რა არის ცნობილი უკრაინის ახალ საგარეო საქმეთა მინისტრზე, რომელმაც დმიტრო კულება შეცვალა?
უკრაინის საგარეო საქმეთა მინისტრი ანდრეი სიბიგა გახდა
უკრაინის უმაღლესმა რადამ უკრაინის საგარეო საქმეთა მინისტრად მინისტრის პირველი მოადგილე, ანდრეი სიბიგა დანიშნა, - ინფორმაციას უკრაინული მედია სახალხო დეპუტატ იაროსლავ ჟელეზნიაკზე დაყრდნობით ავრცელებს.
მისი ინფორმაციით, გადაწყვეტილებას მხარი 258-მა დეპუტატმა დაუჭირა.
სიბიგა კარიერული დიპლომატია. მუშაობდა საგარეო საქმეთა სამინისტროში სხვადასხვა თანამდებობაზე, 2016 წლიდან 2021 წლამდე იყო უკრაინის ელჩი თურქეთში, შემდეგ კი 2021 წელს, პრეზიდენტის აპარატის უფროსის მოადგილის პოსტი დაიკავა, სადაც საგარეო პოლიტიკის საკითხებს კურირებდა. ის საგარეო საქმეთა სამინისტროში მიმდინარე წლის ივლისში დაბრუნდა - უკრაინის საგარეო საქმეთა მინისტრის პირველი მოადგილედ. 2017 წლიდან მას აქვს საგანგებო და სრულუფლებიანი ელჩის დიპლომატიური რანგი.
ის 1975 წლის 1-ელ იანვარს ტერნოპოლის მხარის ქალაქ ზბოროვში დაიბადა, 1997 წელს დაამთავრა ლვოვის ეროვნული უნივერსიტეტი, "საერთაშორისო ურთიერთობების" სპეციალობით.
მან საგარეო საქმეთა მინისტრის თანამდებობაზე შეცვალა დმიტრო კულება, რომელიც უწყებას 2020 წლიდან ხელმძღვანელობდა.
კულებას შემდგომი ბედი ჯერჯერობით უცნობია. RBC-უკრაინის წყაროებმა განაცხადეს, რომ მას შეიძლება შესთავაზონ თანამდებობა ბრიუსელში, ევროკავშირის ან ნატოს მისიებში, ანაც ელჩის თანამდებობა ბელგიასა და ლუქსემბურგში.
იხილეთ ასევე: