ისრაელის მორიგი შეტევა ლიბანში: ცეცხლის ქვეშ “ჰეზბოლას“ 140-ზე მეტი ობიექტი აღმოჩნდა - ნეთანიაჰუსა და მაკრონს შორის დაძაბულობა გრძელდება, აშშ-ც უკმაყოფილოა

ისრაელის თავდაცვის ძალების ცნობით, სამხრეთ ლიბანში ოპერაცია გრძელდება. ანგარიშის თანახმად, მათ ბოლო 24 საათის განმავლობაში “ათობით ტერორისტის ლიკვიდაცია განახორციელეს და უამრავი იარაღი გაანადგურეს“.

ისრაელის არმიის განცხადებით, ჯარები “ჰეზბოლას“ მებრძოლებთან პირისპირ ბრძოლაში ჩაერთნენ და მათ საჰაერო იერიშებით დაუპირისპირდნენ.

• ისრაელელმა ჯარისკაცებმა აღმოაჩინეს რაკეტების გამშვებები, ნაღმმტყორცნები, ყუმბარები, ტანკსაწინააღმდეგო რაკეტები და სხვა იარაღი, რომლებიც მიმართული იყო ჩრდილოეთ ისრაელის ქალაქებზე.

არსებული ინფორმაციით, გასული დღის განმავლობაში ისრაელმა საჰაერო იერიში მიიტანა “ჰეზბოლას“ 140-ზე მეტ ობიექტზე ლიბანში, მათ შორის სახმელეთო ჯარების ხელმძღვანელობით. მოკლულია 50-ზე მეტი ტერორისტი.

ცნობილია, რომ ერთ-ერთი გარდაცვლილი “ჰამასის“ ხელმძღვანელი ფიგურაა. მაჰმუდ ალ-მაბჰუჰი მართავდა თავდასხმებს ისრაელის ტერიტორიის მიმართულებით.“

• აშშ-ის განცხადებით, შესაძლოა ისრაელს სამხედრო დახმარება შეუზღუდოს - რა არის პირობა?

შეერთებულმა შტატებმა წერილობით მიმართა ისრაელს და ღაზაში ჰუმანიტარული დახმარების გასაზრდელად 30 დღე მისცა.

ისრაელის მთავრობისთვის გაგზავნილი აშშ-ის წერილი, რომლის შინაარსიც, მოგვიანებით, სახელმწიფო დეპარტამენტმა დაადასტურა, თავდაპირველად გამოცემა Axios-მა გაავრცელა. მას ხელს აწერენ სახელმწიფო მდივანი ენტონი ბლინკენი და თავდაცვის მინისტრი ლოიდ ოსტინი.

“ჩვენ ახლა ვწერთ, რათა ხაზი გავუსვათ აშშ-ის მთავრობის ღრმა შეშფოთებას ღაზაში ჰუმანიტარული სიტუაციის გაუარესების გამო და მოვიძიოთ თქვენი მთავრობის გადაუდებელი და მდგრადი ქმედებები ამ თვეში ამ ტრაექტორიის შესაცვლელად“, - აღნიშნულია წერილში.

• მასში ნათქვამია, რომ ისრაელის ევაკუაციის ბრძანებებმა აიძულა 1,7 მილიონი ადამიანი შევიდნენ ვიწრო, სანაპირო ალ-მავასის რაიონში, სადაც ისინი უკიდურესად მძიმე მდგომარეობაში იმყოფებიან.

“განსაკუთრებით შეშფოთებულები ვართ ისრაელის მთავრობის ბოლოდროინდელი ქმედებებით - მათ შორის კომერციული იმპორტის შეჩერება, სექტემბერში ჩრდილოეთ და სამხრეთ ღაზას შორის ჰუმანიტარული გადაადგილების თითქმის 90%-ის უარყოფა ან შეფერხება, მუდმივი მძიმე და გადაჭარბებული ორმაგი გამოყენების შეზღუდვები და საბაჟო მოთხოვნების დაწესება ჰუმანიტარული პერსონალისთვის და გადაზიდვებისთვის“, - აღნიშნულია წერილში.

წერილის თანახმად, ისრაელმა უნდა დაიწყოს ახლავე და 30 დღის განმავლობაში უნდა იმოქმედოს რიგი კონკრეტული ზომების მიხედვით, რათა გაზარდოს დახმარების მიწოდება და რომ წარუმატებლობამ, შეიძლება, გავლენა იქონიოს აშშ-ის პოლიტიკაზე. წერილში ხაზგასმულია, რომ ისრაელმა ზამთრის დაწყებამდე უნდა “გაზარდოს ჰუმანიტარული დახმარება მთელ ღაზაში“.

წერილში საუბარია აშშ-ის იმ კანონებზე, რომლებიც კრძალავს სამხედრო დახმარებას ქვეყნებისთვის, რომლებიც აფერხებენ აშშ-ის ჰუმანიტარული დახმარების მიწოდებას. ის ასევე მოუწოდებს ისრაელს, შეწყვიტოს ჩრდილოეთ ღაზას იზოლაცია და კიდევ ერთხელ დაადასტუროს, რომ ისრაელის მთავრობის პოლიტიკა არ გაითვალისწინებს მშვიდობიანი მოსახლეობის იძულებითი ევაკუაციის ჩრდილოეთიდან სამხრეთისაკენ.

