ბავშვებზე მგლების თავდასხმების გამო ინდოეთი პანიკამ მოიცვა - რა განაპირობებს ცხოველების ქცევის ცვლილებას?
ოთხი წლის სანდიას 17 აგვისტოს ღამეს თავისი ალიზის ქოხის წინ ეძინა, როდესაც დენი მოულოდნელად წავიდა და სოფელი სიბნელეში ჩაძირა. რამდენიმე წუთში ბავშვს თავს მგლები დაესხნენ და გაიტაცეს.
“შუქის წასვლიდან ორი წუთიც არ იყო გასული, რომ მგლებმა სოფელს შემოუტიეს. ვიდრე იმის გააზრება მოვასწარით, რა ხდებოდა, სანდია უკვე გატაცებული ჰყავდათ”, - აცხადებს ბავშვის დედა სუნიტა.
მეორე დღეს სანდიას ცხედარი შაქრის ლერწმებში, სახლიდან 500 მეტრის დაშორებით იპოვეს.
აპრილიდან, ინდოეთის ბაჰრაიჩის რეგიონში, დაახლოებით 30 სოფელს მგლების თავდასხმები ატერორებს. მათი მსხვერპლი გახდა ცხრა ბავშვი და ერთი სრულწლოვანი, 34 ადამიანი კი დაშავდა. ყველაზე პატარა მსხვერპლი 1 წლის იყო, ყველაზე დიდი კი - 45-ის. ადგილობრივმა მამაკაცებმა ღამ-ღამობით პატრულირება დაიწყეს, ხოლო ხელისუფლებამ დრონებითა და კამერებით კონტროლი და მახეების დაგება დაიწყო, თუმცა თავდასხმები კვლავ გრძელდება.
მგლების ადამიანებზე თავდასხმები იშვიათია და, როგორც წესი, ცოფის გავრცელებას უკავშირდება. მეცნიერების თქმით, ბაჰრაიჩის რეგიონში ხშირი წვიმების გამო მგლების ბუნებრივი საცხოვრებელი გარემო დაზიანდა, რამაც ისინი აიძულა, საკვების ძიება ადამიანთა დასახლებებში დაეწყოთ. ინდოელი მეცნიერების აზრით, მგლების ქცევის შეცვლას კლიმატის ცვლილება განაპირობებს.
გარდა ამისა, რეგიონში მცხოვრებ ბავშვებს ხშირად სათანადოდ ვერ იცავენ, რაც მათ მგლების ადვილ სამიზნედ აქცევს. მსგავსი შემთხვევები წარსულშიც ყოფილა, მაგალითად, 1996 წელს, როდესაც მგლების სამიზნე 76 ბავშვი გახდა, მათგან 38 დაიღუპა. მაშინაც და ახლაც, მგლების საცხოვრებელ გარემოსთან ახლოს მდებარე ღარიბ სოფლებში ბავშვები ძირითადად ღია ცის ქვეშ იძინებენ და თავდასხმების სამიზნე სწორედ ამ დროს ხდებიან.
ექსპერტები ადგილობრივებს მოუწოდებენ, ბავშვები შიგნით, დიდების გარემოცვაში დააძინონ და ღამე გარეთ მარტო არ გაუშვან. მათი თქმით, ვიდრე თავდასხმების ზუსტი მიზეზი დადგინდება, ეს ზომები ხალხის დასაცავად არსებითია.