ვინ არის უკრაინაში დაღუპული კიდევ ერთი ქართველი მებრძოლი - ის პროფესიონალი სამხედრო გახლდათ. იბრძოდა აფხაზეთში, 2008 წელს - აგვისტოს ომში

უკრაინაში კიდევ ერთი ქართველი მებრძოლი, 49 წლის ვიქტორ კიპრიტიდი დაიღუპა. აღნიშნულ ინფორმაციას სოციალურ ქსელში ინტერნეტ გვერდი "ქართული ლეგიონი“ ავრცელებს.

ვიქტორ კიპრიტიდი ბოლო დავალების შესრულების დროს, დაბომბვის შედეგად დაიჭრა.

მათ მიერ გავრცელებული ინფორმაციის თანახმად, ქართველ მებრძოლს საქართველოში 30 აგვისტოს ჩამოასვენებენ.

ვიქტორ კიპრიტიდი სოხუმიდან დევნილი იყო. მისი ოჯახი, ცოლი და ორი შვილი თბილისში ცხოვრობენ.

ის პროფესიონალი სამხედრო გახლდათ. 90-იან წლებში იბრძოდა აფხაზეთში. 2008 წელს - აგვისტოს ომში.

ვიქტორ კიპრიტიდი უკრაინაში იბრძოდა 2014 წლიდან - ევრომაიდნის მოვლენების, რუსეთის მიერ განხორციელებული აგრესიის შედეგად ყირიმის ანექსიისა და სეპარატისტების მიერ დონეცკისა და ლუგანსკის რეგიონების ნაწილის ე.წ. დამოუკიდებელ რესპუბლიკებად გამოცხადების შემდეგ.

თავდაპირველად ის უკრაინაში დაფუძნებული "ქართული ლეგიონის“ წევრი იყო. თუმცა, თანამებრძოლებისა და მეგობრების ცნობით, ბოლო ოთხი წლის განმავლობაში უკრაინის შეიარაღებულ ძალებში ირიცხებოდა.

ცნობისთვის, რუსეთ-უკრაინის ომის დაწყებიდან დღემდე 70-მდე ქართველი სამხედრო დაიღუპა.