"შიშით არის განპირობებული თუ ბრაზით, რადგან ზურაბიშვილი მათ არ ემორჩილება, არ ვიცი... ამის რაციონალურად ახსნა შეუძლებელია" - "ოცნება" ისევ პრეზიდენტის იმპიჩმენტს იწყებს: რა ამბობენ ექსპერტები?
"ქართული ოცნება“ საქართველოს პრეზიდენტის, სალომე ზურაბიშვილის იმპიჩმენტის პროცედურას კიდევ ერთხელ იწყებს. ამის შესახებ "ქართული ოცნების“ პოლიტსაბჭოს წევრმა, პარლამენტის თავმჯდომარე შალვა პაპუაშვილმა პარტიის ოფისში გამართულ ბრიფინგზე განაცხადა. მისი განმარტებით, გადაწყვეტილების მიღების მიზეზი კვლავ უცხოეთში უნებართვო ვიზიტებია. პაპუაშვილის თქმით, ახალი კონსტიტუციური წარდგინება, საქართველოს საკონსტიტუციო სასამართლოს საპარლამენტო არჩევნებამდე წარედგინება, თუმცა საკითხზე ახალი მოწვევის პარლამენტი, პირველივე სხდომებზე იმსჯელებს.
" სალომე ზურაბიშვილს მიმდინარე წელს ისედაც ეწურება უფლებამოსილების ვადა. შესაბამისად, იმპიჩმენტის წესით მისი გადაყენებით, სალომე ზურაბიშვილის უფლებამოსილების ვადა მაქსიმუმ ერთი თვით შეიკვეცოს. აქედან გამომდინარე, იმპიჩმენტის წესით თანამდებობიდან მის გადაყენებას, უფლებამოსილების ვადის მხრივ, აქვს მეტწილად სიმბოლური დატვირთვა, თუმცა ძალზე პრინციპულია ამ გადაწყვეტილების სამართლებრივი და პოლიტიკური დატვირთვა“, - განაცხადა პაპუაშვილმა. (იხილეთ განცხადება სრულად)
"საკონსტიტუციო სარჩელი უსაფუძვლოა და არის შურისძიების აქტი კონკრეტული პერსონის მიმართ, "ქართული ოცნება“ პანიკაშია“, - ასე შეფასდა კონსტიტუციონალისტების ნაწილის მხრიდან ხელისუფლების ნაბიჯი.
პოლიტოლოგ თენგიზ ფხალაძის თქმით, ამ ნაბიჯის პოლიტიკური ლოგიკით ახსნა შეუძლებელია, ეს არის ირაციონალური გადაწყვეტილება, რაც უფრო მეტად დამყარებულია ემოციებზე, ამბიციებზე, ვიდრე ქვეყნის ინტერესებზე.
"რაციონალურად ამის ახსნა ძალიან ძნელია იმიტომ, რომ სრული აბსურდია რამდენიმე მიზეზის გამო:
1. სალომე ზურაბიშვილს საპრეზიდენტო ვადა რამდენიმე კვირაში ეწურება და იმ შემთხვევაში, თუ "ოცნება“ რჩება ხელისუფლებაში, გასაგებია, რომ ის ვერ იქნება პრეზიდენტი. ხოლო გადამდგარი პრეზიდენტის იმპიჩმენტი რას ნიშნავს, ეს ცალკე თემაა.
2. თუ "ოცნება“ აპირებს განსაკუთრებულად დაჩქარებული წესით ჩაატაროს ეს ყველაფერი და იმპიჩმენტი არჩევნებამდე მოასწროს, ეს კიდევ უფრო მეტად აბსურდია იმიტომ, რომ ქვეყანაში უამრავი რამაა კიდევ გასაკეთებელი და არა მგონია, ეს იყოს მთავარი პრობლემა.
3. ყველაზე მთავარი რაც არის, მივდივართ ისევ იმასთან, რომ "ოცნება“ ძალზე მწვავედ რეაგირებს კრიტიკაზე და მათ შორის პრეზიდენტის ნებისმიერ აქტივობაზე, რომელიც არ ჯდება "ოცნების“ გემოვნებაში.
