევროპული მომავალი. ივანიშვილმა მიიტაცა ეს გამარჯვება“, - განაცხადა თინა ბოკუჩავამ.
- “ერთიანობა - ნაციონალური მოძრაობის“ ერთ-ერთი ლიდერის, გიორგი ვაშაძის თქმით, საჭიროა პროტესტი და ამ პროცესში ოპოზიციას საზოგადოებისგან სრული მხარდაჭერა ექნება.
“ჩვენ მზად ვართ აბსოლუტურად ყველა მოქმედებისთვის. გუშინ გავაკეთეთ განცხადება, რომ არ ვაღიარებთ შედეგებს, ეს ნიშნავს, რომ არ ვაპირებთ ამ პარლამენტში შესვლას, ჩათვალეთ, სიები არ არსებობს ჩვენი მხრიდან. არც კი გვიფიქრია სხვა ალტერნატივა. გუშინ, როგორც კი განცხადება გავაკეთეთ, ეს იმას ნიშნავდა, რომ ამ პარლამენტში არც შესვლა და არც სია არ არსებობს.
პრეზიდენტი აპირებს 9 საათზე განცხადების გაკეთებას. ჩვენ საბოლოო კონსულტაციებს გავივლით. რა თქმა უნდა, გვჭირდება პროტესტი. გვექნება სრული მხარდაჭერა საზოგადოებისგან“, - განაცხადა გიორგი ვაშაძემ.
ამ წუთებში ორბელიანების სასახლეში პრეზიდენტი ოპოზიციური პარტიების წარმომადგენლებს ხვდება. სალომე ზურაბიშვილთან უკვე მივიდნენ კოალიცია “ძლიერი საქართველოს“ ერთ-ერთი ლიდერი ანა დოლიძე. ასევე პრეზიდენტის ადმინისტრაციის შენობაში არიან “ერთიანობა - ნაციონალური მოძრაობის“ ლიდერები თინა ბოკუჩავა და გიორგი ვაშაძე.
სალომე ზურაბიშვილთან შეხვედრაზე იმყოფება “კოალიცია ცვლილებისთვის“ ლიდერი ნიკა მელია, “გახარია - საქართველოსთვის“ ერთ-ერთი ლიდერი, დიმიტრი ცქიტიშვილიც.
ანა დოლიძის განცხადებით, ოპოზიციის გეგმა მას შემდეგ გახდება ცნობილი, რაც პრეზიდენტთან შეხვედრა დასრულდება, რასაც პრეზიდენტი თავად გააჟღერებს.
როგორც ცნობილია, 21:00 საათზე პრეზიდენტის ადმინისტრაციაში, სალომე ზურაბიშვილი ბრიფინგს გამართავს.
იხილეთ ასევე: