ჯო ბაიდენის თქმით, მძევლების გათავისუფლების შესახებ შეთანხმების მისაღწევად ნეთანიაჰუ საკმარისს არ აკეთებს, ისრაელში კი საყოველთაო გაფიცვა დაიწყო - ბოლო ცნობები კიდევ ერთი ცხელი წერტილიდან
აშშ-ის პრეზიდენტის, ჯო ბაიდენის განცხადებით, მძევლების გათავისუფლების შესახებ შეთანხმების მისაღწევად ისრაელის პრემიერ-მინისტრი ბენიამინ ნეთანიაჰუ საკმარისს არ აკეთებს.
აშშ-ის პრეზიდენტმა ჟურნალისტებს განუცხადა, რომ ღაზაში ცეცხლის შეწყვეტისა და მძევლების გათავისუფლების შესახებ საბოლოო შეთანხმების წარდგენასთან ახლოს არის.
“ჩვენ ამასთან ძალიან ახლოს ვართ“, - განაცხადა ჯო ბაიდენმა.
ამასთან, ჟურნალისტის შეკითხვას, მძევლების გათავისუფლების შესახებ შეთანხმების მისაღწევად ისრაელის პრემიერ-მინისტრი საკმარისს აკეთებს თუ არა, ჯო ბაიდენმა უპასუხა, რომ არა.
ცნობისთვის, დღეს, ჯო ბაიდენი და კამალა ჰარისი ღაზაში ცეცხლის შეწყვეტისა და მძევლების გათავისუფლების შესახებ აშშ-ის მოლაპარაკებების გუნდს ხვდებიან.
გუშინ, 1 სექტემბერს ცნობილი გახდა, რომ ისრაელმა ღაზაში კიდევ ექვსი მძევლის ცხედარი აღმოაჩინა. ისრაელის თავდაცვის ძალების ინფორმაციით, ცხედრები იმ გვირაბიდან დაახლოებით 1 კილომეტრში აღმოაჩინეს, სადაც, რამდენიმე დღის წინ ერთ-ერთი გატაცებული მძევალი გადაარჩინეს.
“პირველადი შეფასებით, ისინი სასტიკად დახოცეს “ჰამასის“ ტერორისტებმა ცოტა ხნის წინ მანამ, სანამ ჩვენ მათ მივაღწევდით. ცხედრები იპოვეს რაფაჰში ბრძოლის დროს გვირაბში, იმ გვირაბიდან დაახლოებით ერთი კილომეტრის მოშორებით, სადაც რამდენიმე დღის წინ ფარჰან ალ-ქადი გადავარჩინეთ”, - განაცხადა ისრაელის თავდაცვის ძალების პრესსპიკერმა, დანიელ ჰაგარიმ.
-
“მძევლების ოჯახების ფორუმმა“ ისრაელის პრემიერ-მინისტრი ბენიამინ ნეთანიაჰუ გულგრილობაში დაადანაშაულა და პრემიერს მოსთხოვა "აიღოს პასუხისმგებლობა მძევლების მიტოვებაზე". ფორუმზე ნათქვამია, რომ ექვსივე ტყვე "მოკლული იქნა ბოლო რამდენიმე დღის განმავლობაში და მათ თითქმის 11 თვის განმავლობაში, წამება და შიმშილი გადაიტანეს".
ისრაელის პრემიერ-მინისტრის, ბენიამინ ნეთანიაჰუს განცხადებით, ისრაელი არ მოისვენებს მანამ, სანამ პასუხს არ აგებინებს მათ, ვინც პასუხისმგებლები არიან ექვსი მძევლის მკვლელობაში, რომელთა ცხედრები ღაზას სექტორში აღმოაჩინეს.
“ვეუბნები “ჰამასის” ტერორისტებს, რომლებმაც დახოცეს გატაცებულები და მათ ლიდერებს - დაკარგეთ სიცოცხლის უფლება. არ დავისვენებთ და არ გავჩუმდებით, დაგედევნებით, დაგეწევით და ანგარიშს გავასწორებთ თქვენთან“, - აღნიშნა ნეთანიაჰუმ.
