თბილისის საპატიო მოქალაქის წოდება მიენიჭა თენგიზ გაჩეჩილაძეს - ადამიანს, რომელიც 30 წლის განმავლობაში ქართული, სპორტული მედიის ფლაგმან "ლელოს" რედაქტორობდა

სახელმწიფო ცერემონიების სასახლეში თბილისის საპატიო მოქალაქეების დაჯილდოების ღონისძიება გაიმართა, რომელზეც დედაქალაქის მერმა კახა კალაძემ საპატიო თბილისელის წოდება 25 მოქალაქეს მიანიჭა. მათ შორის არის ქართველი პედაგოგი, საქართველოს დამსახურებული სპორტული ჟურნალისტი, სპორტის დამსახურებული მოღვაწე, ასოცირებული პროფესორი თენგიზ გაჩეჩილაძე

ბატონი თენგიზი 1939 წლის 28 აპრილს ზესტაფონის რაიონის სოფელ წევაში დაიბადა.

1963 წელს დაამთავრა საქართველოს ფიზიკური კულტურის ინსტიტუტი, 1968 წელს - თბილისის სახელმწიფო უნივერსიტეტი.

ის 1958 წლიდან ჟურნალისტიკაში მოღვაწეობს. იყო ჟურნალ "მართვეს“ რედაქტორი, 30 წლის განმავლობაში (1985-2015) კი ქართულ სპორტულ გაზეთ "ლელოს“ რედაქტორობდა (ამჟამად საპატიო რედაქტორი). "სპორტი ყველასათვის“ საქართველოს ეროვნული ფედერაციის პრეზიდენტი (2005-2013). არის საქართველოს ეროვნული ოლიმპიური კომიტეტის ერთ-ერთი დამფუძნებელი, ყოფილი ვიცე-პრეზიდენტი. საერთაშორისო ჯილდოების მფლობელი, არაერთი წიგნისა და გამოცემის ავტორი.

თენგიზ გაჩეჩილაძე ერთადერთი ქართველი ჟურნალისტია, რომელიც აკრედიტირებული იყო ზაფხულისა და ზამთრის 14 ოლიმპიურ თამაშებზე, რაც უნიკალური და სარეკორდო მაჩვენებელია. 1994 წელს საქართველოს პირველი ოლიმპიური მისიის ხელმძღვანელი იყო ლილეჰამერის (ნორვეგია) ზამთრის ოლიმპიურ თამაშებზე.

ეწევა პედაგოგიურ და ჟურნალისტურ მოღვაწეობას. 2014 წელს გამოსცა წიგნი "ლელო“-80 - გაზეთ "ლელოს“ დაარსებიდან 80 წლის საიუბილეო თარიღთან დაკავშირებით.