"დრესკოდი იყო დასაცავი და ასე შეიქმნა კაბა სპეციალურად წითელი ხალიჩისთვის...არ ვფიქრობ, რომ ვინმეს რამე უნდა მოაწონო" - ია სუხიტაშვილის კაბაზე Situationis-მა იზრუნა: რას პასუხობს დიზაინერი ირაკლი რუსაძე კრიტიკოსებს
ვენეციის კინოფესტივალზე ქართველი რეჟისორის, დეა კულუმბეგაშვილის ახალი ფილმის, "აპრილი" პრემიერა გაიმართა, რაც ქართული კინოს დიდი წარმატებაა. პრემიერაზე იმყოფებოდნენ მსახიობები: კახა კინწურაშვილი, ია სუხიტაშვილი და მერაბ ნინიძე, რომლებიც კინოსურათში მთავარ როლებს ასრულებენ. მათ კინოფესტივალის წითელ პეციალურად ხალიჩაზე გაიარეს.
ია სუხიტაშვილის კაბამ ქართველ ინტერნეტმომხმარებელში არაერთგვაროვანი შეფასებები გამოიწვია, ზოგს მოეწონა მსახიობის არჩევანი, ზოგიერთმა კი გააკრიტიკა.
- კაბა ცნობილმა ქართულმა ბრენდმა, Situationist-მა შექმნა.
"სიტუაციონისტი“ გუნდური მუშაობის შედეგია, მხოლოდ მე არ ვარ. ჩვენ გუნდი ვართ და ყველა ჩვენს საქმეს ვაკეთებთ. ვფიქრობ, არასწორი იქნებოდა, თუ ჩვენი ნაშრომის მხოლოდ ჩემს სახელთან ყოფილიყო დაკავშირებული", - ეს დიზაინერ ირაკლი რუსაძის სიტყვებია, რომელიც დღესდღეობით საკმაოდ წარმატებულ და პოპულარულ ბრენდს ხელმძღვანელობს. ის და მისი გუნდი მსხვილ და საინტერესო შეკვეთებზე მუშაობენ. მათ სამოსს როგორც ქართველი, ისე უცხოელი კაშკაშა ვარსკვლავები იცვამენ.
- Ambebi.ge ირაკლი რუსაძეს ესაუბრა:
- უპირველესად იმას ვიტყვი, ძალიან დიდი ამბავია, რომ ქართული ფილმი ვენეციის ფესტივალზეა ნომინირებული. დეა კულუმბეგაშვილი ძალიან ნიჭიერი რეჟისორია. უდიდეს წარმატებას მიაღწია, ასევე უნდა აღინიშნოს ია სუხიტაშვილის ტალანტიც.
ჩემთვის სასიამოვნო იყო ამ პროექტზე მუშაობა - მოხარული ვიყავი, რომ გარკვეულწილად ამ ყველაფრის მონაწილე აღმოვჩნდი. რაც შეეხება კაბას, მასზე მუშაობისას ტყავი გამოვიყენეთ და შექმნის პროცესი ძალიან საინტერესო იყო.
- კაბა რომ ასეთი ყოფილიყო, ეს იდეა მხოლოდ თქვენია, თუ იას სურვილიც გათვალისწინეთ?
- ერთობლივად ვიმუშავეთ. საერთოდ, იშვიათად ვმუშაობთ პერსონალურ შეკვეთებზე, მაგრამ როდესაც ასეთი რამ ხდება, ეს არის მომხმარებლის და ბრენდის კოლაბორაცია. ამიტომ ყველაფერი ერთობლივად მიმდინარეობს. კი, ამჯერადაც გავითვალისწინეთ მსახიობის აზრი და ჩვენიც შევთავაზეთ.
დრესკოდი იყო დასაცავი და ასე შეიქმნა კაბა სპეციალურად წითელი ხალიჩისთვის.
- დეა კულუმბეგაშვილის, კახა კინწურაშვილისა და მერაბ ნინიძის სამოსზეც თქვენ იმუშავეთ?
- არა, მხოლოდ იას კაბა შევქმენით.
- ქართული საზოგადოების ნაწილმა კრიტიკული მოსაზრებებიც გამოთქვა, ზოგს, პირიქით, ძალიან მოეწონა კაბა. რას ეტყოდით კრიტიკოსებს?
- დავიწყოთ იმით რომ, ჩემი აზრით, იას ძალიან ლამაზი და კარგი გარეგნობა აქვს, ასევე არის ძალიან ბუნებრივი. კაბა არ იყო რაიმეთი გადამეტებული, უგემოვნო. ამასთან არის სადა.
- ბევრის ყურადღება აკადემიურობით და დახვეწილობით მიიქცია...
- ტყავზე მუშაობას თავისებური გამოცდილება და ცოდნა სჭირდება. შესაბამისად მასზე მუშაობასაც უფრო რთულია, ვიდრე რომელიმე ქსოვილზე. საერთოდ, ყველანაირ აზრს აქვს არსებობის უფლება. იმიტომ არსებობს ამდენი ბრენდი და ამდენი დიზაინერი, რომ ყველამ ბრენდი და დიზაინერი თავისი გემოვნების მიხედვით მონახოს. რატომ უნდა მოაწონო ვიღაცას რაღაც?! არ ვფიქრობ, რომ ვინმეს რამე უნდა მოაწონო. ჩვენ ვაკეთებ საქმეს, როგორც ვხედავთ, გვესმის და ვიცით. გემოვნება კიდევ ყველას სხვადასხვანაირი აქვს.