აშშ-ის სახელმწიფო დეპარტამენტის პრესსპიკერმა, მეთიუ მილერმა ჟურნალისტებს განუცხადა, რომ წერილი იყო პირადი დიპლომატიური კომუნიკაცია, რომლის გასაჯაროებასაც არ აპირებდნენ.

• პენტაგონის განცხადებით, “აშშ-ს ისრაელისა და უკრაინის მიმართ სხვადასხვა ვალდებულებები აქვს“

პენტაგონის პრესსპიკერის მოადგილის, საბრინა სინგის განცხადებით, შეერთებული შტატები რუსული რაკეტების და უპილოტო საფრენი აპარატების ჩამოგდების მიზნით უკრაინის სიახლოვეს THAAD-ის ანტისარაკეტო სისტემის განთავსებას არ გეგმავს, როგორც ამას ისრაელისთვის აკეთებს.

პენტაგონში გამართულ ბრიფინგზე საბრინა სინგს დაუსვეს შეკითხვა, თუკი შეერთებული შტატები აგზავნის THAAD-ის სისტემას ისრაელში, ირანიდან თავდასხმების შესაჩერებლად, რატომ არ შეიძლება იგივე გააკეთოს უკრაინისთვის - განათავსოს THAAD-ი პოლონეთში ან რუმინეთში, რათა ხელი შეუწყოს უკრაინაში მშვიდობიანი მოსახლეობის დაცვას. ამ შეკითხვაზე პასუხის გაცემისას სინგმა უპასუხა, რომ ეს არის ორი განსხვავებული სიტუაცია.

“განსხვავებული შესაძლებლობები, განსხვავებული ომები, განსხვავებული რეგიონები. ასევე განსხვავებულია ვალდებულებები ისრაელისა და უკრაინის მიმართ. არ მინდა გავაკეთო იმ ყველაფრის მთელი ჩამონათვალი, რასაც ჩვენ უკრაინას, ან ისრაელს ვაწვდით, მაგრამ რაც შემიძლია გითხრათ არის, რომ ეს ადმინისტრაცია, ეს სამინისტრო აგრძელებს ორივეს მხარდაჭერას სხვადასხვა საჭიროებებში, რაც მათ სჭირდებათ“, - აღნიშნა პენტაგონის წარმომადგენელმა.

• ამასთან, ბენიამინ ნეთანიაჰუმ ემანუელ მაკრონს განუცხადა, რომ ლიბანში ცეცხლის შეწყვეტის წინააღმდეგია

“პრემიერ-მინისტრმა საუბარში განაცხადა, რომ ცეცხლის ცალმხრივად შეწყვეტის წინააღმდეგია, რომელიც არ ცვლის ლიბანში უსაფრთხოების ვითარებას და რომელიც მხოლოდ დააბრუნებს მას იქ, სადაც იყო“, - აღნიშნულია ბენიამინ ნეთანიაჰუს ოფისის განცხადებაში.

ისრაელის პრემიერის ოფისმა მანამდე გაავრცელა განცხადება, რომლითაც გამოეხმაურა საფრანგეთის პრეზიდენტის კომენტარს იმასთან დაკავშირებით, რომ ისრაელის სახელმწიფო გაერო-ს რეზოლუციით შეიქმნა.

• “შეხსენება საფრანგეთის პრეზიდენტს: ისრაელის სახელმწიფო შეიქმნა არა გაერო-ს რეზოლუციით, არამედ დამოუკიდებლობისთვის ომში გმირი მებრძოლების სისხლით მიღწეული გამარჯვებით“, - აღნიშნულია ნეთანიაჰუს ოფისის განცხადებაში.

ცნობისთვის, ელისეს სასახლეში გამართული დახურული შეხვედრის ერთ-ერთმა მონაწილის თქმით, რომელმაც მედიასთან ანონიმურობის დაცვის პირობით ისაუბრა, შეხვედრაზე მაკრონმა განაცხადა, რომ “ბატონმა ნეთანიაჰუმ არ უნდა დაივიწყოს, რომ მისი ქვეყანა გაერო-ს გადაწყვეტილებით შეიქმნა და ახლა გაერო-ს გადაწყვეტილებების უგულებელყოფის დრო არ არის“.

ბენიამინ ნეთანიაჰუმ კვირას გაერო-ს მოუწოდა, გაიყვანოს სამხრეთ ლიბანში განლაგებული სამშვიდობო ძალები, რომელიც 700 ფრანგ ჯარისკაცს მოიცავს და განაცხადა, რომ “ჰეზბოლა“ მათ ცოცხალ ფარად იყენებს.

წყარო

იხილეთ ასევე:

• "ეს არის ომი ჩვენი არსებობისთვის, "ომი აღორძინებისთვის“ , ომს დავასრულებთ, როდესაც ყველა მიზანს მივაღწევთ" - ბენიამინ ნეთანიაჰუ
• “ჰეზბოლას" თავდასხმა ისრაელის სამხედრო ბაზაზე მსხვერპლით დასრულდა, აშშ კი ისრაელში ანტისარაკეტო სისტემას და ჯარისკაცებს გაგზავნის - უახლესი დეტალები