საფრანგეთი ისევ პოლიტიკურ კრიზისშია: მაკრონმა მემარცხენე კოალიციიდან პრემიერის დანიშვნაზე უარი თქვა - ვინ არის NFP-ს კანდიდატი ლუსი კასტეტსი?
საფრანგეთი კვლავ პოლიტიკურ ქაოსში ჩაეფლო მას შემდეგ, რაც ემანუელ მაკრონმა უარი განაცხადა, დაენიშნა პრემიერ-მინისტრი მემარცხენე კოალიციიდან, რომელმაც ყველაზე მეტი საპარლამენტო ადგილი მოიპოვა გასული თვის რიგგარეშე არჩევნებში.
პრეზიდენტს იმედი ჰქონდა, რომ კონსულტაციები დაძლევდა იმ პოლიტიკურ ჩიხს, რომელიც გამოიწვია არჩევნებმა, რის შედეგადაც ეროვნული ასამბლეა სამ, თითქმის თანაბარ ბლოკად დაიყო - მემარცხენედ, ცენტრისტულად და უკიდურესად მემარჯვენედ, რომელთაგან არცერთს არ აქვს გადამწყვეტი უმრავლესობა.
პარტიებსა და საპარლამენტო ლიდერებთან გამართული მოლაპარაკებები, რომლებიც ჩიხის დაძლევას და პარტიათაშორისი მხარდაჭერით პრემიერ-მინისტრის დანიშვნას ისახავდა მიზნად, მაკრონის გადაწყვეტილების შემდეგ, ფაქტობრივად, ჩაიშალა.
ორშაბათს საღამოს გავრცელებულ განცხადებაში ელისეს სასახლემ პარასკევისა და ორშაბათის დისკუსიები დაახასიათა, როგორც "სამართლიანი, გულწრფელი და სასარგებლო", მაგრამ აღნიშნა, რომ სამუშაო გადაწყვეტილებამდე საქმე ვერ მივიდა.
მაკრონმა პარტიის ლიდერებთან და გამოცდილ პოლიტიკოსებთან კონსულტაციების ახალი რაუნდი გამოაცხადა, რომელიც სამშაბათს დაიწყება.
"მეხუთე რესპუბლიკის ამ უპრეცედენტო დროს, როდესაც ფრანგი ხალხის მოლოდინები მაღალია, სახელმწიფოს მეთაური მოუწოდებს ყველა პოლიტიკურ ლიდერს, მოიქცნენ სიტუაციის შესაბამისად და გამოავლინონ პასუხისმგებლობის გრძნობა", - ნათქვამია განცხადებაში.
პრეზიდენტმა დაამატა: "ჩემი პასუხისმგებლობაა უზრუნველვყო, რომ ქვეყანა არც ჩიხში შევიდეს და არც დასუსტდეს."
განცხადების შემდეგ, NFP-მ თქვა, რომ შემდგომ მოლაპარაკებებში მონაწილეობას არ მიიღებს, თუ მის მიერ მთავრობის ფორმირების საკითხი არ იქნება განხილული. მემარცხენე ალიანსმა ივლისის საკანონმდებლო არჩევნების მეორე ტურში უკან ჩამოიტოვა უკიდურესად მემარჯვენე ეროვნული გაერთიანება (RN). კოალიციამ 577-ადგილიან ასამბლეაში ყველაზე მეტი ადგილი მოიპოვა და განაცხადა, რომ ახალი პრემიერ-მინისტრი მისი რიგებიდან უნდა იყოს წარმოდგენილი.
NFP-მ კანდიდატად ლუსი კასტეტსი, 37 წლის ეკონომისტი და პარიზის მერიის ფინანსური დირექტორი წამოაყენა. ორშაბათის განცხადების შემდეგ, ჟან-ლუკ მელანშონმა, LFI-ს პრეზიდენტმა, მაკრონს ბრალი დასდო "განსაკუთრებით რთული ვითარების" შექმნაში.
"სახალხო და პოლიტიკური პასუხი უნდა იყოს სწრაფი და მტკიცე", - განაცხადა მელანშონმა. LFI-მ ხალხს დემონსტრაციებისკენ მოუწოდა, რათა პრეზიდენტს "დემოკრატიის პატივისცემისკენ" უბიძგონ და განაცხადა, რომ მაკრონის იმპიჩმენტის მოთხოვნას წარადგენს.
"რესპუბლიკის პრეზიდენტი არ აღიარებს საყოველთაო ხმის მიცემის შედეგს, რომელმაც ახალი სახალხო ფრონტი არჩევნების სათავეში დააყენა", - ნათქვამია განცხადებაში, - "ის უარს ამბობს, დანიშნოს ლუსი კასტეტსი პრემიერ-მინისტრად. ამ პირობებში LFI-ს დეპუტატები პრეზიდენტის იმპიჩმენტს მოითხოვენ".
მარინ ტონდელიემ, მწვანეების გენერალურმა მდივანმა განაცხადა, რომ პრეზიდენტის ქმედება "სამარცხვინო" და "სახიფათო დემოკრატიული უპასუხისმგებლობა" იყო.