მისი თქმით, ისრაელი მზად არის მიაღწიოს შეთანხმებას დარჩენილი მძევლების გათავისუფლებისა და ისრაელის უსაფრთხოების უზრუნველსაყოფის მიზნით.
ტრაგიკული და უმძიმესი ფაქტის პარალელურად, ვითარება დაიძაბა ისრაელში. ქვეყანაში საყოველთაო, გენერალური გაფიცვა დაიწყო.
ღაზაში 6 მძევლის ცხედრების აღმოჩენის შემდეგ, ქვეყანაში ათასობით ადამიანმა საპროტესტო აქციები გამართა და ხელისუფლებას მძევლების გათავისუფლების შესახებ შეთანხმების მიღწევის დაჩქარებისკენ მოუწოდა.
- ისრაელის უმსხვილესმა პროფკავშირმა, „ჰისტადრუტმა“, დღეს დილიდან, ადგილობრივი დროით 6:00 საათიდან ქვეყნის მასშტაბით გენერალური გაფიცვის განკარგულება გასცა. მედიის ინფორმაციით, დაიხურა სამთავრობო და მუნიციპალური ოფისები, ასევე სკოლები და ბევრი კერძო ბიზნესი. ისრაელის საერთაშორისო აეროპორტმა „ბენ გურიონმა“ მუშაობა ორი საათით შეაჩერა.
”მივედი დასკვნამდე, რომ მხოლოდ ჩვენს ჩარევას შეუძლია შეანჯღრიოს ისინი, ვისაც შენჯღრევა სჭირდებათ. შეთანხმების მიღწევის კუთხით პროგრესი არ ხდება პოლიტიკური მოსაზრებებიდან გამომდინარე და ეს მიუღებელია“, - აღნიშნა „ჰისტადრუტის“ ხელმძღვანელმა, არნონ ბარ-დევიდმა.
თელ-ავივის და გივათაიმის მერებმა განაცხადეს, რომ მუნიციპალიტეტები ორშაბათს მძევლების დაბრუნების მოთხოვნით გაიფიცებოდნენ.
უკვე თვეზე მეტია, აშშ-ის ჩართულობით მიმდინარეობს მოლაპარაკებები ისრაელისა და ღაზას სექტორში ცეცხლის შეწყვეტის თაობაზე.
ჯერ კიდევ 19 აგვისტოს, აშშ-ის სახელმწიფო დეპარტამენტის ხელმძღვანელმა ენტონი ბლინკენმა ისრაელს და ჰამასს მოუწოდა, არ ჩაშალონ მოლაპარაკებები, რაც, მისი თქმით, შეიძლება იყოს "ბოლო შესაძლებლობა" ღაზაში ზავის დადებისა და მძევლების გათავისუფლებისთვის.
-
მოლაპარაკებების პროცესის მიხედვით, საომარი მოქმედებები კონფლიქტის ზონაში ექვსი კვირის განმავლობაში უნდა შეჩერდეს და გათავისუფლდნენ მძევლები და პატიმრები.
თუმც, უცნობია, რა ეტაპზეა ახლა პროცესი.
შეგახსენებთ, “ჰამასმა“ 7 ოქტომბერს ისრაელზე თავდასხმის დროს დაახლოებით, 250 ადამიანი მძევლად აიყვანა. ისრაელის თავდაცვის ძალებმა, ამ დრომდე, 35 მძევლის დაღუპვა დაადასტურა, უცნობია 101 მძევლის ბედი.
იხილეთ ასევე:
- ისრაელმა ღაზაში კიდევ ექვსი მძევლის ცხედარი აღმოაჩინა, ნეთანიაჰუ შურისძიებას აანონსებს, “მძევლების ოჯახების ფორუმი“ კი უმძიმეს დეტალებს ავრცელებს - “ისინი სასტიკად დახოცეს, აწამებდნენ...“
- "ჰამასის" მიერ მძევლად აყვანილი ბედუინი ისრაელის ძალებმა გაათავისუფლეს - მედიაში გათავისუფლებული მძევლის პირველი კადრები ვრცელდება: "ეს გაბედული ოპერაცია იყო"