სახლის ჩამონგრევას დედა, 2 შვილი და ბებია ემსხვერპლნენ - ტრაგედია ნეაპოლთან

ოჯახის ოთხი წევრი, მათ შორის ორი მცირეწლოვანი ბავშვი, სამხრეთ იტალიაში გაზის აფეთქების შედეგად დაიღუპა.

• ნეაპოლთან ახლოს, ქალაქ სავიანოში, მათი ორსართულიანი სახლი აფეთქების შედეგად ნაწილობრივ ჩამოინგრა, რამაც და-ძმა, მათი დედა და ბებია იმსხვერპლა.

იტალიელი მეხანძრეების თქმით, მამა და ახალშობილი ნანგრევებიდან ცოცხლები ამოიყვანეს. ადგილობრივი მედიის ცნობით, მამა ნეაპოლის საავადმყოფოში რჩება და ის მძიმე მდგომარეობაშია, ხოლო ბავშვის დაზიანებები სიცოცხლისთვის საშიში არ არის.

იტალიის სახანძრო სამსახურმა Vigili del Fuoco-მ განაცხადა, რომ მშობლები და სამი ბავშვი შენობის ერთ სართულზე ცხოვრობდნენ, ხოლო მეორე ქალი - სავარაუდოდ ბებია - ზედა სართულზე იმყოფებოდა.

ხელისუფლებას არ დაუდასტურებია ბავშვების ასაკი, თუმცა ადგილობრივი მედიის ცნობით, ისინი ოთხი და ექვსი წლის იყვნენ.

Vigili del Fuoco-ს თქმით, აფეთქება ადგილობრივი დროით დაახლოებით 07:00-ზე მოხდა. მეხანძრეებმა ბავშვები და მამა დილით იპოვეს, სხვებს კი მთელი დღე ეძებდნენ ნანგრევებში, დედის ცხედარს კი მხოლოდ 16:45 საათზე მიაგნეს.

მეხანძრეების პრეს-სპიკერმა ლუკა კარიმ რეპორტიორებს განუცხადა, რომ მაშველებს უნდა გამოეჩინათ "დიდი სიფრთხილე და ნელა ემოძრავათ, რათა თავიდან აეცილებინათ ახალი ჩამონგრევები".

საძიებო და სამაშველო ჯგუფები, რომლებიც მეძებარი ძაღლებით მუშაობდნენ, ღამით ბებიის ძებნას განაგრძობდნენ. ის 01:00 საათზე იპოვეს.

გამოძიება გრძელდება შენობის ჩამონგრევის ზუსტი მიზეზის დასადგენად, მაგრამ წინასწარი ინფორმაციით, სახლი გაზით გამოწვეული აფეთქების გამო ჩამოინგრა.

კამპანიის რეგიონის ხელისუფლებამ Facebook-ზე გამოქვეყნებულ პოსტში დაწერა, რომ სამაშველო ოპერაციებს 60-ზე მეტი მოხალისე შეუერთდა.

სახანძრო სამსახურის მიერ გაზიარებულ სურათებზე ჩანს სამაშველო ჯგუფები, რომლებიც განადგურებული შენობის ნანგრევებში მთელი ღამის განმავლობაში მუშაობდნენ.

დრონით გადაღებულ კადრებში შენობის სახურავში ორი დიდი ხვრელი ჩანს.

წყარო