ეს ყველაფერი შიშითაა განპირობებული თუ ბრაზით, რომ ზურაბიშვილს თავის დროზე დაეხმარნენ პრეზიდენტი გამხდარიყო და ახლა გაბრაზდნენ იმაზე, რომ ის მათ არ ემორჩილება, არ ვიცი, მაგრამ ამის რამე რაციონალური, პოლიტიკური ლოგიკით ახსნა არის შეუძლებელი. ეს არის ირაციონალური გადაწყვეტილება, რაც უფრო მეტად დამყარებულია ემოციებზე, ამბიციებზე, ვიდრე ქვეყნის ინტერესებზე - დავუშვათ, ქვეყნის წინსვლის, ან იმავე ინსტიტუციების და კონსტიტუციის გაძლიერების მოტივით - "ოცნება“ იმდენად, იმდენჯერ და ისე ხშირად არღვევს კონსტიტუციას, რომ სასაცილოა, როდესაც გვესმის, რომ ისინი ამას სხვებს საყვედურობენ. დღეს, როდესაც ქვეყანაში უამრავი პრობლემაა და ვითარება კიდევ უფრო რთულდება, როდესაც დაანონსებულია რეპრესიები, საუბარია ოპოზიციის აკრძალვაზე და სხვა უამრავ რაღაცაზე, მთავარი პრობლემა თურმე სალომე ზურაბიშვილის უცხოეთში ვიზიტი ყოფილა. ეს არანაირ ლოგიკაში არ ჯდება... შემიძლია ერთი რამ ვთქვა, რომ ამით "ოცნება“ ნამდვილად საკუთარი თავის ვნების რეჟიმშია გადასული, რადგან ეს არანაირად ხელს არ უწყობს და ვერ შეუწყობს მათი რეიტინგის გაზრდას. ეს არის საკუთარი მხარდამჭერების ნაწილზე გათვლილი ძალიან მოკლევადიანი ეფექტის მქონე ნაბიჯი, სხვა არაფერი. თუ "ოცნება“ რჩება ხელისუფლებაში, გასაგებია, რომ სალომე ზურაბიშვილი ვერც ერთ ვარიანტში ვერ იქნება პრეზიდენტი, ასე რომ, ამ ყველაფერში აზრს ვერ ვხედავ.“
პოლიტოლოგ რამაზ საყვარელიძეს მიაჩნია, რომ ხელისუფლების მხრიდან ეს მკაფიო დაპირისპირება არის სიგნალი თავისი ამომრჩევლებისთვის, რომ ის ჯგუფი, ვისთანაც პრეზიდენტს აქვს საქმე, მიუღებელია "ოცნებისთვის“.
"ქართული ოცნება“ ცდილობს კიდევ უფრო გამოკვეთოს თავისი დამოკიდებულება პრეზიდენტის მიმართ. ვფიქრობ, ის სასამართლოს მხრიდან ისევე, როგორც წინა ჯერზე, სირთულეებს წააწყდება. ხელისუფლების მხრიდან ეს მკაფიო დაპირისპირება იქნება სიგნალი თავისი ამომრჩევლებისთვის, რომ ის ჯგუფი, ვისთანაც პრეზიდენტს აქვს საქმე, მიუღებელია "ოცნებისთვის“. არის ასეთი განწყობები, ბევრი მოქალაქე აცხადებს, რომ არც "ოცნება“ უნდა, არც - "ნაციონალური მოძრაობა“ და სხვა პარტიებს დაუჭერს მხარს. პრეზიდენტსაც ისეთ პარტიებთან აქვს საქმე, რომლებიც ამ პოლუსებზე ("ნაცების" და "ქოცების") არ ფიგურირებენ. ამ პარტიებთან პრეზიდენტის ყოფნა "ოცნების“ ამომრჩევლისთვის მიუღებელი რომ უნდა იყოს, ამ სათქმელს ეუბნება ხელისუფლება ამომრჩეველს. არჩევნებს ყოველთვის ახლავს ხმების დაკარგვის შიში და ამას ცდილობს "ოცნება“. ვერ ვხედავ იმის აუცილებლობას, რომ ლიდერებმა ივანიშვილს კოჭი გაუგორონ, კოჭი თუ სჭირდება, ივანიშვილი ისედაც იგორებს "ოცნების“ მხრიდან, მისი შემდავებლები მაინც არ არიან.
ამ იმპიჩმენტის გამოცხადებას, ჩემი აზრით, მხოლოდ სასიგნალო ფუნქცია ჰქონდა და არა რეალურად განხორციელება“.