"საქართველოში არ არსებობს ერთნაირსქესიანთა ქორწინება და კასპში რანაირად იქნება" - რას ფიქრობენ მერის სიტყვებზე ცნობილი კასპელები ოლეგ იაძე და მარეხ ყამბეგაშვილი?
მეორე დღეა სოციალურ ქსელში კასპში მომხდარი ამბები სახუმარო თემად არის ქცეული.
გუშინ, კასპის მერი მოსახლეობას წინასაარჩევნო კამპანიის ფარგლებში გორის მერთან, ვლადიმერ ხინჩეგაშვილთან და პარლამენტარ ირაკლი მეზურნიშვილთან ერთად შეხვდა. შეხვედრისას ვახტანგ მაისურაძემ მოსახლეობასთან ერთსქესიანთა ქორწინების საკითხზე ისაუბრა.
“უნდა აიკრძალოს "ერთსქესიანთა" ქორწინება ჩვენს რეგიონში, უნდა აიკრძალოს "ერთსქესიანთა" ოჯახებში ბავშვის აყვანა. დარწმუნებული ვარ, კასპის მოსახლეობა დაუდგება “ქართულ ოცნებას” გვერდში. ავტომატურად, ლადოს დაუდგება გვერდში და გვეყოლება პარლამენტში. მარტო გორზე არ იქნება აქცენტი გაკეთებული, გადანაწილდება მისი ყურადღება კასპზეც”, - განაცხადა მაისურაძემ.
მერის თქმით, ევროკავშირი საქართველოსნაირ “აყვავებულ ქვეყანას” თავად სთხოვს, რომ მასთან გაერთიანდეს.
“ევროკავშირი მერე თვითონ მიგვიღებს, თუ ვუნდივართ, ეს აყვავებული ქვეყანა და დარწმუნებული ვარ, აქეთ გვთხოვენ, შემოდითო”, - ამბობს მაისურაძე.
რას ფიქრობენ მერის სიტყვებზე ცნობილი კასპელები, ოლეგ იაძე და მარეხ ყამბეგაშვილი? - როდესაც მათ კომენტარისთვის დავუკავშირდით, გაგიკვირდებათ და არცერთ მათგანს მერის სიტყვები მოსმენილი არ ჰქონდა.
მარეხ ყამბეგაშვილი და ოლეგ იაძე 2014 წელს მთელმა საქართველომ გაიცნო. მაშინ ოლეგ იაძე კასპის მუნიციპალიტეტის გამგებელი იყო, ქალბატონი მარეხი კი - მისი ოპონენტი. "კასპი არის ტატამი, ოლეგაა ჩვენი მწვრთნელი", - ამბობდა მაშინ ყამბეგაშვილი.
ახლა მარეხ ყამბეგაშვილი ადგილობრივი მერიის თანამშრომელია, ოლეგ იაძე კი გადამდგარი ჩინოსანი, რომელიც მშობლიურ სოფელ მეტეხში დაბრუნდა და სპორტდარბაზში მენეჯერად მუშაობს.
მარეხ ყამბეგაშვილი:
- არ ვიცი, არ მომისმენია. ახლაც მქონდა საუბარი, სულ არ მაღიზიანებენ ლგბტ თემის წარმომადგენლები, იყვნენ თავისთვის, არავის პირად სივრცეში არ ვიჭრები. ჩვენს სივრცეშიც ნუ შემოიჭრებიან თავიანთი მოგონილი უფლებების დასაცავად. ერთსქესიანთა ქორწინებას არ მივესალმები.
- თქვენს რეგიონში იყო აქამდე ერთსქესიანი ქორწინებები?
- არ ვიცი, არ მომისმენია, არც გამიგია, რომ ვინმე ვინმეს მიასკდა. საქართველოში არ არსებობს ერთნაირსქესიანთა ქორწინება და კასპში რანაირად იქნება.
- ხომ არ ყოფილა თქვენს რეგიონში შევიწროების ფაქტები?
- არა, ჩვენთანაც ცხოვრობდა ერთი ასეთი და მასთან ყველას მეგობრული ურთიერთობა ჰქონდა.
ოლეგ იაძეც წინააღმდეგია ერთნაირსქესიანთა ქორწინების, თუმცა მერის გამოსვლა მასაც არ მოუსმენია. ამბობს, რომ დაუფასებლობა ვერ აიტანა და ახლა სოფელში ცხოვრობს.
- ცოტა ისეთი პიროვნება ვარ, მტერიც და მოყვარეც ერთნაირად მექცევა. ჩართული ვარ პოლიტიკურ ამბებში. დაუფასებლობა ვერ ავიტანე და ოთხი წელია სოფელში ვარ, ჩავიკეტე. აქ პატარა სპორტული ბაზაა და მენეჯერად ვმუშაობ.
- ისევ "ქართულ ოცნებას" უჭერთ მხარს?
- რა თქმა უნდა.
- კასპის მერის სიტყვებზე რას იტყვით, რომელიც, თქვენს რეგიონში ერთნაირსქესიანთა ქორწინების აკრძალვას ითხოვს და დარწმუნებულია, რომ მოსახლეობა გვერდში დაუდგება...
- ჩემთვის მიუღებელია, ამ მართმადიდებლურ ქვეყანაში რა უნდა "ერთსქესიანობას"?.. არ უნდა დასვათ ასეთი კითხვა. მთელი მსოფლიო მაქვს შემოვლილი და ნუ მასწავლიან, დემოკრატია რა არის. მე-12 საუკუნეში ორი ქალი მეფე გვყავდა...
- გაგიგიათ, რომ კასპში ერთნაირსქესიანთა ქორწილი შედგა?
- კასპში არა, მაგრამ ხომ იყო ფაქტი, რომ ქართველები დაქორწინდნენ. ტელევიზორშიც აჩვენეს, გაზეთებშიც დაწერეს. კასპში მოხდება, თუ ჭიათურაში, რა მნიშვნელობა აქვს, საქართველოში ხომ მოხდა.
- ლადო ხინჩეგაშვილის იმედი თუ გაქვთ პოლიტიკაში?
- რა თქმა უნდა, ლეგენდაა, მუშა-გლეხის ოჯახში გაზრდილი შვილია. მეორე მხარეა, სპორტსმენები რამდენად უნდა იყვნენ პარლამენტში, მე თუ მკითხავთ, უნდა იყვნენ.
- იცით, თქვენამდე ქალბატონ მარეხ ყამბეგაშვილს დავურეკე კომენტარზე...
- კარგით რა, არ გინდათ. მაგ გოგოსთან მე კავშირი არ მქონია, შტაბის უფროსი რომ ვიყავი, აქტივისტი იყო. გამგებელი რომ გავხდი, ამბობდა, "კასტუმს იხდიდა და დედას გვაგინებდაო“, ღმერთმა დამიფაროს, ეგ ვიკადრო. მაშინაც "ოცნების" მხარდამჭერი იყო და ახლაც ალბათ არის. მე "ოცნებას" არ ვუდგავარ გვერდში, მე სამშობლოს ვუდგავარ. მომსპეს და გამანადგურეს, ოთხი წელია სოფელში ვარ ჩაკეტილი, მაგრამ მაინც...